ԱՄՆ-ի նոր պլանը. Հայաստանն ու Արցախը՝ թուրք-ադրբեջանական «երախում»

Հայաստանի ՀԱՊԿ-ի անդամակցությունը շատ սահմանափակումներ է դնում ամերիկյան ռազմական օգնության վրա, «Ազատությանը» տված հարցազրույցում նախօրեին ասել է ՀՀ-ում ԱՄՆ դեսպան Լին Թրեյսին:

«ԱՄՆ կողմից Հայաստանին տրամադրվող օգնությանը, ռազմական օգնությանը, ապա ես պարզապես պետք է հիշեցնեմ, որ Հայաստանը ՀԱՊԿ անդամ է, իսկ դա այն կազմակերպությունը չէ, որի անդամ է ԱՄՆ-ն, և Հայաստանի ՀԱՊԿ-ի անդամակցությունը շատ էական սահմանափակումներ է դնում ռազմական օգնության վրա, որը մենք կարող ենք տրամադրել», - ասել է նա: Նրա խոսքով, ռազմական վաճառքի և օգնության առումով կան որոշ սահմանափակումներ՝ ՀԱՊԿ-ին Հայաստանի անդամակցության պատճառով:
Ինչ է սա, եթե ոչ Հայաստանին ուղղված հստակ ուղերձ այս մտքով՝ եթե ուզում եք ԱՄՆ-ն ձեզ զենք վաճառի, ուրեմն դուրս եկեք ՀԱՊԿ-ից և մենք կապահովենք ձեր անվտանգությունը:

Իսկ Վրաստանին ԱՄՆ-ն նման երաշխիք տվե՞լ էր, որ 2008 թվականին Ռուսաստանի հետ սանձազերծված պատերազմի արդյունքում Վրաստանը տարածքներ կորցրեց:

ԱՄՆ դեսպանի միանշանակ ուղերձը հետպատերազմյան շրջանում մեր տարածաշրջանում ամերիկյան քաղաքականության արդեն բացահայտ դրսևորում է, որի նպատակը Ռուսաստանի մեր տարածաշրջանից դուրս բերելն է:

Հայաստանը ՀԱՊԿ-ի անդամ էր, դրա համա՞ր էր արևմուտքը լռում 44 օր ՆԱՏՕ-ի անդամ Թուրքիայի մասնակցությամբ Արցախի հայերի դեմ արգելված զենքերի կիրառման համար: Հայաստանը ՀԱՊԿ-ի անդամ էր՝ դրա համա՞ր ընդդեմ Ադրբեջանի պատժամիջոցներ չեն կիրառվում, որ մեր տարածաշրջան սիրիացի վարձկան ահաբեկիչներ էին լցրել՝ հայերի դեմ կռվելու համար: Հայաստանը ՀԱՊԿ-ի անդամ էր, դրա համա՞ր է հիմա արևմտյան պետությունները լռում, երբ Ալիևը ընդդեմ Հայաստանի տարածքի հավակնություններով է հանդես գալիս՝ Սյունիքից, Սևանից մինչև Երևան...
Ո՞ւմ են հիմարի տեղ դնում: Ռուսաստանի միջոցով խաղաղություն հաստատելուց հետո ամերիկյան կողմը չի հանդարտվում, որ Մոսկվան կանխեց թուրքական ուղիղ ներխուժումը Հայաստան, ու հիմա Ռուսաստանին տարածաշրջանից հանելու ու Հայաստանն ու Արցախը թուրք-ադրբեջանական «երա՞խն» են ուզում գցում:
Պատահական չէ, որ նախօրեին ՌԴ պաշտպանության փոխնախարար Ալեքսանդր Ֆոմինը լրագրողներին ներկայացրեց Դուշանբեում կայացած հավաքում ՌԴ պաշտպանության նախարարի ելույթը:

Արևմուտքն ակտիվորեն դեմ է դուրս գալիս հետխորհրդային տարածքում ինտեգրման գործընթացներին, հակամարտության ներուժ է կուտակվում Հավաքական անվտանգության պայմանագրի կազմակերպության (ՀԱՊԿ) օրինակով: «Այս մասին հայտարարել է ՌԴ պաշտպանության նախարար Սերգեյ Շոյգուն՝ ելույթ ունենալով ապրիլի 27-ին ՀԱՊԿ երկրների ռազմական գերատեսչությունների ղեկավարների հանդիպմանը», ասաց ՌԴ պաշտպանության փոխնախարար Ալեքսանդր Ֆոմինը:
Նրա խոսքով, Շոյգուն Դուշանբեում կայացած հանդիպմանը նշել է, որ «մեր պետություններին սպառնացող մարտահրավերների շրջանակը զգալիորեն ընդլայնվել է ՀԱՊԿ տարածքում»: «Ավելին, դա տեղի է ունենում հետխորհրդային տարածքում ինտեգրման գործընթացներին Արևմուտքի ակտիվ հակադրության և նրանց շահերի ոլորտում տարածաշրջանի երկրների ներգրավման ֆոնին»,- մեջբերում է Ֆոմինը Ռուսաստանի պաշտպանության նախարարին:

Նրա խոսքով, Շոյգուն հանդիպմանը նշել է, որ անընդհատ փորձեր են արվում սեպ խրել մեր պետությունների միջև, միջամտել ներքին գործերին և հրահրել «գունավոր» հեղափոխություններ: Միևնույն ժամանակ ՀԱՊԿ անդամներին ցանկացած պատրվակով համառորեն պարտադրվում են տարբեր ծրագրեր և համաձայնագրեր: «Պաշտպանության նախարարի խոսքով, նման նախագծերը դժվար թե էական ազդեցություն ունենան տարածաշրջանային անվտանգության ամրապնդման վրա: Դրանք, որպես կանոն, թաքնված նպատակներ ունեն»,- շեշտեց Ֆոմինը:

Ըստ էության, Շոյգուն փաստել է, որ ԱՄՆ-ի և ՆԱՏՕ-ի գործողությունները Եվրոպական տարածաշրջանում նպաստում են ռազմական վտանգի աճին, Ուկրաինայում ազգայնական տրամադրությունները զինված բախում են հրահրում Դոնբասում:
Ու հիմա, այս ֆոնին՝ Հայաստանում ԱՄՆ դեսպանը Հայաստանի իշխանություններին ասում է՝ եթե ուզում եք՝ զինենք Հայաստանը, դուրս եկել ՀԱՊԿ-ից: Ու սա այն դեպքում, երբ Թուրքիան ու Ադրբեջանը շարունակում են սպառնալ Հայաստանին ու Արցախին, իսկ նույն ԱՄՆ-ը չի սաստում Էրդողանին ու Ալիևին:

Մետաքսյա Շալունց