Ո՞վ պետք է ապահովի Կարեն Կարապետյանի երազած տաքսիստների հայտնությունը
Կառավարության նիստում, նախքան օրակարգային հարցերին անցնելը, վարչապետ Կարեն Կարապետյանը մի շարք հանձնարարականներ է տվել, որոնք նորից առնչվել են ոստիկանությանը և ոչ միայն նրանց: Այս անգամ Կարեն Կարապետյանի ուշադրության թիրախում հայտնվել են տաքսիստները, հատկապես նրանք, ովքեր ծառայություններ են մատուցում «Զվարթնոց» օդանավակայանում՝ այնտեղից քաղաքացիներին և զբոսաշրջիկներին տեղափոխելով դեպի Երևան և այլ վայրեր. «Ուսումնասիրելով «Զվարթնոց» օդանավակայանում տաքսի ծառայությունների մատուցման ներկայիս իրավիճակը՝ արձանագրում ենք, որ տաքսի ծառայությունների որակն ակնհայտորեն չի համապատասխանում անհրաժեշտ ստանդարտներին և նորմատիվային պահանջներին։ Նշված իրավիճակը խիստ մտահոգիչ է՝ հաշվի առնելով այն, որ այդ ծառայությունների սպառողն են հանդիսանում Հայաստան ժամանող զբոսաշրջիկներն ու մեր համաքաղաքացիները,- զայրացած տոնով հայտարարել է Կարեն Կարապետյանը և շարունակել:- Պրոբլեմը բոլորդ լավ գիտեք՝ անթրաշ, չստիկով, սիգարետը բերանին, Երևանյան լիճ՝ Սևանա լճի փոխարեն Մալաթիա-Սեբաստիայով հասցնող, տարբեր տարիֆներ կիրառող և այլն: Լիցենզիա տրամադրելու ժամանակ մենք պահանջու՞մ ենք վարորդի տեսքն ինչպիսին պետք է լինի, ուղևորի հետ ինչպես պետք է իրեն պահի»: Նա այս առնչությամբ խիստ հանձնարարկաններ է տվել ոստիկանապետին և տրանսպորտի, կապի և տեղեկատվական տեխնոլոգիաների նախարարին: Նախարար Վահան Մարտիրոսյանին հանձնարարել է 1-շաբաթյա ժամկետում իրականացնել «Զվարթնոց» օդանավակայանում տաքսի ծառայություններ մատուցողների հետ պրոֆիլակտիկ աշխատանքներ՝ լիցենզավորման ոլորտում օրինախախտումների գործունեության դադարեցման ուղղությամբ: Նա պահանջել է քննարկել Երևան-Զվարթնոց գործող երթուղիների արդիականացման հնարավորությունը։ Իսկ ոստիկանապետ Վլադիմիր Գասպարյանին Կարեն Կարապետյանը հանձնարարական է տրվել 1-շաբաթյա ժամկետում իրականացնել պրոֆիլակտիկ աշխատանքներ՝ փաստացի առանց լիցենզիայի գործող տաքսի վարորդների կողմից թույլ տրվող իրավախախտումների բացահայտման, կանխարգելման և պատասխանատվության միջոցներ կիրառելու ուղղությամբ։ Վլադիմիր Գասպարյանից Կարեն Կարապետյանը պահանջել է կոշտ քայլեր ձեռնարկել: Վարչապետի խոսքով՝ ստեղծված իրավիճակը անթույլատրելի է, քանի որ զբոսաշրջիկն առաջին տպավորությունը Հայաստանի մասին ստանում է տաքսիստներից: Վլադիմիր Գասպարյանն էլ նշել է, որ տարիներ շարունակ այդ խնդիրը բարձրացվում է, և ոլորտում համապատասխան աշխատանքներ արդեն իսկ տարվել են. «Մենք չենք կարողանում հասնել նրան, որ կասկածելի անցյալ ունեցող, ծանր հանցագործություններով դատված, նարկոդիսպանսերում հաշվառված անձինք չստանան լիցենզիա: Այդ հարցը լուրջ անհանգստություն է մեզ պատճառում»։ Սա արդեն երկրորդ դեպքն է, երբ Կարեն Կարապետյանը Վլադիմիր Գասպարյանից պահանջում է լուծել այն խնդիրները, որոնք, մեղմ ասած, ոստիկանության գործը չեն: Անշուշտ, վարչապետի բարձրացրած հարցը տեղին է, և տաքսիստների աշխատանքի որակը, ինչպես ամենուր, այնպես էլ Հայաստանում ուղիղ համեմամտական են երկրի տուրիստական կերպարին: Բայց ամբողջ խնդիրն այն է, թե ինչ կապ ունի այդ ամենի հետ ոստիկանությունը. օրինակ՝ եթե ղեկի մոտ նստած վարորդն անթրաշ է կամ լոգարանի չստերով, Երևանյան լիճն էլ խաբեությամբ որպես Սևանա լիճ է ներկայացնում, բայց ճանապարհային երթևեկության որևէ կանոն չի խախտում, միաժամանակ ունի տաքսու լիցենզիա, ոստիկանն իրավունք ունի՞ նրան տուգանել: Պարզ է, որ ոչ: Տաքսիների լիցենզավորումն իրականացնում է կապի և տրանսպորտի նախարարությունը, հետևաբար վարորդների հիգիենայի և բարեխղճության հետ կապված պահանջները նրանք պետք է սահմանեն: Վլադիմիր Գասպարյանն ըստ էության հասկացրել է, որ ոստիկանությունն ընդամենը հետևում է սահմանված պահանջների կատարմանը և նոր չափանիշներ սահմանելու իրավասություն չունի: Հետևաբար իր երազած տաքսիստների հայտնությունը Կարեն Կարապետյանը պետք է իր թիմակից Վահան Մարտիրոսյանից պահանջի և ոչ թե իրենից: Ընդ որում, սա առաջին դեպքը չէ, երբ Կարեն Կարապետյանը Վլադիմիր Գասպարյանին մեղադրում է մի խնդրի համար, որի հասցեատերը ոստիկանությունը չէ: Նման պատմություն եղավ նաև <<Մաքուր Հայաստան>> ծրագրի և աղբահանության հետ կապված: Հայտնի է նաև, որ տաքսի վարելը ոստիկանության համար, այպես կոչված, «լևի գործ» անելու հնարավորություն է: Շատ ոստիկաններ ծառայության ավարտից հետո տաքսի են վարում և նրանց նկատմամբ, որպես կանոն, ՃՏՊ գործընկերները բարեհաճ են գտնվում: Սա համակարգի չգրված օրենքներից է. պատճառն էլ առավել քան հասկանալի է: Ոստիկանությունում աշխատավարձերը ցածր են. ոստիկանները նույնպես մարդ են և ընտանիք պահելու խնդիր ունեն: Արման Վարդանյան