Ալիևը նոր պատերազմի հիմք է գցում. «Թավիշն» ու ռազմավարական դաշնակիցը լուռ են

Ալիևը երեկ «վերջին նախազգուշացումն» է արել Հայաստանին... Ադրբեջանի նախագահ Իլհամ Ալիևը երեկ հայտարարել է, որ «ռազմական սադրանքը, որը վերջերս իրականացվել է Հայաստանի կողմից Զանգելանի ուղղությամբ, պետք է վերջինը լինի»:

«Մենք ցուցաբերել էինք զսպվածություն և չէինք արձագանքել այդ սադրանքին: Եթե լինի մեկ այլ նման փորձ, ապա հակառակորդը տեղում կոչնչացվի», - ասել է Ալիևը սահմանապահների հետ հանդիպմանը:

Ապա Ալիևը հավելել է, թե «Հայաստանում ռևանշիստական ուժերը կրկին մեղադրանքներ են հնչեցնում Ադրբեջանի դեմ ու տարածքային պահանջներ ներկայացնում»: «Ուզում եմ ասել, որ նրանք հրաժարվեն իրենց կեղտոտ մտադրություններից, թե չէ վերջը շատ վատ կլինի: Հայրենական պատերազմի ընթացքում մենք ցույց տվեցինք, թե ով՝ ով է: Երկաթե բռունցքը ջախջախեց թշնամու գլուխը», սպառնացել է Ադրբեջանի նախագահը:

Այսպես, նոյեմբերին ստորագրված եռակողմ հայտարարությունից վեց ամիս անց արդեն Ալիևը սպառնում է նոր հարձակմամբ: Իսկ եթե Ալիևը նախօրոք «զգուշացումներ» ու «սպառնալիքի» տարափ է անում, ուրեմն, արդեն թուրք-ադրբեջանական դաշինքը նոր պլաններ ունի՝ ընդդեմ Հայաստանի արդեն: Արցախի հարցը համարեցին՝ «լուծված», հիմա հերթը Հայաստանինն է, այսինքն՝ իրենք իրենց ունեցած պլանով առաջ են շարժվում:

Իսկ ի՞նչով հակադարձում Հայաստանի «թավշյա» իշխանությունները ալիևի մշտական դարձած հոխորտանքներին ու արդեն կոնկրետ սպառնալիքին... «Հարևանություն անելու» անշրջելիության պատրաստակամությա՞մբ...

Ինչո՞ւ աշխատանք չի տարվում Հայաստանի գործընկեր պետությունների հետ, որպեսի արագ արձագանքեն ինքնիշխան Հայաստանի նկատմամբ Ալիևի հիստերիկ ջղաձգումներին, շարունակական սպառնալիքներին:

Ինչո՞ւ է լռում Հայաստանի ռազմավարական դաշնակից Ռուսաստանը, որը Արևմուտքին մեղադրում է հետխորհրդային տարածքում ընդլայնվելու մեջ, բայց շարունակում է լռել իր ռազմավարական դաշնակցի դեմ սանձարձակ սպառնալիքների դեպքում:

Ալիևը պատահական չի օգտագործում նման ձևակերպումներ՝ «վերջին նախազգուշացում Հայաստանի», «ռազմական սադրանք» Հայաստանի կողմից, կամ՝ «Հայաստանում ռևանշիստական ուժերը կրկին մեղադրանքներ են հնչեցնում Ադրբեջանի դեմ ու տարածքային պահանջներ ներկայացնում»...

Սրանք ձևակերպումներ են, որոնք, այսպես ասած, հող են նախապատրաստում Բաքվից նոր հարձակման համար, ու սա չհասկանալ, ու սրա վրա աչք փակել՝ նշանակում է կամ համոզվածություն ունենալ, որ սրանք ընդամենը խոսքեր են՝ ադրբեջանական ներքին լսարանի համար, կամ էլ գիտակցված, պայմանավորվածության արդյունքում թույլ տալ, որ թուրք-ադրբեջանական դաշինքը նոր հարձակման դիմի՝ արդեն ընդդեմ Հայաստանի Հանրապետության:

Մետաքսյա Շալունց