Նիկոլահաճո ֆանտոմազը

2021 թվականի ապրիլին հավաքագրվել են ռեկորդային հարկային եկամուտներ՝ 180 մլրդ դրամ։ Այս մասին իր ֆեյսբուքյան էջում գրել է ՀՀ Էկոնոմիկայի նախարար Վահան Քերոբյանը:

«2021 թվականի ապրիլին հավաքագրվել է ռեկորդային հարկային եկամուտներ՝ 180մլրդ դրամ։ Ի հեճուկս բազմաթիվ «ամեն ինչը վատ ա ու ոչ մի ներդրում չկա» ասողների՝ Հայաստանի ազատ և համակարգային կոռուպցիա չունեցող տնտեսությունը արագ շտկում է մեջքը։ Դա բնավ չի նշանակում, որ տեմպը թուլացնելու իրավունք ունենք, հակառակը՝ պետք է սանձել ալիքն ու սլանալ առաջ»,- գրել է նա։

Մի առիթով Վահան Քերոբյանն ասել է, որ եթե այս տարի մինչև տարեվերջ Հայաստանում երկնիշ տնտեսական աճ չգրանցվի, ինքը հրաժարական է տալու։ Երևի վերոհիշյալ գրառումը նա կատարել է երկնիշ աճի մասին երազելիս։ 
Թերևս կարելի էր քահ-քահ ծիծաղել Վահան Քերոբյանի գրածի վրա, եթե նա շարունակեր զբաղվել Մենյու․ամ-ի մատակարարումների կազմակերպմամբ, և չլիներ ՀՀ տնտեսության զարգացման գլխավոր պատասխանատուներից մեկը։

2020թ–ի մարտի երկրորդ կեսից սկսած և ապրիլի-մայիսն ամբողջությամբ ՀՀ տնտեսությունը գտնվում էր մեռյալ վիճակում։ Կորոնավիրուսի հետևանքով հանրային կյանքի և տնտեսության բոլոր ոլորտներում, ներառյալ շինարարությունը, առևտուրը, ծառայությունները, տուրիզմը, ժամանացի վայրերը, ռեստորաններն ու սրճարանները փակ էին։ Անցյալ տարվա ապրիլ-մայիս ամիսներին արգելված էին բոլոր տեսակի հանրային միջոցառումները, անգամ հուղարկավորությունների ժամանակ 20 հոգուց ավել մարդու ներկայություն չէր թույլատրվում, սգո սրահները ևս չէին աշխատում։

Այսինքն՝ զուտ ապրիլ ամսվա հարկային եկամուտների ցուցանիշը 2020 թվականի ապրիլի ցուցանիշի հետ համեմատելը, ոչ այլ ինչ է, քան ընդամենը նիկալոհաճո պոպուլիզմի դրսևորում։ Այլ կերպ ասած՝ անցյալ տարվա ապրիլին հայտնի պատճառով վիճակը շատ վատ, կարելի է ասել, զրոյական է եղել, ուստի այդ համեմատությունը ոչ միայն տեղին չէ, այլև որևէ բանի, առավել ևս պաշտոնական վիճակագրության ցուցիչ չէ։
Պաշտոնական վիճակագրության մեջ վիճակը ճիշտ հակառակն է․ համաձայն տնտեսական ակտիվության ցուցանիշի՝ Հայաստանում այս տարվա հունվար–մարտ ամիսներին, 2020թ–ի հունվար մարտի համեմատ, նվազել է 2 տոկոսով։ Գնաճն անցյալ տարվա առաջին եռամսյակի համեմատ բարձր է ավելի քան 7 տոկոսով։ Փաստացի նախարար Քերոբյանի լավատեսությունը պաշտոնական վիճակագրության մեջ արտահայտված է տնտեսական աճի հակադարձ համեմատականով և գների նախատեսվածից բարձր աճով։

Այնպես որ՝ ֆանտոմազի դերի մեջ մտած նախարար Քերոբյանը, թող 2021-ի ապրիլի հարկային հավաքագրումները համեմատի ոչ թե 2020-ի, այլ, օրինակ, 2018 և 2019-ի ցուցանիշների հետ և իր շեֆ Նիկոլ Փաշինյանի հետ բացատրություն տա, թե ինչու է Հայաստանի տնտեսությունը 2020 թվականին գրանցել տարածաշրջանում ամենամեծ անկումը։

Հայկ Դավթյան