Պետությունը չհանձնելու պայքար.Նիկոլ Փաշինյանը երաշխիքներ կստանա՞

ՀՀ Սահմանադրական դատարանն անվավեր և հակասահմանադրական է ճանաչել ՀՀ քրեական օրենսգրքի 300․1 հոդվածը, որը Սահմանադրական կարգի ենթադրյալ տապալման գործի հիմքն էր։ Իսկ այս գործով անցնում էր ՀՀ երկրորդ նախագահ Ռոբերտ Քոչարյանը:
Սահմանադրական դատարանը սահմանել է, որ 300․1 հոդվածը հակասում է Սահմանադրության 78 և 79-րդ հոդվածներին։ ՍԴ որոշումը վերջնական է և ուժի մեջ է մտնում հրապարակման պահից։
Ռոբերտ Քոչարյանի փաստաբանական թիմը, միջազգային հեղինակավոր կառույցներ այս գործի հակասահմանադրականության վերաբերյալ մասնագիտական կարծիք են հայտնել երկրորդ նախագահի ապօրինի կալանավորման առաջին իսկ օրից։
Այս հակասահմանադրական գործի պատճառով նախագահ Քոչարյանը իր փաստաբանական խմբի հաշվարկով 537 օր ապօրինի կերպով զրկված է եղել ազատությունից:
Նիկոլ Փաշինյանի իշխանությունն էլ երեք տարի շարունակ որոճացել է այս գործը եւ թմբկահարել նախագահի դեմ կարած գործը: Երեք տարի անց, բարձր դատարանն իր բարձունքում գտնվեց: Թեպետ իշխանությունն առաջին օրից էր հասկանում, որ այս շինծու գործը փշրվելու է ՍԴ-ում, քանի որ բարձր դատարանի ղեկավար Հրայր Թովմասյանը կամք եւ սկզբունքայնություն էր ցուցաբերել եւ մերժել իշխանության խաղի կանոններով արդարադատություն իրականացնել, հենց այդ պատճառով սկսվեցին նրա եւ ՍԴ դեմ արշավանքները, որոնք թվում էր, թե պսակվեցին իշխանության հաղթանակով, Հրայր Թովմասյանին զրկեցին նախագահությունից, եւս մի քանի սկզբունքային դատավորները ընդհանրապես ուղարկվեցին թոշակի, փոխարենը դատարան ներդրեցին իրենց սրտի դատավորներին, որպեսզի նախեւառաջ այս գործը իրենց ուզածով հանգուցալուծեն: Դա իշխանություններին չհաջողվեց, որովհետեւ ՍԴ կամային դատավորները պայքարեցին մինչեւ վերջին շունչը՝ չվախենալով հեղափոխական զանգվածների հարձակումներից: Հրայր Թովմասյանի եւ Արեւիկ Պետրոսյանի ջանքերով գործի քննության գրավոր ընթացակարգը փոխվեց բանավորի, իսկ Հրայր Թովմասյանի՝ դատարանին ուղղված հորդորը վստահաբար իր ազդեցությունն ունեցավ.«Կարծում եմ՝ Սահմանադրական դատարանին պարտավորեցնում է, որպեսզի մնա իր բարձր դիրքում, որպեսզի որևէ կասկած չթողնի հանրության մոտ, որ Սահմանադրական դատարանն այս ամբողջ ընթացքում անաչառ է և իր համար զուտ իրավական վերլուծություններն ու փաստերն է: Հակառակ պարագայում կստեղծվի և կխորանան այն դիտարկումները, այն մոտեցումները, այն կարծիքները, որ Սահմանադրական դատարանի շուրջ վերջին երկու տարում ընթացող պրոցեսները ունեցել են բացառապես քաղաքական նպատակներ՝ սկսած սահմանադրական փոփոխություններից, Սահմանադրական դատարանի տարբեր դատավորների հետապնդումներից, և սահմանադրական կազմի փոփոխությունը կրել է բացառապես մեկ նպատակ՝ պայմանավորված այս գործով: Եվ Սահմանադրական դատարանը պարտավոր է ապացուցել, որ դա այդպես չէ», - նշեց Թովմասյանը:

Հրայր Թովմասյանը ինչպես եւ խոստացել էր, մինչեւ վերջին պահը պահեց իր խրամատը, չնահանջեց ոհմակային հարձակումներից, անգամ երբ իր 16 տարեկան դուստրերին էին հետապնդում, հիվանդ հորն ու հարազատներին, նա դարձավ հետհեղափոխական Հայաստանում պետականությունը փրկելու, ապօրինությունների դեմ պայքարող այն եզակի մարտիկներից մեկը, ով իր վճռականությամբ թերեւս համարձակություն ներշնչեց շատերին, արդյունքում բարձր դատարանն էլ մնաց իր բարձունքում, եւ եթե Զինված ուժերի Գլխավոր շտաբում եւս նման սկզբունքայնություն ու վճռականություն դրսեւորեին, թերեւս այսօր բոլորովին այլ պատկեր կունենայինք: Եթե Օնիկ Գասպարյանն էլ պատերազմի առաջին օրերին վերլուծելով իրավիճակը ակտիվ գործողությունների անցներ՝ չվախենալով Նիկոլ Փաշինյանից, Աննա Հակոբյանը դուրս կմղվեր հրամանատարական բունկերից եւ երրորդ-չորրորդ օրը կկանգնեցվեր պատերազմը ու այսքան զոհեր, կորուստներ էլ չէինք ունենա:
Նիկոլ Փաշինյանը, թերեւս, եռամյա այս պայքարի վերջում հասկացավ, որ ՍԴ-ի հարցում անիմաստ է, հատկապես հիմա, երբ իշխանությունը զրկված է բոլոր հենարաններից, չի բացառվում, իհարկե, որ արտաքին ճնշումը եւս իր դերը խաղացել է, եւ Նիկոլ Փաշինյանը այսպիքով ճանապարհ է բացում Նիկոլ Փաշինյանի առջեւ՝ դրա դիմաց ՌԴ նախագահից ստանալով կյանքի , անվտանգության երաշխիքներ:

Անի Սահակյան