ԱՄՆ-ը Մոսկվային հակահարված է խոստանում
«Ագրեսիվ գործողությունների դեպքում Մոսկվան պատասխանի կարժանանա»․ - Լոնդոնում կայացած մամուլի ասուլիսում նման հայտարարությամբ է հանդես եկել Միացյալ Նահանգների պետքարտուղար Էնթոնի Բլինքենը՝ մեկնաբանելով Ռուսաստանի և Արևմուտքի հարաբերություններում առկա լարվածությունը։
«Մենք բավական լրջորեն կենտրոնացել ենք Ռուսաստանի գործողությունների և այդ պետության ընտրած քաղաքական կուրսի վրա։ Նախագահ Բայդենը այս առթիվ շատ հստակորեն էր արտահայտվել, այդ թվում մինչև նախագահ ընտրվելը՝ եթե Ռուսաստանը որոշի անխոհեմ կամ ագրեսիվ գործողությունների դիմել, մենք դա անպատասխան չենք թողնի։ Դրա հետ մեկտեղ, սակայն, մենք չենք ցանկանում սրել իրադրությունը։ Մեր ցանկությունն ավելի կայուն և կանխատեսելի հարաբերություններ ունենալն է», -ասում էր ԱՄՆ պետքարտուղարը։
ԱՄՆ-ը արդեն բացահայտ, առանց թաքցնելու հայտարարում է, որ անհաշտ պայքար է սկսել Ռուսաստանի հետ՝ բոլոր ճակատներում: Իսկ դա նշանակում է, որ ՌԴ-ի քաղաքականությունը նաև մեր տարածաշրջանում դիտարկվելու է որպես խնդրահարույց: ԱՄՆ-ը կսկսի ընդդիմանալ ռուսական ազդեցության աճի փորձերին:
Սենատոր Ալեքսեյ Պուշկովը մեկնաբանել է ԱՄՆ պետքարտուղար Էնթոնի Բլինկենի հայտարարությունը առ այն, որ նախագահ Ջո Բայդենը ցանկանում է Ռուսաստանի առաջնորդ Վլադիմիր Պուտինի հետ քննարկել երկրների միջև հարաբերությունների կայունացումը:
«Հարցն այն է, թե ինչ հիմքով է Բայդենը տեսնում նման կայունացում», - գրել է Պուշկովը տելեգրամում:
Սենատորը նշել է, որ պահպանելով կամ ընդլայնելով հակառուսական պատժամիջոցները, անհնար է բարելավել հարաբերությունները երկրների միջև: Նա սահմանափակումների յուրաքանչյուր նոր փուլ անվանել է «հզոր հարված հարաբերությունների կայունությանը»: «Միացյալ Նահանգների մեղքով, բանը հասել է Մոսկվայում Ռուսաստանի դեսպանի հետ կանչմանը և ԱՄՆ դեսպանին Մոսկվայի «առաջարկին»՝ մեկնել Վաշինգտոն ՝ մտորելու հարաբերությունների ապագայի մասին»,- հիշեցրել է խորհրդարանականը:
Նա նաև ավելացրել է, որ կայունացում տեղի չի ունենա, եթե շարունակվեն անհեթեթ մեղադրանքները, քարոզչական գրոհները Մոսկվայի վրա և ԱՄՆ-ի պահանջները ՝ փոխել Ռուսաստանի արտաքին քաղաքականությունը Դոնբասի կամ Սիրիայի նկատմամբ: «Կայունացումը ենթադրում է նվազագույնը մի շարք պատժամիջոցներից և պայմաններ ու վերջնագրեր դնելուց հրաժարում»,-ընդգծել է Պուշկովը:
Խորհրդարանականն ուշադրություն է հրավիրել պետքարտուղարի այն խոսքերի վրա, որ հարաբերությունների կայունացումը կախված է Մոսկվայից: Նրա կարծիքով, դա վկայում է այն փաստի մասին, որ «Վաշինգտոնի դիրքորոշման մեջ ոչ մի շարժ չի նախատեսվում»: «Եթե ԱՄՆ-ն մտադիր չէ ինչ-որ բան փոխել իր քաղաքականության մեջ, ապա դա չի խոստանում հաջող բանակցություններ», - եզրափակել է սենատորը:
Նկատենք, որ ԱՄՆ նախագահ Ջո Բայդենը ցանկանում է բանակցություններ վարել Ռուսաստանի առաջնորդ Վլադիմիր Պուտինի հետ՝ երկու երկրների հարաբերությունները կայունացնելու համար, նա մայիսի 3-ին նշեց Միացյալ Նահանգների պետքարտուղար Էնթոնի Բլինքենը:
Մետաքսյա Շալունց
Հետևեք մեզ Viber-ում
