Ալիևը հարվածեց Պուտինի հեղինակությանը. Հետևանքները ծանր կլինեն

Ռուսաստանի նախագահ Վլադիմիր Պուտինը երեկ հեռախոսազրույց էր ունեցել Ադրբեջանի նախագահ Իլհամ Ալիևի հետ: Կրեմլի տարածած հաղորդագրության համաձայն՝ նրանք քննարկել են Լեռնային Ղարաբաղի շուրջ իրավիճակը, դրա հետագա կարգավորումը՝ համաձայն 2020թ. հունվարի 9-ի և 2021թ. հունվարի 11-ի Ռուսաստանի, Ադրբեջանի և Հայաստանի առաջնորդների հայտարարությունների: Մասնավորապես, մանրամասն քննարկվել է տարածաշրջանում խաղաղության, անվտանգության և աստիճանական սոցիալ-տնտեսական զարգացման ապահովման հարցը, ինչպես նաև տրանսպորտային հաղորդակցությունների վերականգնման աշխատանքների ընթացքը:

Ընդ որում, հաշվի են առնվել ապրիլի 7-ին Մոսկվայում բարձր մակարդակով անցկացված հայ-ռուսական բանակցությունների արդյունքները:

Կողմերը պայմանավորվել են ակտիվացնել շփումները տարբեր ձևաչափերով:
Հիշեցնենք, ապրիլի 7-ին Պուտինը Մոսկվայում ընդունել էր Հայաստանի վարչապետ Նիկոլ Փաշինյանին: Հիմա Պուտինն ու Ալիևը, փաստորեն, կարևորել էին Փաշինյանի հետ հանդիպմանը քննարկված թեմաները, ասել է թե՝ գերիների վերադարձի թեման:

Ու հանկարծ, երեկ ինքնաթիռ է վայրէջք կատարում, որում ոչ մի հայ ռազմագերի էլ չի վերադառնում...

Ռազմագերիների հարցը լուծված է, այդ թեման փակված է, երեկ հայտարարում է Ադրբեջանի արտգործնախարար Ջեյհուն Բայրամովը Իսլամական համագործակցության կազմակերպության գլխավոր քարտուղարի հետ համատեղ մամուլի ասուլիսում՝ նշելով, որ նոյեմբերի 10-ից հետո ադրբեջանական կողմը Հայաստանին է փոխանցել ավելի քան 70 ռազմագերի, իսկ Հայաստանը վերադարձրել է 12 ռազմագերի: «Այս պահին Հայաստանի բարձրացրած հարցն առաջ է եկել նոյեմբերի 10-ից մոտ մեկ ամիս հետո»,- ասել է Բայրամովը՝ հավելելով, որ հայտարարությունից հետո հայկական կողմի «սադրանքի» հետևանքով զոհվել է 4 ադրբեջանցի զինծառայող, իսկ մեկ քաղաքացիական անձ վիրավորվել է:

Նա ընդգծել է, որ Ադրբեջանի իրականացրած գործողության հետևանքով «հայ զինվորականների այդ խումբը չեզոքացվել է, իսկ 62 մարդ ձերբակալվել է»: «Քննությունը պարզել է, որ այդ մարդիկ տեղակայվել են Ադրբեջանի տարածքում նոյեմբերի 26-ին: Նրանք գրեթե բոլորը Հայաստանի Շիրակի մարզից են: Նրանք հանցագործություն են կատարել»,- ասել է նա: Բայրամովը նշել է, որ ըստ նոյեմբերի 10-ի հայտարարության՝ հայ զինծառայողները պետք է «լքեին Ադրբեջանի տարածքը», «բայց մենք նախկինի պես տեսնում ենք, որ Հայաստանը փորձում է զորքեր տեղակայել ադրբեջանական տարածքներում»: «Ադրբեջանական կողմը այդ կապակցությամբ տեղեկացրել է համապատասխան միջազգային կազմակերպություններին»,- ասել է Բայրամովը:
Գերիների հետ վերադարձը, ցավոք, կրկին հետաձգվում է, քանի որ հակառակորդի կողմից նոյեմբերի 9-ի եռակողմ հայտարարության 8-րդ կետը ի կատար չի ածվում, ինչը հետպատերազմական մարդասիրական գործընթացի կոպիտ խախտում է։ «Արմենպրես»-ին հայտնեցին ՀՀ փոխվարչապետ Տիգրան Ավինյանի գրասենյակից։

«Բանակցությունները ռուսական կողմի միջնորդությամբ շարունակվում են, և հույս ունենք, որ ադրբեջանական կողմը ի վերջո կհարգի ստորագրված հայտարարությունը ու կյանքի կկոչի հումանիտար պայմանավորվածությունը՝ այդպիսով նպաստելով տարածաշրջանում կայունության հաստատմանը»,- ասված է մեկնաբանության մեջ։
Ակնհայտ է, որ Էրդողանն ու Ալիևը ինչ-որ բանից դժգոհ են ու դա արտահայտվում է ընդդեմ ռուսական ջանքերի կոնկրետ գործողություններով: «Բոլորը բոլորի դեմ» սկզբունքով գերիների վերադարձը՝ պայմանավորվածություն է, որը փաստորեն ադրբեջանական կողմը դարձրել է առևտրի առարկա:

Ռուսական կողմին դատարկ ինքնաթիռով Երևան ուղարկելը կարող է, իհարկե, ծանր հետևանքներ ունենալ Ալիևի համար: Իսկ թուրք-ադրբեջանական տանդեմի դժգոհություններն էլ իրենց հերթին կարող են արտահայտվել տարբեր ձևերով:

Մետաքսյա Շալունց