«Իսկանդերի» 2 բեկոր՝ Պուտին-Ալիև հարաբերություններում. Մթնոլորտը սրվում է

Ադրբեջանի նախագահ Իլհամ Ալիևն, ինչպես ասում են, չդիմացավ: Արդեն պաշտոնապես Բաքուն Մոսկվայից Շուշիում հայտնվեց «Իսկանդերի» հրթիռի առիթով պարզաբանում է սպասում: Նա ասել է, որ ցանկանում է պարզել, թե որտեղից է Հայաստանը ստացել «Իսկանդեր Մ» տեսակի հրթիռներ:

Ալիևի պնդմամբ, այդ հրթիռներից մեկը Ղարաբաղյան երկրորդ պատերազմի ընթացքում արձակվել է Շուշիի ուղղությամբ: «Որտեղի՞ց այդ հրթիռները, դրանք հայերի մոտ չպետք է լինեին, դա արդեն ինքնին հստակ ապացույց է, Հայաստանի ռազմական հանցագործության ապացույց, և մենք ցանկանում ենք իմանալ, թե ինչպես է այդ մահաբեր զենքը Հայաստանի ձեռքում հայտնվել: Մենք դեռևս չենք ստացել այդ հարցի պատասխանը, սակայն կստանանք»,- հայտարարել է Ալիևը` ելույթ ունենալով Բաքվում «Ռազմական ավարի ցուցահանդեսի» բացմանը:

Նա պնդել է նաև, թե «Իսկանդեր» տեսակի հրթիռը կիրառվել է «Շուշիի ազատագրումից հետո»: «Մենք ունենք անհրաժեշտ չափով տեղեկատվություն, մենք պաշտոնական բացատրություն ենք սպասում»,- ասել է Ալիևը:

Ինչպես հայտնի է, ըստ ռուսական կողմի տրամադրության տակ եղած տեղեկատվության, «Իսկանդեր» տեսակի հրթիռներ Ղարաբաղյան երկրորդ պատերազմում չեն կիրառվել: «Կրեմլը չունի տեղեկություններ առ այն, թե որտեղից են գտնվել այդ հրթիռի բեկորները, որոնք, իբրև թե, ադրբեջանական կողմն է հայտնաբերել»,- ապրիլի 2-ին ասել է ՌԴ նախագահ Վլադիմիր Պուտինի խոսնակ Դմիտրի Պեսկովը:

Միևնույն ժամանակ, Ալիևը «տարօրինակ» է որակել այդ հրթիռների օգտագործման մասին պաշտոնական Երևանի հայտարարությունները: «Նրանք կամ խոսում են չպայթած հրթիռների մասին, կամ ասում են, որ դա գաղտնիք է: Նշանակում է, որ դրանք, ի վերջո, օգտագործվել են: Մենք պաշտոնական արձագանքի ենք սպասում Երևանից: Ես ձեզ ավելին կպատմեմ, մենք ունենք բավարար տեղեկատվություն, բայց սպասում ենք պաշտոնական պարզաբանումների», - հավելել է Ալիևը:

Ադրբեջանի նախագահը, որը փետրվարի վերջին հրավիրված մամլո ասուլիսում հայտարարում էր, թե չեն ֆիքսել «Իսկանդերի» հարված, փաստորեն, կարծիքը ոչ միայն փոխել է, այլև նույնիսկ Մոսկվայից է բացատրություն պահանջում:

Հայաստանից, նախկին զինվորականների մակարդակով հայտարարվել է, որ կիրառվել են Իսկանդեր, բայց ամբողջ հարցն այն է, որ Բաքվի «գտած» բեկորները «Մ» տեսակի են, որոնք միայն ունի Ռուսաստանը:

Հետևաբար, Բաքուն իր պահվածքով ռուսական կողմից ցանկանում է ստանալ պատասխան՝ ինչպե՞ս է ռուսական կողմը կիրառել Ադրբեջանի նկատմամբ այդ հրթիռները՝ Հայաստանի՞ց, թե՞ Ռուսաստանի տարածքից: Նկատենք, որ ռուսական փորձագիտական հանրությունն էլ համարում է, որ այդ հրթիռների բեկորները հայտնվել են Շուշիում Սիրիայից՝ Թուրքիայի միջոցով:

Ալիևի պահվածքն այս առումով կարելի է բավական սանձարձակ որակել: Ըստ ամենայնի ռուս-ադրբեջանական նոր լարման պատվիրատուն էլ Էրդողանն է: Ի դեպ պատահական չէր, որ հենց երեկ Լավրովը Թուրքիային՝ այլ թեմայով բավական թափանցիկ ակնարկ արեց:

Թուրքիան և այլ երկրներ չպետք է սնեն Ուկրաինայի ռազմատենչ տրամադրությունները. հայտարարել է Ռուսաստանի արտգործնախարար Սերգեյ Լավրովը՝ մեկնաբանելով Անկարայի կողմից Կիևին Bayraktar TB2 անօդաչու թռչող սարքերի վաճառքը, գրում է «Կոմերսանտը»: «Ես անմիջապես կասեմ, որ մենք բոլոր պատասխանատու երկրներին, որոնց հետ շփվում ենք, Թուրքիան դրանցից մեկն է, խստորեն խորհուրդ ենք տալիս վերլուծել իրավիճակը, Կիևի ռեժիմի մշտական ռազմատենչ հայտարարությունները և զգուշացնում ենք նրանց՝ չսնուցել այդ ռազմատենչ տրամադրությունները»,- ասել է ռուս նախարարը Կահիրեում Եգիպտոսի արտգործնախարար Սամեհ Շուքրիի հետ բանակցությունների արդյունքներով կայացած մամլո ասուլիսի ժամանակ:

Մետաքսյա Շալունց