Ուսապարկերի վարկանիշն ավելի բարձր է, քան Նիկոլ Փաշինյանինը

«Գելլափ Ինթերնեյշնլ Ասոցիացիայի» հայաստանյան ներկայացուցիչ «Էմ Փի Ջի» ընկերության անցկացրած վարկանիշային հարցումների արդյունքներով իշխանությունը պահպանել է բարձր վարկանիշը։

«Եթե ընտրությունները լինեն հաջոր կիրակի, ո՞ր քաղաքական ուժի օգտին կքվեարկեք» հարցին 31.7 տոկոսը պատասխանել է՝ «Իմ քայլը» դաշինք, 5.9 տոկոսը՝ Ռոբերտ Քոչարյան, 4.4 տոկոսը՝ ԲՀԿ, 2.7 տոկոսը՝ ԼՀԿ, 2.4-ը՝ ՀՀԿ, 2.1-ը՝ ՀՅԴ, 1 տոկոսը՝ Վազգեն Մանուկյան, 0.5 տոկոսը՝ «Սասնա ծռեր» կուսակցություն, 0,4 տոկոսը՝ «Հայրենիք» կուսակցություն, 0.4`ը «Հանրապետություն» կուսակցություն, 0,1 տոկոսը՝ «Քաղաքացու որոշում» կուսակցություն: 24.6 տոկոսը նշել է, որ ոչ մեկի օգտին չի քվեարկի, ևս 20 տոկոսը դժվարացել է պատասխանել:
Այսինքն՝ մոտավոր ուրվագծվում են արտահերթ ընտրությունների երկու հիմնական բևեռները՝ պայքարն ընթանալու է գործող իշխանության և Ռոբերտ Քոչարյանի միջև, որի վարկանիշը նկատելի աճ է ունեցել։
Փաստորեն, եթե հարցման արդյունքները համեմատենք մոտ մեկ ամիս առաջվա հարցման արդյունքների հետ իշխանության վարկանիշը համարյա չի իջել, ինչը շատ տարօրինակ է, որովհետև վերջին մեկ ամսվա ընթացքում իշխանությունը հանրության համար առաջնային նշանակության որևէ հարց չի լուծել։ Գերիների վերադարձի հարցը լուծված չէ, իշխանությունը բացահայտ հանդես է գալիս կոմունիկացիաները Ադրբեջանին տրամադրելու օգտին՝ վտանգելով Սյունիքի տարածքները։ Ավելին այս ընթացքում վարչապետ Նիկոլ Փաշինյանը արել է այնպիսի հայտարարություններ, որոնք միարժեքորեն վտանգում են նրա վարկանիշը․ վերջին թարմ օրինակը՝ բուհերի շենքերը վաճառքի հանելու մասին հայտարարությունն է։ Դրան նախորդել էր ՍՈՒ 30 կործանիչները առանց հրթիռի գնելու, իսկ այնուհետև Թուրքիային մեր թշնամին չհամարելու մասին սկանդալային հայտարարությունները։

Ըստ այդմ բավականաչափ տուժել է Նիկոլ Փաշինյանի անձնական վարկանիշը։ Հարցման արդյունքներով Հայաստանում ամենաբարձր վարկանիշ ունեցող գործիչը ՀՀ մարդու իրավունքների պաշտպան Արման Թաթոյանն է:
Նա առավելագույն 5 միավորից ստացել է 3.7 բալ: Գործող վարչապետ Նիկոլ Փաշինյանը ստացել է 2.7 բալ, ՀՀ նախագահ Արմեն Սարգսյանը` 2.4 բալ, ՀՀ երկրորդ նախագահ Ռոբերտ Քոչարյանն ու ԲՀԿ նախագահ Գագիկ Ծառուկյանը`2.1 բալ, «Լուսավոր Հայաստանի» նախագահ Էդմոն Մարուքյանը՝ 1.9, ՀՀ երրորդ նախագահ Սերժ Սարգսյանը` 1.6, ՀՅԴ ԳՄ ներկայացուցիչ Իշխան Սաղաթելյանը՝ 1.5, նախկին վարչապետ Վազգեն Մանուկյանը՝ 1.5, «Հայրենիք» կուսակցության նախագահ Արթուր Վանեցյանը՝ 1.4 բալ:

Հարցվածների 7 տոկոսը տեղյակ չի եղել, որ Հայաստանում հունիսի 20-ին նախատեսվում է անցկացնել ԱԺ արտահերթ ընտրություններ: Հարցվածների 35.5 տոկոսը միանշանակ վստահություն է հայտնել Փաշինյանի կազմակերպած ընտրությունների արդարությանն ու թափանցիկությանը, 29.7 տոկոսը միանշանակ անվստահություն է հայտնել: 41 տոկոսը նշել է, որ կմասնակցի ընտրություններին, 15.5 տոկոսը՝ ոչ:
Հարցման նման պատկերը բավականաչափ տարօրինակ է, որովհետև տևական ժամանակ իշխանության և մասնավորապես Իմ քայլը խմբակցության վարկանիշն պայմանավորված է եղել բացառապես Նիկոլ Փաշինյանի անձնական վարկանիշով։ Փաշինյանի թիմակիցներն իրենք տարբեր առիթներով խոստավանել են, որ Փաշինյանի ուսապարկն ավելի վարկանիշ է ունեցել, քան իշխող թիմի անդամները։ Հիմա, եթե Փաշինյանն ունեցել է վարկանիշի կորուստ, ինչի մասին են վկայում են ՄԻՊ Արման Թաթոյանի նկատմամբ նրա միավորների անկումը, պետք է որ նվազած լիներ նաև Իմ քայլի վարկանիշը։ Բայց արի ու տես, որ Գելլափը ուսապարկերին ավելի բարձր վարկանիշ է վերապահել, քան դրանց տիրոջը՝ Նիկոլ Փաշինյանին։ Հանուն արդարության պետք է խոստովանել, որ այստեղ ամեն դեպքում որոշակի տրամաբանություն, այնուամենայնիվ, կա․ուսապարկերն, ամեն դեպքում, գոնե պետությանն ու ժողովրդին չեն վնասում։

Հայկ Դավթյան