«Պուտին՝ ապոկալիպսիս». Իլհամին «ֆաս» են տվել

Երեկ հերթական հակառուսական բողոքի ցույցն է տեղի ունեցել Բաքվում...
Բողոքի ցույցի կազմակերպիչը ներքին գործերի նախկին նախարար Իսքանդեր Համիդովի կողմից 2019 թվականին ստեղծված «Ժողովրդական շարժում» կազմակերպությունն է։ «Ժողովրդական շարժումը» հիմնադրվել է 2019-ին ՝ երկրի ներքին գործերի նախկին նախարար Իսքենդեր Համիդովի կողմից: Այս կառույցին անդամակցում են Հասարակական կազմակերպություններ և մի շարք քաղաքական կուսակցություններ:

Ցույցից առաջ շարժումը հայտարարություն է տարածել՝ պնդելով, որ «ռուսաստանցի զինվորականների ներկայությունը Լեռնային Ղարաբաղում վտանգում է Ադրբեջանի ինքնիշխանությունը»։ Բաքվի ոստիկանությունը ցրել է Ռուսաստանի դեսպանատան առջև կազմակերպված բողոքի ակցիան, որի մասնակիցները պահանջում էին դուրս բերել Լեռնային Ղարաբաղում տեղակայված ռուսական ստորաբաժանումները։
Ոստիկանության կողմից ցույցը ցրելը՝ ոչինչ չի նշանակում, որովհետև բոլորի համար էլ պարզ է, որ Բաքվում չի կարող տեղի ունենալ որևէ բողոքի ցույց՝ առանց իշխանության իմացության և թույլտվության:

Ու հետաքրքրականն այն է, որ այդ ցույցը համընկել է 11-րդ Կարմիր բանակի կողմից Ադրբեջանի խորհրդայնացման տարելիցի օրվա հետ: Հիշեցնենք, որ 1920թ. հենց այս օրը XI Կարմիր բանակը խորհրդայնացրեց Ադրբեջանը: Ակցիայի մասնակիցները պահանջել են ռուսական զորքերի դուրսբերում Ադրբեջանից:

Ուշագրավ է եղել պահանջներից հատկապես այս մեկը՝ «Մենք պահանջում ենք ռուսների դուրսբերում Ղարաբաղից, նրանք խաղաղապահ չեն, թող նրանց փոխարինեն թուրք զինվորականները», - ասել են ցուցարարները:

Կամ՝ այս մեկը՝ «Եթե ռուս զինվորականները «Իսկանդեր» հրթիռներ են արձակել Շուշիի ուղղությամբ, ապա ինչպե՞ս կարող են այդ զինվորականները համարվել խաղաղապահներ: Թող հեռանան»:

Կազմակերպիչները ԶԼՄ-ներում տարածել են ակցիայի բանաձևը, որում ասվում է, որ «Ժողովրդական շարժումը» ռուս զինվորականների ժամանումը համարում է ոտնձգություն Ադրբեջանի ինքնիշխանության դեմ: Այս զինվորականները Ղարաբաղում չեն զբաղվում խաղաղապահությամբ, նրանք անում են ինչ ուզում են: Այս ամենը հակասում է Ադրբեջանի շահերին, ասվում է բանաձևում:

Ինչպես ասում են՝ «կենացները քաղցրանում» են... Ալիևին արդեն միանշանակ դրդում են գործողությունների՝ ընդդեմ ռուս խաղաղապահների, ասել է թե՝ ընդդեմ ռուսական ջանքերի Արցախում:

Ռուս խաղաղապահների առկայությունն Արցախում ոտնձգություն է որակվում՝ Ադրբեջանի ինքնիշխանության հանդեպ: Ինչ է նշանակում՝ ցուցարարները պահանջել են, որ թուրքական զորախումբ տեղակայվի Ղարաբաղում, ու հանկարծ ցույցի ընթացքում ցուցադրել են թուրքական «Գորշ գայլեր» խմբավորման սիմվոլիկան` պահանջելով դուրս բերել ռուսական զորքերը Ադրբեջանից՝ «Պուտին՝ ապոկալիպսիս» վանկարկումներով:
Հիմա Ալիևը շատ խորամանկ խաղ է տանում. Հակառուսական տրամադրություններով նա իր կողմն է քաշելու արևմուտքին՝ նրանց ականջահաճո գաղափարներ ներկայացնելով:

Ալիևը պատրաստ է ամեն քայլի՝ միայն թե սեփական հասարակությանը ապացուցի, որ պատերազմն իզուր չէ, զոհերը իզուր չէին, և ռուսական զորքին կհանի Ադրբեջանից, հակառակ դեպքում, Ալիևը հստակ գիտակցում է, ադրբեջանցի հասարակությունը վաղ, թե ուշ նրանից բացատրություն է պահանջելու՝ «ո՞ւմ ենք հաղթել, հայերի՞ն, որոնց փոխարեն հիմա ռուսական զորք է Լեռնային Ղարաբաղում...»:

Մետաքսյա Շալունց