Բայրաքթարները «հասան» Կրեմլ

Մոսկվան ողջունում է Երևանի և Բաքվի միջև բարիդրացիական հարաբերությունների hաստատման նախաձեռնությունը, երեկ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ պատասխանելով հարցին, թե արդյոք Ռուսաստանը պատրաստ է միջնորդ դառնալ Հայաստանի և Ադրբեջանի միջև խաղաղ պայմանագրի կնքման հարցում: «Հուսալի հիմք է 2020թ. նոյեմբերի 9-ին և 2021թ. հունվարի 11-ին Հայաստանի, Ադրբեջանի և Ռուսաստանի առաջնորդների կողմից ձեռքբերված համաձայնությունները: Մենք պատրաստ ենք հետագայում աջակցել այդ գործընթացին: Դեռ պետք է հաղթահարել շատ դժվարություններ, խոչընդոտներ: Շեշտը դնում ենք կայունության, ամուր տնտեսական զարգացման վրա: Հուսով ենք, որ կշարժվենք հարաբերությունների կարգավորման, վստահության մթնոլորտի ստեղծման ուղղությամբ»,-նշել է նա:

Մարիա Զախարովան հավելել է. «Մենք շեշտը դնում ենք այն բանի վրա, որ Հարավային Կովկասի կայունությունն ու կայուն տնտեսական զարգացումը բխում են այդ տարածաշրջանում Ռուսաստանի բոլոր գործընկերների շահերից: Մենք ակնկալում ենք, որ գործնական հարցերում կողմերը կձգտեն ձեռնարկել քայլեր, որոնք ուղղված են հարաբերությունների կարգավորմանը և վստահության մթնոլորտի, ոչ թե նոր բաժանարար գծերի ստեղծմանը»:

Մոսկվան գրեթե ամեն շաբաթ շեշտում է, որ Ռուսաստանը պատրաստ է օժանդակություն ցուցաբերել Ադրբեջանի և Հայաստանի միջև կայուն խաղաղության և բարիդրացիական հարաբերությունների հաստատմանն ուղղված նախաձեռնություններին: Թեև Մոսկվան էլ գիտակցում է, որ Ադրբեջանը և Հայաստանը դեռ գտնվում են փոխադարձ վստահության անհրաժեշտ մակարդակի հաստատման, և իրականում առաջընթացի հասնելու համար, իրականում որևէ հիմք չկա:

Իսկ ինչ հիմք կարող է լինել այսօր թուրք-ադրբեջանական դաշինքի գոյության պայմաններում, երբ ակնհայտ է, որ Ալիևին ուղղորդում է Էրդողանը, որն արդեն տարածաշրջանային տեր ու տիրակալ է իրեն պատկերացնում:

Ու հիմա թեև ռուս-թուրքական հարաբերությունները համարվում են բարեկամական՝ այնուամենայնիվ Մոսկվան արդեն սկսել է որոշակի հայտարարություններով Թուրքիայի իշխանություններին ազդակներ ուղղել, հասկացնել տալով, որ մեղմ ասած՝ Անկարայի քայլերը սկսել են նյարդայնացնել Կրեմլին:

Նույն Մարիա Զախարովան նախօրեին հայտարարել է, որ Ուկրաինային զենքի մատակարարումը, այդ թվում ՝ թուրքական անօդաչու թռչող սարքերի, չի նպաստում այս երկրում իրավիճակի կարգավորմանը: Նա նկատել է, որ Մինսկի համաձայնագրերը «ճանապարհային քարտեզ» են Դոնբասում խաղաղության և բնականոն կյանքի հասնելու համար, և դրանցում ոչինչ ասված չէ Ուկրաինա զենք մատակարարելու մասին: «Զենքի մատակարարումը, մեծ հաշվով, հակասում է կողմերի ստանձնած այն պարտավորություններին, որոնք Կիևը չի կատարում», - ասել է Զախարովան:

ՌԴ ԱԳՆ պաշտոնական ներկայացուցիչը հիշեցրել է Լավրովի՝ ավելի վաղ արած հայտարարությունը՝ չթեժացնել Կիևի ռազմական նկրտումները:

Մետաքսյա Շալունց