Պատգամավորների սիրտը ծով է ուզում, էկզոտիկ հանգիստ

Այսօր Ազգային ժողովը ամբողջությամբ ընդունեց «Պետական գույքի մասնավորեցման 2017-2020 թվականների ծրագրի մասին» բավականին աղմկոտ օրենքի նախագիծը, որով մասնավորեցման է ներկայացվում 47 օբյեկտ, որոնցից 23-ը ժառանգություն է մնացել նախորդ՝ 2006-2007թթ. ծրագրից: Մյուս 24-ը նոր մասնավորեցման ներկայացված օբյեկտներ են: Նախագիծն ԱԺ-ում ներկայացնող՝ պետգույքի կառավարման վարչության պետ Արման Սահակյանը երեկ լրագրողների հետ զրույցում տեղեկացրեց, որ այդ օբյեկտների մի մասը, հատկապես նախորդ ծրագրից մնացածները, աշխատող ընկերություններ չեն: Ուշագրավ է, որ մասնավորեցման է ներկայացված մեկ տասնյակից ավելի առողջապահական հիմնարկներ։ Դրանցից հայտնի են հատկապես՝ Երևանում գտնվող «Ֆանարջյանի անվան ուռուցքաբանության կենտրոնը», «Ճառագայթային բժշկության և այրվածքաբանության գիտական կենտրոնը», «Մաշկաբանության և սեռավարակաբանական բժշկագիտական կենտրոնը», «Վնասվածքաբանության և օրթոպեդիայի գիտական կենտրոնը» և հատկապես «Ռադիոիզոտոպների արտադրության կենտրոնը»:Այս հիվանդանոցները գործող եւ կարելի է ասել մասնագիտացված անփոխարինելի հիվանդանոցներ են։ Սակայն ինչպես Պետգույքի կառավարման մարմնի ղեկավար Արման Սահակյանն է պնդում՝ դրանք չեն կարողացել գոնե մի փոքր շահութաբերություն ապահովել։ Իհարկե դեռ հարց է , թե ինչո՞ւ պետությունը չի վերահսկել, որ իրեն պատկանող կամ պետական բաժնեմաս ունեցող ընկերությունների կառավարումն ավելի արդյունավետ լինիմ այլ հասել է վտանգավոր՝ մասնավորեցման քայլին, որից հետո այդ հաստատությունների ապագան մշուշոտ է, գուցե նրան տեղում այլ օբյեկտներ խոյանան, պետական շինությունները անշուշտ կդառնան որեւէ օլիգարխի սեփականություն, ով էլ իր ճաշակին համապատասխան կփոխակերպի այդ շինությունները։ Ինչեւէ, իշխող մեծամասնությունը ՀՅԴ-ի հետ անցկացրեց մեկ այլ ոչ պակաս վտանգավոր նախագիծ, խոսքը հողերի խոշորացման վերաբերյալ նախագծի մասին է։ Ծառուկյան դաշինքը դեմ քվեարկեց, Ելք-ը չմասնակցեց քվեարկությանը։ Ելք դաշինքի պատգամավոր Էդմոն Մարուքյանը հայտարարեց, որ սկզբում աջակցել է համայնքների խոշորացման նախագծին, սակայն այս ընթացքում որեւէ առաջընթաց չկա, մասնավորապես Լոռու մարզում. «Կառավարությունը ոչ մի արդյունավետ քայլ չի արել, ու լավ գաղափարները միշտ ապականել են ու փչացել են. հիմա մենք լավ գաղափարին որեւէ կերպ չենք կարողանում աջակցել։ Բերեք հաջողության պատմություն. բավականին ժամանակ է անցել նախորդ խոշորացումից»: Մինչ այս աղմկոտ նախագծերի շուրջ քննարկման վերջին ակորդն էր տրվում, ԱԺ միջանցքներում ՀՀԿ-ական պատգամավոր Սամվել Ալեքսանյանը շարունակում էր իր ներկայացումները, նա ամենայն լրջությամբ հաստատեց իր փեսա ՀՀԿ-ական պատգամավոր Կորյուն Նահապետյանի հայտարարությունը, ասելով՝, որ հենց նրա շնորհիվ է նաև ինքն այդքան շատ ձայներ ստացել խորհրդարանական ընտրություններում: «Ճիշտ ա ասում Կորյուն Նահապետյանը, ամեն ինչով ինձ օգնել ա»,- ասաց Ալեքսանյանը: Հարցին, թե այսինքն՝ Կորյուն Նահապետյանի խա՞թր են իրեն ձայն տվել, նա պատասխանեց. «Ես մի քիչ խաթր ունեմ ժողովրդի մոտ, բայց Կորյունը շատ ունի»: Նշենք, որ հաջորդ շաբաթ եւս արտահերթ է հրավիրվելու, ԱԺ նախագահ Արա Բաբլոյանը քվեարկություններից հետո պատգամավորներին գուժեց, որ չնախապատրաստվեն արձակուրդներին, դեռ պետք է աշխատել, այս հայտարարությունը սառը ցնցուղ եղավ նորընտիրներից շատերի համար։ Դահլիճից դուրս գալով շատերը չկարողացան թաքցնել վրդովմունքը, նրանց սիրտը ծով է ուզում, էկզոտիկ վայրեր։ Անի Սահակյան