Ճշմարտության գինը. ինչու է սարսափած Արայիկ Հարությունյանը

Արցախի եւ Հայաստանի կապիտուլանտներ Արայիկ Հարությունյանն ու Նիկոլ Փաշինյանը մարդաորս են սկսել: Բոլոր նրանք, ովքեր համարձակվում են քննադատել կամ քննարկել այս մարդկանց, զրկվում են աշխատանքից, հայտնվում իրավապահների ուշադրության կենտրոնում: Հայկական լրահոսը երեկ դղրդացրեց Բորիս Ավագյանը, ով մինչեւ չարաբաստիկ քննարկումը հանդիսանում էր Արցախի նախագահ Արայիկ Հարությունյանի հատուկ հանձնարարությունների հարցով ներկայացուցիչը, համատեղության կարգով ԱՀ արտակարգ իրավիճակների փոխնախարար, ով, ի պաշտոնե, զբաղվում էր նաեւ գերիների վերադարձի հարցով եւ սերտ շփումներ ունի խաղաղապահների ղեկավար գեներալ Մուրադովի հետ: Իսկ քննարկումը կազմակերպել էին ԱԺ անկախ պատգամավորները, Ավագյանը հրավիրվել էր խորհրդարան, որպեսզի քննարկեին՝ ինչպես արագացնել գերիների վերադարձը, ինչ քայլեր ու գործողություններ են հարկավոր: Ավագյանը պարզապես պատռեց հայաստանյան իշխանությունների դեմքը՝ բացեիբաց հայտարարելով, որ որեւէ մեկը չի զբաղվում այս խնդրով, հակառակը, նրանց գործունեությունը, հայտարարությունները վնասում են գործընթացին:
Ասաց՝ չի ընդունում «Իմ քայլը» խմբակցության որոշ պատգամավորների այն դիրքորոշումը, թե գերիների վերադարձի համար պատասխանատու է ռուսական կողմը, ակնարկեց, որ իշխանությունը, ըստ ամենայնի, որոշակի պայմանավորվածություններ ունի, որ ինչ-որ բան պետք է զիջի գերիների վերադարձի համար, սակայն չի բարձրաձայնում այդ մասին: Աայլ աղմկահարույց հայտարարություններ էլ եղան, ևահա, այս քննարկումից անմիջապես հետո ԱՀ արտակարգ իրավիճակների պետական ծառայությունը հաղորդագրություն տարածեց, որ Բորիս Ավագյանն աշխատանքից ազատվել է հնչեցրած կարծիքների համար։

Նշվում էր, որ նա «իր ասուլիսի և ծառայության անունից հանդես գալու մասին տեղյակ չի պահել վերադաս ղեկավարությանը և խոսել է իր լիազորությունների շրջանակներից դուրս թեմաներից։ Հաշվի առնելով ծառայողին ոչ հարիր պահվածքը և պաշտոնական դիրքի չարաշահումը` Կարեն Սարգսյանի հրամանով Բորիս Ավագյանն ազատվել է զբաղեցրած պաշտոնից։

Մինչ փոխնախարարի պաշտոնից ազատվելը Արայիկ Հարությունյանը շտապեց ձեռքերը լվանալ, նրա խոսնակը հայտարարեց, թե Ավագյանը նախագահի հատուկ հանձնարարությունների գծով ներկայացուցիչ չէ, առհասարակ պաշտոնյա չէ եւ սա պաշտոնական տեսակետ չի կարելի ընդունել: Ավելի ուշ նրան հրավիրեցին ԱԱԾ:

Ինչ խոսք կարելի Նիկոլ Փաշինյանի անձնական օգտագործման ժեկի պետի վակկոտության առիթով մի լավ զվարճանալ, եթե խնդիրը չառնչվեր զգայուն հարցի, մեր նյութը՝ նույնպես: Իսկ այս ամենի մեջ իրականությունը Ավագյանի հայտնած պարզ ճշմարտություններն են, որի մասին թերեւս գիտենք շատերս, դա իշխանության անգործությունից էլ է երեւում, սակայն Նիկոլ Փաշինյանը լինելով կրուտիտի մեծ վարպետ գերիների վերադարձի խնդիրը մեկ բարդում է ընդդիմության, մեկ Ռուսաստանի եւ Մուրադովի, մեկ էլ աստված գիտի, թե ում վրա կբարդի: Եւ ամենակարեւորը՝ իրավիճակն այնքան կրիտիկական է, որ սրա մասին բարձրաձայնում է բարձրաստիճան պաշտոնյան: Միամիտ է կարծել, թե Ավագյանը չէր կանխատեսել, որ նման արձագանք են ստանալու իր հայտարարությունները, բայց սա յուրօրինակ սթափության կոչ է, որը պետք է նախ ընդունեն գերիների եւ անհետ կորածների ծնողները, որոնցից շատերը շարունակում են հույս կապել ու աջակցել Նիկոլ Փաշինյանին՝ իրենց զավակներին պահանջելով ընդդիմադիր գործիչներից: Իսկ Ավագյանին պետք է բոլորս մեր աջակցությունը հայտնենք ու պինդ կանգնենք նրա կողքին, քանի որ մեր ժամանակներում, իսկապես,խիզախների դեֆիցիտ է նկատվում, շատերն են տեղավորվել իրենց կոմֆորտի զոնայում եւ առաջնորդվում են կապիտուլանտի օրակարգով՝ նրա դեմ ընդվզելու, նրան մերկացնելու փոխարեն:

Անի Սահակյան