Արցախում կռված վարձկան-ահաբեկիչները Թուրքիայի կողքին էին, բայց՝ սոված են

Օրերս ամերիկացի անկախ լրագրող Լինդսի Սնելը թվիթերյան իր էջում հրապարակել էր զրույց սիրիացի վարձկանների հետ, որոնք կռվել են Լեռնային Ղարաբաղում վերջին պատերազմի ընթացքում, սակայն չեն վարձատրվել։ Լրագրողը զրուցել էր նաև սպանված վարձկաններից մեկի քրոջ հետ, որն ապրում է Թուրքիայում սիրիացի փախստականների համար նախատեսված ճամբարում։

Նա պատմել էր, որ իր ընտանիքը ևս չի վճարվել։ Նա նաև հայտնել էր, որ «Սուլթան Մուրադ» խմբավորման անդամ հանդիսացող իր եղբայրը զոհվել է Ջաբրայիլում՝ հայտնի հրամանատարներից մեկի կողքին կռվելով։ Սպանված վարձկանը, քրոջ խոսքով, Ադրբեջանում է եղել մեկ ամիս, սակայն եղբոր մահից հետո իրենց չեն վճարել, ինչպես չեն վճարել բազմաթիվ այլ սպանվածների հարազատների։

Ամերիկացի լրագրողը նաև տեսանյութ էր հրապարակել, որտեղ Թուրքիայի աջակցությունը վայելող «Սուլթան Սուլեյման» խմբավորման վարձկանները բողոքում են, թե իրենց հրամանատար Աբու Ամաշն իրենց չի վճարել Ղարաբաղում կռվելու համար։ «Մենք Թուրքիա պետության կողքին կռվել ենք Ղարաբաղում։ Մենք սպանվել ենք ու վիրավորվել։ Աբու Ամաշը գողացել է մեր աշխատավարձերը, մարդիկ սովից մահանում են»,- լրագրողին պատմել են վրդովված զինյալները։

Լրագրողն իր հերթին նկատում է, որ մինչ օրս Թուրքիան ու Ադրբեջանը դեռ հերքում են, թե վարձկան զինյալները կռվել են Լեռնային Ղարաբաղում։

Մինչ օրս իշխանական, փորձագիտական ու լրագրողական մակարդակով Թուրքիայի աջակցությամբ սիրիացի վարձկան ահաբեկիչներին ղարաբաղյան տարածաշրջան բերելու փաստը հերքող ադրբեջանական կողմն, իրականում, կարող է կանգնել լուրջ խնդիրների առջև:

Ալիևը մի կողմից հայ ռազմագերիներին չի վերադարձնում, մյուս կողմից հերքում է Լեռնային Ղարաբաղի պատերազմում թուրքական ահաբեկչական խմբավորումների ներկայությունը:

Ի դեպ, Եվրոպական խորհրդարանում ապրիլի 12-ին տեղի կունենա Ադրբեջանից հայ գերիների անհապաղ ազատ արձակման և վերադարձի հարցերով քննարկում: Ինչպես տեղեկացնում է Հայաստանի մարդու իրավունքների պաշտպան Արման Թաթոյանը՝ զեկուցողներն են լինելու Եվրախորհրդարանում ԵՄ-Հայաստան բարեկամության խմբի ղեկավար Լուկաս Ֆուրլասը, Եվրախորհրդարանում Հարավային Կովկասի հետ հարաբերությունների հարցերով պատվիրակության ղեկավար Մարինա Կալյուրանդը, ՀՀ մարդու իրավունքների պաշտպան Արման Թաթոյանը և Հայ դատի Եվրոպայի գրասենյակի գործադիր տնօրեն Հեղինե Էվինյանը:

Հիշեցնենք, որ, ընդհանուր առմամբ մինչ օրս Ադրբեջանից Հայաստան է վերադարձվել 69 գերի, այդ թվում՝ քաղաքացիական անձինք։ Իսկ Հայաստանն Ադրբեջանին է փոխանցել 15 անձի, նրանց թվում ոչ միայն ռազմագերիներն են, այլև Արցախում երեխայի սպանության ու այլ հանցագործությունների համար դատապարտված ադրբեջանցիներ Շահբազ Գուլիևն ու Դիլհամ Ասկերովը։

Փաշինյան-Պուտին վերջին հանդիպմանն արձանագրվեց, որ եռակողմ հայտարարության նշյալ դրույթը չի իրականացվում, հայ ռազմագերիները շարունակվում են պահվել Ադրբեջանում, իսկ պաշտոնական Բաքուն կրկին օրերս հայտարարեց, որ ադրբեջանական կողմը բոլոր ռազմագերիներին վերադարձրել է, իսկ պահվող անձինք իրենց մոտ են հայտնվել նոյեմբերի 9-ի եռակողմ հայտարարության ստորագրումից հետո, և որ Բաքուն նրանց հանցագործ է համարում:

Այսինքն՝ Պուտին-Փաշինյան հանդիպումից հետո, ապա՝ Պուտին-Ալիև հեռախոսազրույցից հետ պաշտոնական Բաքուն երկրի արտգործնախարարի մակարդակով արձանագրեց, որ ռազմագերիներին չեն վերադարձնելու:

Մետաքսյա Շալունց