Հարված Հայաստանի հարևանին. ի՞նչ է սպասում ՀՀ սահմաններին

Երեկ Իրանի խորհրդարանում և Թեհրանում 1979 թվականի Իսլամական հեղափոխության առաջնորդի` այաթոլա Խոմեյնիի դամբարանում հնչած կրակոցները, պայթյունները ու դրանց հետևած իրադարձությունները աշխարհի լրատվամիջոցների ուշադրության կիզակետում էին: «Իսլամական պետություն» ահաբեկչական խմբավորումը ստանձնեց Թեհրանի կենտրոնում երկու հարձակումների պատասխանատվությունը: Հարձակումները տեղի են ունեցել «գրեթե միաժամանակ»: Պատգամավոր Էլյազ Հազրաթին պետական հեռուստատեսությանը պատմել է, որ խորհրդարանի շենք են ներխուժել երեք հոգի, որոնցից մեկը զինված էր ատրճանակով, իսկ մյուս երկուսը՝ Կալաշնիկովի ինքնաձիգներով: Գրեթե 30 րոպե անց տեղի է ունեցել երկրորդ հարձակումը՝ այաթոլա Խոմեյնիի դամբարանում: Խորհրդարանի նիստի ժամանակ շնորհակալություն հայտնելով պատգամավորներին իրենց աշխատանքը հանգիստ մթնոլորտում շարունակելու համար՝ Լարիջանին, մասնավորապես, հայտարարել է․ - «Այդ հարձակումը աննշան միջադեպ էր, որը, սակայն, ցույց է տալիս, որ ահաբեկիչները ձգտում են խնդիրներ ստեղծել»: Խորհրդարանի նախագահը նաև հավելել է․ «Քանի որ Իրանը համարվում է ահաբեկչության դեմ պայքարի արդյունավետ կենտրոն, ահաբեկիչները մտադիր են սաբոտաժ կազմակերպել այդ ոլորտում»: Այսպիսով, եթե փորձենք իմի բերել երեկվա սարսափելի իրադարձությունները, ապա եզրակացությունները, որքան էլ նախնական են, այնուամենայնիվ ակնհայտ են: «Իսլամական պետությունը» խոստացել էր ահաբեկչություններ` արեց: Երեկվա իրադարձություններից ժամեր անց «Իսլամական պետություն» ահաբեկչական խմբավորումը կրկին է հայտարարել է, խոստանում է առաջիկայում նոր ահաբեկչություններ իրականացնել Իրանում: Իսլամիստների հրապարակած տեքստում ասվում է, որ «խալիֆայությունը բաց չի թողնի ոչ մի հնարավորությունը շիաների արյունը թափելու համար», որոնք կազմում են Իրանի բնակչության մեծ մասը: Իսլամիստները խոստանում են ահաբեկչությունների արշավն այնքան ժամանակ շարունակել, քանի դեռ Իրանի տարածքում շարիաթի օրենք չհաստատվի: Ակնհայտ է, որ ահաբեկիչների նպատակը Իրանում քաոս ստեղծելն էր, ինչը չհաջողվեց: Անգամ հարձակումներից հետո Իրանի խորհրդարանում երեկ շարունակվեցին նիստերը: Խոշոր հաշվով Իրանը երեկվանից հետո հայտնվել է նոր իրավիճակում և վստահաբար արագ որոշումներ կայացնելը կլիներ հենց ահաբեկիչների ցանկությունը: Ոչ միայն Իրանը, այլև ողջ տարածաշրջանն է երեկվանից նոր իրավիճակում հայտնվել: Այն, որ ահաբեկիչները հատուկ էին ընտրել 2 այնպիսի վայր, որպեսզի «հարվածը» ուժգին ու ցավոտ լիներ` կասկած չկա: Հազիվ թե երեկվա իրադարձություններից հետո Իրանում պառակտումներ սկսվեն հասարակության մեջ: Որ անվտանգության պահպանման հարցում Իրանը կտեղափոխվի այլ ռեժիմ` դա էլ է պարզ: Մի կողմից ԱՄՆ-ի հակաիրանյան տրամադրությունները, մյուս կողմից «Իսլամական պետություն» ահաբեկչական խմբավորման հարձակումները էապես փոխում են ստեղծված իրավիճակը տարածաշրջանում: Այստեղ իհարկե, Հայաստանի համար` անհանգիստ Թուրքիայի, արդեն անհանգիստ Իրանի, և չհաշված` մշտական սպառնալիք Ադրբեջանի հարևանությամբ` լուրջ մտորելու խնդիրներ են առաջ գալիս: Ու այս իրավիճակում, մնում է միայն հուսալ, որ Հայաստանի իշխանությունները պետության և քաղաքացիների անվտանգության պահպանման առումով անհրաժեշտ հսկողությունն էլ ավելի կմեծացնեն, և առհասարակ, տարածաշրջանային հարցերում` կայունությունն ամեն գնով պահպանելու հարցում գործընկեր պետությունների հետ ըստ արժանվույն աշխատանքներ կիրականացնեն: Թամար Բագրատունի