Ժողովուրդը երբեք չի ներում դավաճաններին

ՀՀ քրեական օրենսգրքի 300.1-րդ հոդվածի՝ Սահմանադրությանը համապատասխանության հարցը որոշելու գործով Սահմանադրական դատարանի որոշման վերաբերյալ իշխող ուժի ներկայացուցիչների մեկնաբանությունները որևէ քննադատության չեն դիմանում և պարզապես բացահայտում են 2020 թվականի ապօրինի սահմանադրական փոփոխությունների միջոցով Սահմանադրական դատարանի կազմը փոխելու իրական շարժառիթները։ Ահավասիկ, իշխանության հանցագործության մասին հաղորդում է տվել ամենաագրեսիվ ուսապարկ Անդրանիկ Քոչարյանը՝ ներողություն խնդրելով իրենց ընտրած դատավորների համար, որոնք չեն արդարացրել իրենց սպասելիքները, քանզի ՍԴ-ն միաձայն է կայացրել հայտնի որոշումը.«ՀՀ նախկին իշխանությունները դատական համակարգ են ստեղծել, որը հնարավոր չէ փրկել նույնիսկ հեղափոխությամբ: Սահմանադրական դատարանի դատավորները հասարակությանը զրկել են ճշմարտությունն իմանալու հնարավորությունից, եւ չեն հասկացրել՝ մարտի 1-ի գործը լուծվել է, թե՞ ոչ: «Իմ քայլը» իշխող դաշինքը Սահմանադրական դատարանի երեք դատավոր է ընտրել, իսկ մնացած հինգը «նախապատրաստվել էին» դեռ ՍԴ նախկին նախագահ Հրայր Թովմասյանի նախագահության օրոք»,- լրագրողների հետ զրույցում ասել է Քոչարյանը ՝ մեկնաբանելով Սահմանադրական դատարանի որոշումը Քրեական օրենսգրքի 300.1 հոդվածը Սահմանադրությանը հակասող ճանաչելու մասին:

«Ինձ մոտ տպավորություն է, որ եթե Ռոբերտ Քոչարյանին մեղադրեին խուլիգանության մեջ, այս հոդվածը կհայտարարվեր հակասահմանադրական: Սա է այդ դատավորների տրամաբանությունը: Սահմանադրական դատարանը պաշտպանում էր Հայաստանի երկրորդ նախագահի շահերը, իսկ տուժածների շահերը չպաշտպանված մնացին»,- հավելել է պատգամավորը ու ներողություն խնդրել իրենց սխալ ընտրության համար:

Եւ, ուրեմն, ստացվում է, որ ուսապարկերի այս իշխանությունում չկա գեթ մեկ խելքը գլխին մարդ, ով երեք տարվա ընթացքում գոնե կփորձեր հասկանալ, թե ինչն ուր է եկել, ինչ պարտավորություններ ունի, ինչ փոխհարաբերությունների մեջ է գտնվում իշխանության մնայալ ճյուղերի հետ եւ այլն: Կարծում են, որ մի քանի անգամ, մի քանի օրենքի ընթերցանությունը գոնե մոտավոր պատկերացում կտար այս մարդկանց, իհարկե, չենք բացառում, որ ոչ թե մի քանի, այլ մի քանի տասնյակ անգամ են գուցե կարդացել, բայց չեն կարողացել հասկանալ, թե ով ու բարեկամն է: Մեծ հաշվով, եթե Նիկոլի իշխանության սահմանադրության մեծն գիտակը Վահագն Հովակիմյանն է, ապա կարելի է հասկանալ մյուսների պատկերացումները Սահմանադրության եւ օրենքների հարցում:
Ի՞նչ է նշանակում մենք սխալ դատավորներ ենք ընտրել, քանի որ նրանք ի օգուտ երկրորդ նախագահ Ռոբերտ Քոչարյանի են որոշում կայացրել։
Այսինքն, այս կամ այն դատավորի ընտրությունը սխալ է, եթե կոնկրետ գործով այդ դատավորն իրենց համար ոչ ցանկալի որոշո՞ւմ է կայացնում։
Սա ուղիղ եւ բացահայտ խոստովանություն է առ այն, որ ուսապարկերը դատավորներ ընտրելով կամ հակաիրավական ճանապարհով հեռացնելով նրան, իշխող ուժը փորձում է բացառապես միջամտել կոնկրետ գործով արդարադատության իրականացմանը։
Սակայն ամենազարհուրելին դա չէ, այլ այն, որ Արցախի 75%-ը տոկոսը թուրքին հանձնած, Շուշին և Հադրութը կորցրած, շուրջ հինգ հազար զոհ, հազարավոր անհետ կորած ու գերեւարված, երկիր ավերած իշխանության ներկայացուցիչը ներողություն է խնդրում ոչ թե այս աղետի, տնաքանդության, ողբերգության համար, որ վերջին երեսուն տարվա ձեռքբերումները երեք տարում հողին հավասարեցրին, հիմա էլ Հայաստանի ինքնիշխանությունն են վտանգի տակ դրել, այլ ներողություն է խնդրում
«սխալ դատավորներ» ընտրելու և Ռոբերտ Քոչարյանի գործի կարճման համար։ Ժողովուրդը գուցե ների այդ սխալ ընտրության համար, բայց դավաճաններին ոչ հայրենիքը, ոչ էլ ժողովուրդը երբեք չի ներում:

Անի Սահակյան