Ով է դատվելու՝ Արայիկ Հարությունյանը, թե՞ Նիկոլ Փաշինյանը

Նախօրեին հայտնի դարձավ, որ Արցախի Հանրապետության գլխավոր դատախազությունը պաշտոնեական լիազորությունների չարաշահման հատկանիշներով քրեական գործ է հարուցել Շուշիի համայնքի ղեկավար Արծվիկ Սարգսյանի կողմից՝ պետական աջակցության շահառուների ցուցակներում ակնհայտ կեղծ տեղեկություններով թվով 7 քաղաքացիների տվյալներ ներառելու դեպքի կապակցությամբ:
Ըստ դատախազության՝ «Արծվիկ Սարգսյանը զբաղեցնելով Արցախի Հանրապետության Շուշիի համայնքի ղեկավարի պաշտոնը, ունենալով ԱՀ օրենսդրությամբ սահմանված կարգով իշխանության ներկայացուցչի գործառույթներ իրականացնելու լիազորություններ, հանդիսանալով՝ պատերազմական գործողությունների հետեւանքով Ադրբեջանի վերահսկողության տակ անցած համայնքներում հաշվառված կամ փաստացի բնակված քաղաքացիների աջակցության ծրագրի Շուշիի վարչակազմի որոշմամբ ստեղծված հանձնաժողովի նախագահ պաշտոնեական դիրքն օգտագործելով, անձնական այլ շահագրգռվածությունից ելնելով, ֆինանսական աջակցություն ցույց տալու կարեկցանքով պայմանավորված եւ հանձնաժողովի անդամների օժանդակությամբ, համայնքի շահառուների ցուցակներում ներառել է թվով 7 քաղաքացիների վերաբերյալ ակնհայտ կեղծ տեղեկություններ՝ իբր նրանք նախքան պատերազմական գործողություններն սկսելը, վերջին երեք ամիսների ընթացքում, փաստացի բնակվել են Շուշի քաղաքում:

Արդյունքում հիշյալ ցուցակներն ուղարկվել է Արցախի Հանրապետության տարածքային կառավարման եւ ենթակառուցվածքների նախարարություն, որի հիման վրա վերջիններս ստացել են տեղահանվածներին տրամադրվող միանվագ 300 հազարական ՀՀ դրամ գումարի չափով աջակցություն, ինչի հետեւանքով էլ պետությանը պատճառվել է ընդհանուր առմամբ 2 միլիոն 100 հազար ՀՀ դրամի նյութական վնաս:

Սույն դեպքերի առթիվ Արցախի Հանրապետության քրեական օրենսգրքի 322-րդ հոդվածի (Պաշտոնեական լիազորությունները չարաշահելը ) 1-ին մասով, 332-րդ հոդվածի (Պաշտոնեական կեղծիքը) 1-ին մասով, 37-րդ հոդվածի (Հանցակիցների տեսակները) 5-րդ մասով նախատեսված հանցագործությունների հատկանիշներով հարուցվել է քրեական գործ>>:
Փաստորեն, Ացախում դարի հանցագործությունն է բացահայտվել, դուք պատկերացնում եք՝ Արայիկ Հարությունյանի ներքո գտնվող կառույցը պարզել է, որ Շուշիի քաղաքապետը առնվազն յոթ մարդկանց է գրանցել նպաստառուների ցուցակում, որոնք վերջին երեք ամսում Շուշիում չեն բնակվել: Հետաքրքիր է՝ այդ ինչպես են ստուգել, որ Շուշիում չեն բնակվել, նախ ուր է հիմա Շուշին եւ ով է գնացել բերդաքաղաք, հարցումներ արել, քաղաքապետարանի գզրոցները ստուգել եւ պարզել, որ խնդրով անցնող քաղաքացիները չեն ապրել Շուշիում: Իսկ իրականում սա ցինիզմի եւ զավեշտի գագաթնակետն է, երբ ինչպես մեծական խոսքում է ասվում «Գետը ջաղացը քշել է, չախչախի հետևից ենք ընկել»:
Արցախի դատախազությունը փոխանակ իրավական գործընթաց սկսի Արցախի տարածքային ամբողջականության խախտման փաստի առթիվ, ընկել է չգիտես ինչերի ետեւից եւ թիթեռ է նկարում: Փաստ է չէ՞, որ Հայաստանի վարչապետ Նիկոլ Փաշինյանը ստորագրել է մի փաստաթուղթ, որը խախտել է Արցախի Սահմանադրությամբ հաստատված տարածքային ամբողջականությունը: Այդ ինչ իրավունքով է Նիկոլ Փաշինյանը ստորագրում մի բան, որով խախտում է այլ պետության սահմանների ամբողջականությունը: Նույն ինքը՝ Արայիկ Հարությունյանը նախագահի պաշտոնը ստանձնելիս Շուշիում երդում տվեց, որ պահելու է ԱՀ տարածքային ամբողջականությունը, Աստվածաշնչի վրա տված իր երդումը ըստ էության դրժել է, եթե ինքն է դրժել, ինքն է մեղավոր դրա համար, ապա իրեն է պետք պատասխանատվության ենթարկել, եթե ոչ, ապա Արայիկ Հարությունյանը պետք է հաղորդում ներկայացնի այն մարդու դեմ, ով խախտել է իր ղեկավարած երկրի տարածքային ամբողջականությունը: Թե չէ սա նման է նրան, որ տունը այրողին չեն պատժում, բայց հանկարծ հիշում են, որ այդ տան ռեմոնտչիկը մի պատը ծուռ է սարքել, ընդ որում տունն այրված է, այլեւ հնարավոր էլ չէ հասկանալ ծուռ է, թե ոչ, ու պիտի պատասխանատվության ենթարկվի:

Անի Սահակյան