Դեպի Հայաստան են թափանցել արևադարձային տաք հոսանքներ. նոր կանխատեսումներ

Հայաստանում ներկայիս ջերմային ֆոնը կլիմայական նորմայից բարձր է 8-12 աստիճանով: Եթե փետրվարի 18-ին Երևանում գրանցվի 18-19 աստիճան, ապա վերջին 170 տարվա ընթացքում բացարձակ ցուցանիշով սա կլինի ամենատաք փետրվարի 18-ը: Այդ մասին լրագրողների հետ հանդիպման ընթացքում տեղեկացրել է ՏԿԱԻՆ Հիդրոմետ ծառայության օդերևութաբանության կենտրոնի պետի տեղակալ Գագիկ Սուրենյանը: Փետրվարի 15-ից սկսած Սահարա անապատից դեպի Մերձավոր Արևելք, ապա դեպի մեր հանրապետության տարածք են թափանցել արևադարձային տաք հոսանքներ: Փետրվարի 15-ին և 16-ին օդի ջերմաստիճանն արագորեն բարձրացել է և ամենաբարձր ջերմաստիճանը գրանցվել է Սյունիքի ու Տավուշի հովիտներում: Բագրատաշենում օդի ջերմաստիճանը բարձրացել է մինչև +22 աստիճան, Իջևանում, Դիլիջանում, Կապանում` մինչև +20, իսկ Երևանում գրանցվել է +18 աստիճան: Փետրվարի 19-ին, հյուսիս արևելքից կթափանցեն արկտիկական ցուրտ հոսանքներ, որոնք մեծ ազդեցություն կունենան Լոռիի, Տավուշի, Սյունիքի, Արցախի ջերմային ֆոնի վրա: Այս հատվածներում կսպասվի օդի ջերմաստիճանի նվազում 8-10 աստիճանով: Իսկ մյուս շրջաններում և մայրաքաղաքում կնվազի 4-5 աստիճանով: Այդ ջերմային ֆոնը կպահպանվի մինչև փետրվարի 21-ը: Փետրվարի 23-24-ին Արարատյան դաշտում կգրանցվի +15- +16,առանձին տարածքներում նույնիսկ +17 աստիճան: Տավուշի հովտային հատվածներում` հատկապես Կապանում, Մեղրիում, Ագարակում, Իջևանում, Բագրատաշենում, մինչև 17-20 աստիճան տաքություն, ինչը կրկին նորմայից բարձր կլինի 7-11 աստիճանով: Լուրջ տեղումներ սպասվում են միայն փետրվարի 20-ին, իսկ 21-ին թույլ տեղումներ հնարավոր են արևմտյան շրջաններում: