Փաշինյանը հերթական «չափալախը» կստանա

Նիկոլ Փաշինյանի խորհրդարանական ելույթից հետո այլեւս հստակ է՝ այս մարդը ոչ բարոյականություն ունի, ոչ սրբություն, ոչ էլ նամուս ու թասիբ: Նա սեփական իշխանությունը պահելու համար կարող է մարդկանց աչքերի մեջ նայելով ստել, մանիպուլացիաներ անել, հորինել պատմություններ եւ վերջապես կատվի նման ցանկացած բարձրությունից ցած նետվելիս կանգնել ոտքերի վրա ու փորձել ամեն ինչի մեղքը բարդել բոլորի վրա, միայն չընդունել, որ ինքը եւս կարող է սխալվել: Նա պատրաստ է ուրանալ սրբություններին, ծնողներին, զավակներին, ամեն մեկին եւ ամեն բան, եթե դա է պահանջում իր անձնական շահը: Օրինակ իր հոգեւոր հոր մասին այսօր գաղտնիք բացեց, պատմելով, որ 2018-ին Լեւոն Տեր-Պետրոսյանը իր հետ հանդիպմանն ասել է, որ պետք է հողերը տաս: Սպասվում էր, որ առաջին նախագահը, ով ամենաճշգրիտ դիագնոզն է տվել Փաշինյանին՝ անվանելով նրան ազգակործան պատուհաս, պետք է հաջորդ չափալախը տա այս պատուհասին, բայց ոչ նա հարկ չի համարում գլուխ դնել ազգակործան պատուհասի հետ, քանի որ կարծում է ժողովուրդեը երբ էլ լինի, չի ներելու նրան:

Մեղադրանքների տարափ տեղաց նաեւ երրորդ նախագահ Սերժ Սարգսյանի գլխին, թե նա տապալել է բանակցությունները եւ պետությունը պատերազմի շեմին կանգնած ժառանգություն թողել, պարզվեց, որ Սերժ Սարգսյանն էլ է անիմաստ համարում պատասխանել Նիկոլ Փաշինյանին <<քանզի նրա ցինիկ ստերն ու կեղծիքները բացահայտող բազմաթիվ փաստեր, այդ թվում՝ դիվանագիտական, ռազմական, քաղաքական ոլորտներում, վաղուց հանրության սեփականությունն են և հեշտությամբ հասանելի են համացանցում>>: Քոչարյանի գրասենյակն էլ բացառություն չէր: ՀՀ երկրորդ նախագահի գրասենյակից հյտնեցին, որ միակ զգացողությունը, որն առաջացավ իշխանությունը կորցնողի խուճապահար այս ելույթը լսելիս, խղճահարությունն էր։

Նախկին նախագահներից բացի Քոչարյանը թիրախավորեց նաեւ ՀՀ ԶՈՒ ԳՇ նախկին պետ Օնիկ Գասպարյանին, ասաց, թե վերջինիս նոյեմբերի 17-ի հայտարարությունը, թե անհրաժեշտ է 2-3 օրվա ընթացքում պատերազմը կանգնեցնել, իրականության հետ որևէ աղերս չունի։ Մինչդեռ անցած տարվա դեկտեմբերին Փաշինյանը չէր հերքում այդ զգուշացման մասին:

«Այլ բան այս բարոյազուրկ ստախոսներից, ըստ էության, չէր կարելի սպասել։ Ես կրկին հաստատում եմ նոյեմբերի 17-ին իմ կողմից կատարված հայտարարությունը։ ՀՀ վարչապետը եւ ԱԽ քարտուղարն անամոթաբար խեղաթյուրում են իրականությունը, եւ օգտագործելով իշխանական լծակները, հանրությանը մոլորության մեջ են մտցնում։ ԱԽ նիստերի արձանագրությունները կարող են կեղծվել եւ ներկայացվել իրենց համար ցանկալի տարբերակով։ Ճշմարտությունն օբյեկտիվորեն կարող է բացահայտվել միայն գործող վարչապետի հրաժարականի եւ իշխանափոխության դեպքում։ Միայն այդ ժամանակ հնարավոր կլինի պարզել ողջ իրականությունը» , լրատվամիջոցներին փոխանցել է Գասպարյանը: Մեր տեղեկություններով՝ նա այդ նիստի ձայնագրությունն էլ ունի եւ փոխանցել է ռուսական հատուկ ծառայություններին: Չի բացառվում, որ առաջիկայում հենց Մոսկվայից լսվի պատասխանը եւ Փաշինյանը ստանա հերթական հուժկու հարվածը:

Անի Սահակյան