Շուռնուխցին ամեն առավոտ տեսնում է թուրքի դեմքն ու ոնց ա թուրքը մտնում իր նախկին տունն ու դուրս գալիս․ Շուռնուխի գյուղապետ

Շուռնուխի գյուղապետ Հակոբ Արշակյանի հետ զրուցել ենք Սյունիքում առկա վիճակի, շուռնուխցիների խնդիրների, ՀՀ վարչապետ Նիկոլ Փաշինյանի՝ Սյունիք այցի ու ստեղծված իրավիճակից դուրս գալու ելքերի մասին․ 

«Դուք տեսաք՝ Փաշինյանը Սյունիք եկավ, բայց իրեն Շուռնուխում դիմավորեցի՞ն։ Փաշինյանը Շուռնուխ մտել ա գիշերով, մի երկու տուն մտել ու գնացել։ Ես, որպես գյուղապետ, չգիտեի, որ նա գալու է Սյունիք։ Շատ հարցեր ունեինք նրան, անսպառ հարցեր,  բայց երևի էդ հարցերի պատասխանները չունի։ Այսօր շուռնուխցին ուզում է, որ  անվտանգության գոտի ստեղծվի, գոնե երկու-երեք կիլոմետր թուրքին գյուղից հանենք, որ գյուղացին, գյուղացու երեխան չտեսնի էդ թուրքի դեմքը, որ ամեն Աստծո առավոտ չտեսնի, ոնց ա թուրքը իրա նախկին տան բակում, կամ տնից դուրս գալիս, կամ տուն մտնում»։

Հարցին՝՝ ինչպե՞ս կբնորոշեք իրավապահ մարմինների վերջին գործողությունները սյունեցիների, համայնքապետերի, գյուղապետերի նկատմամբ, Հակոբ Արշակյանը պատասխանել է․ «Ես ասելու բան չունեմ, Դուք տեսաք «խելացի» մարդիկ ասում էին՝ լավ են անում, որ սյունեցիներին ճնշում են, ազատամարտիկին բարոյապես ու ֆիզիկապես ոչնչացնել։ Սյունիքից ընտրված պատգամավոր Արմեն Խաչատրյանն էլ ասում էր՝ Սյունիքի համայնքապետերը էս պատերազմին չեն մասնակցել, բայց ուզում եմ ասել՝ նա ինձ գիտի, ես նրան ու ինքը իրեն սխալ արտահայտություններ է թույլ տալիս։ Չգիտես ինչու՝ ատամներով պահում է իր խմբակցությանը։ Ասու՞մ են՝ Սյունիքում մեծաթիվ ձայներ են հավաքելու, ընտրությունները կլինեն, կտեսնենք»։

Դիտարկմանը՝ Ալիևների ընտանիքը լուսանկար էր հրապարակել  «Սոսիների պուրակից»՝ ըստ էության՝ Սյունիքից, Արշակյանը նշեց․  «Դե Ալիևն ասում է՝ Զանգեզուրը չտվեցիք խաղաղ, մենք պատերազմով վերցնելու ենք։ Իսկ, երբ մի գյուղացի Հակոբ, ասում է՝ իմ տունը վերցրել են, ասում են՝ օկուպանտ է»։ 

 Հակոբ Արշակյանի խոսքով՝ սյունեցու անվտանգությունն ապահովում է ԱԱԾ-ի սահմանապահ զորքն ու հինգ-վեց ռուս խաղաղապահ․ «Պետք է նախկին սահմանագիծը վերականգնվի, սահմանը ձորկով անցնի, որ գյուղը մնա մեզ։ Մենք միայն դա ենք ուզում՝ թուրքերին էլ պիտի գյուղից հեռվացնենք»։