Ընտրություններից հրաժարվելուց հինգ պակաս. Փաշինյանի «զապազ» պատրվակները

Նիկոլ Փաշինյանի գլխավորությամբ մարտի 29-ին տեղի է ունեցել Հայաստանի Հանրապետությունում կորոնավիրուսի տարածումը կանխարգելող աշխատանքները համակարգող հանձնաժողովի նիստը:
Իր խոսքում Փաշինյանը, մասնավորապես, նշել է. «Մեր այն սպասումը և կանխատեսումը, թե նոր տիպի կորոնավիրուսի համավարակն առնվազն մեկ տարի տևելու է, ըստ էության արդարացան և արդարանում են, և հիմա ամբողջ աշխարհում կորոնավիրուսը շարունակում է տարածվել: Նոր հանգամանքը, որ ի հայտ է եկել, պատվաստանյութերի կիրառումն է, և մենք այսօր կքննարկենք այս պահին կորոնավիրուսի հետ կապված իրավիճակը Հայաստանում և մեր անելիքները, մասնավորապես՝ պատվաստման քաղաքականությունը, պատվաստանյութերի ձեռքբերման առումով մեր պայմանավորվածությունները, հետագա քայլերը»:

Առողջապահության նախարար Անահիտ Ավանեսյանը ներկայացրել է Հայաստանում համաճարակային իրավիճակը՝ նշելով, որ այսօրվա դրությամբ հաստատվել է կորոնավիրուսային հիվանդության ընդհանուր 190741 դեպք, որից 172096-ը՝ առողջացած, 3476-ը՝ մահվան ելքով: Նախարարը նշել է, որ նշված ցուցանիշների վերջին 7 օրվա համեմատականը մտահոգիչ է, Հայաստանում կորոնավիրուսի համաճարակային իրավիճակը շարունակում է լարված մնալ և վերահսկողական միջոցառումները չխստացնելու պարագայում կվատթարանա:

Տպավորություն է, որ Նիկոլ Փաշինյանն անձի երկվությամբ է տառապում: Բառացիորեն մեկ օր առաջ այս մարդը նախընտրական այց էր կատարել Արմավիրի մարզ եւ շատ մոտիկից ու սերտ շփվում էր համայնքի բնակիչների հետ, ընդ որում, առանց դիմակ, իսկ այսօր նա համավարակի կանխարգելման նպատակով խորհրդակցություն է հրավիրել: Իսկ իրականում հասկանալի է այս ամենի ենթատեքստը: Իշխանությունը ներքին սոցհարցումներ է իրականացրել եւ պարզել, որ մի շարք մարզերում իրենք ունեն զրո վարկանիշ: Սակայն, ինչպես հայտնի է, Նիկոլ Փաշինյանը հայտարարել է հունիսի 20-ին արտահերթ ընտրություններ անցկացնելու մասին: Բացի այդ Փաշինյանն ու իր թիմը մարզային այցելություններ են իրականացնում եւ, ըստ մամուլի, դրանք իրականում այն պատկերը չեն արտահայտում, ինչ Նիկոլ Փաշինյանն է փորձում ներկայացնել՝ մարդաշատ հավաքներ, աղուհացով դիմավորող համայնքի բնակիչներ: Իրականությունն այն է, որ իշխանությունը Երեւանից է իր հետ մարդկանց տանում, դիցուք` Արագածոտնի համայնքում եղել է միջադեպ, երբ Փաշինյանին զոհված զինծառայողի ընտանիքը վռնդել է իր բակից: Ըստ ամենայնի, այս ամենը հաշվի առնելով` Նիկոլ Փաշինյանը արտահերթ ընտրությունների որոշումը չեղարկելու հող է նախապատրաստում: Նա, իհարկե, քայլեր անում է ընտրությունների ուղղությամբ, ինչպես անցած շաբաթ խորհրդարանը վերացրեց ռազմական դրության ռեժիմը, բայց երբ հասկանա, որ հնարավոր չէ գնալ ընտրության, ապա հոգ չէ, նորից մի պատրվակով ռազմական դրություն կհայտարարվի:

Այս համատեքստում է պետք դիտարկել նաեւ ընտրակարգի փոփոխության հետ կապված Փաշինյանի հայտարարությունը: Խորհրդարանում հարցուպատասխանի ժամանակ հայտարարելով, որ ընտրությունների գնալու ենք ոչ թե ռեյտինգային, այլ համամասնական ընտրակարգով, նա թերեւս հույս ուներ, որ ընդդիմությունը կբոյկոտի, կհրաժարվի պայմանավորվածությունից, բայց փաստն այն է, որ ընդդիմությունը չգնաց այդ քայլին, չի բացառվում, որ Փաշինյանի թիմում բոյկոտեն: Մի խոսքով՝ ամեն օր Փաշինյանը մի պատրվակ է հորինում, որպեսզի չեղարկի ընտրությունները:

Անի Սահակյան