Քոչարյանն նախկին նախարարությունները կվերականգնի և ոչ միայն
Երկրորդ նախագահ Ռոբերտ Քոչարյանն իր աջակիցների հետ հանդիպման ժամանակ, խոսելով իր՝ մեծ քաղաքականություն վերադառնալու պատճառների մասին հարցին, հայտարարել է, որ իրեն վերադարձրել են մեծ քաղաքականություն ներկա իշխանությունները։
«Հիմա ինչո՞ւ եմ հետ գալիս, ինձ հետ բերեցին: Եթե երկրի վիճակը լավ լիներ, իսկ մասնավոր ընկերությունում աշխատանքն այնքան հետաքրքիր էր, երբեք մտքովս էլ չէր անցնի վերադառնալ: Բայց անտարբեր մնալ այս վիճակում, ասել՝ դե լավ, մեկն այս հարցը կլուծի: Ես չեմ տեսնում, որ կլուծի: Երևի կան մարդիկ, որոնք էլի համարում են, որ ի վիճակի են լուծել: Ուզում եմ հավատալ, որ ճիշտ են մտածում, բայց իմ տպավորությամբ այս վիճակի համար ես ամենահարմար, կենսագրություն, փորձ ու գիտելիք ունեցող մարդկանցից եմ,- ասել է նա և ավելացրել․- ունեմ հաջողված փորձ պատերազմի և անվտանգության համակարգեր ձևավորելու, ունեմ պետական կառավարման ոլորտում ևս հաջողված փորձ։ Փորձ եմ ձեռք բերել նաև մասնավոր ընկերությունում»:
Խոսելով կառավարման համակարգի այժմյան մոդելի մասին՝ էքսնախագահն ասել է, որ գյուղատնտեսության և մշակույթի նախարարությունների լուծարումն ուղղակի անհասկանալի և անընդունելի են։ <<Պետությունը չի կարող չունենալ գյուղատնտեսության նախարարություն այն դեպքում, երբ բնակչության 25- 30 տոկոսն աշխատում է հենց գյուղատնտեսության ոլորտում։Մեր նման երկրում կրճատել այդ նախարարությունը՝ անունը դնելով օպտիմալացում, ուղղակի զավեշտ է։ Մեծ հարված է հասցված գյուղատնտտեսությանը, և այդ նախարարությունը առաջին հերթին պետք է վերականգնվի, որովհետև այսօր այդ ոլորտի քաղաքականություն մշակող մարմին ըստ էության չկա, և սա նորմալ չէ>>,- ասել է Քոչարյանը։
Նրա խոսքով՝ անհասկանալի է նաև, թե ինչպես կարող էր մշակույթի նախարարությունը կրճատել կամ միացնել մեկ այլ նախարարության։ <<Մտավորականությունը ահազանգում և խոսում էր այդ մասին, բայց լսող չկար։ Այս իշխանությունը զարմանալի հատկություն ունի՝ չլսել մասնագետներին։ Ոնց որ մասնագետն իրենց թշնամին լինի։ Ես չգիտեմ՝ դա ինչից է գալիս․ միգուցե կոմպլեքսներից, որ իրենք ոչ մի բանի մասնագետ չեն։ Սա մի բարդույթ է, որն ուղղակի ավերեց բոլոր ոլորտները։ Սրանք ընդունակ չեն լսել մասնագետին, և արդյունքն այն է, ինչ մենք ունենք>>,- նկատել է Քոչարյանը։
Նա նաև ասել է, որ ինքն ունի կոնկրետ ծրագիր և հստակ գիտակցում է, թե ինչ քայլեր են պետք անել։ Ըստ Քոչարյանի՝ կան բոլոր նախադրյալները՝ Հայաստանը վերածելու մի մեծ շինարարական հրապարակի։ Բիզնես միջավայրի բարելավման բանաձևն այն է, որ պետք է պարզապես չխոչընդոտել գործարարներին։ Եվ հակառակը՝ կարելի է ընդամենը մեկ նախադասությամբ փոշիացնել բիզնես միջավայր ասվածը, օրինակ՝ երբ վարչապետը հայտարարում է, թե ամեն ներդրողի ԱԱԾ մեկ աշխատող է կցվելու։ <<Ավելի մեծ հիմարություն հնարավոր չէ անգամ հորինել>>,- հայտարարել է Քոչարյանը՝ ըստ էության ակնարկելով գործող վարչապետին։
Խոսելով Թուրքիայի հետ սահմանի բացման մասին՝ նա ասել է, որ փակ սահմանները, անշուշտ, լավ բան չեն, սակայն եթե այս պահին նման բան արվի, մեր երկրի գյուղատնտեսությունն ուղղակի կկործանվի, և Արարատյան դաշտավայրի գյուղացիների վիճակը կտրուկ կվատանա, քանի որ իրենց արտադրանքը գնային առումով մրցունակ չի լինի, ի համեմատ թուրքականի։ Իսկ Թուրքիան, ի տարբերություն Հայաստանի, սուբսիդիա է տրամադրում գյուղատնտեսությանը։ Քոչարյանն, ըստ էության, կայուն տնտեսական և կառավարման համակարգի կողմնակից է։ Այդ պատճառով էլ ստեղծված քաոսային վիճակը նա առաջարկում է փոխարինել կուռ համակարգով։
Հայկ Դավթյան
Հետևեք մեզ Viber-ում
