Նիկոլ Փաշինյանի նոփ-նոր ուսապարկի արկածները

Ամիսներ առաջ Նիկոլ Փաշինյանը խոսնակի շուրթերով իր պատգամավորներից մեկին եւ ըստ էության բոլորին արդարացիորեն համեմատեց իր ուսապարկի հետ, ինչը աղմկոտ քննարկման ենթարկվեց: Սակայն իրականում խորհրդարանի պատգամավորները ուսապարկ էլ չեն, անհասկանալի է, թե ինչ են: Թվում էր, թե հետպատերազմական Հայաստանում այս մարդիկ ամոթից ու մեղքի զգացումից դուրս չպիտի կարողանային դուրս գալ իրենց թաքստոցներից, բայց ոչ միայն դուրս են գալիս, այլ ցինիզմի նոր ռեկորդներ են սահմանում: Մարդիկ, ովքեր Արցախի 75 տոկոսը հանձնել են թշնամուն, մարդիկ, ովքեր հազարավոր երիդասարդ կյանքերի պատասխանատուն են, որոնք այսօր պետք է լուծեն մեկ գլխավոր եւ կարեւոր հարց՝ գերիների վերադարձի եւ անհետ կորածների գտնելու, մարդիկ, ովքեր այսօր պետք է զբաղվեն սահմանազատման աշխատանքներով, հումանիտար եւ սոցիալական խնդիրներով, իրենց չեղած ամոթը մի կողմ դրած շարունակում են հասարակությանը բաժանել բարիկադների, սեւի ու սպիտակի, նախկինի ու ներկայի:
Ահա, այդ անմեղսունակների բանակն այսօր համալրվեց եւս մեկով, Նիկոլ Փաշինյանի ուսապարկերի ցուցատախտակին հայտնված նոփ-նոր ուսապարկը, որը շաբաթներ առաջ պատգամավորի օգնական էր, իսկ այսօր բախտի բերմամբ դարձել է պատգամավոր, շատ արագ խորհդարանի հիթը դարձավ իր աշխարհացունց մտքերով: Պպարզվեց, որ գյումրեցի Էմմա Պալյան անունով այս աղջկա շրջապատում շատ կան գերեվարված եւ զոհված զինծառայողների ընտանիքներ եւ նրանք հիմնականում չեն մեղադրում Նիկոլ Փաշինյանին, որովհետեւ հասկանում են, թե ինչ է կատարվել.
«Ես համաձայն չեմ Նիկոլ Փաշինյանին ուղղված գնահատականների հետ, բազմաթիվ անձանց հետ շփման արդյունքում բացասական կարծիք չեմ լսել վարչապետի մասին: Դա խաղ է, ընդդիմության կողմից հնչեցված թեզեր են, բայց այսօր Նիկոլ Փաշինյանը հասարակության շրջանում ունի բարձր վարկանիշ»,- կարծում է նա: ՀՀԿ-ական Արմեն Աշոտյանի մարտիության ստատուսը իր նախկին շեֆի՝ պատգամավոր Կարեն Սարությանյանի համար <<քոփի>> արած այս աղջնակը, պատկերացնում եք՝ ՀՀ բոլոր մեղքերի պատասխանատուն համարում է նախկիններին, այն նախկիններին, որոնցից ինքն անգամ շնորհավորանք է գողանում: Սա Նիկոլ Փաշինյանի թիմի հավաքական կերպարն է, ուսապարկերի թերեւս ամենավառ ներկայացուցիչը, ով անգիր արած բոլոր հարցերին պատասխանում էր՝ մեղադրելով նախկիններին:
ԱԺ փոխխոսնակ Ալեն Սիմոնյանն էլ ցինիզմի նոր բարձունքներ նվաճեց: Պարզվում է՝ իշխանությունը վերջին ամիսներին ոստիկաններին պարգեւավճարներ է սահմանում, որպեսզի վերջիններս պատշաճ ապահովեն լրագրողների անվտանգությունը, նրանց վրա չհարձակվեն ընդդիմության ակցիայի մասնակիցները.
«17 ուժերի ներկայացուցիչներից մեկն այն օրն ասում էր, որ ոստիկաններին պարգեւավճար ենք տվել․․․բա ճիշտ ենք արել, հլը էլի ավելի շատ պետք է տանք ոստիկաններին»,-ասաց նա դիմելով ընդդիմությանը , «Իսկ դուք որ այդտեղ մարդիկ կանգնում են՝ գումար չեք բաժանո՞ւմ, օղի, ուտելիք չեք բաժանո՞ւմ։ Ոստիկանները կարգուկանոն են պահպանում, որ լրագրողների վրա չհարձակվեն այն մարդիկ, որոնք երթ են անում։ Բա պտի տան․․․»: Փաստորեն, ոստիկանները ոչ թե հողատու վարչապետի անվտանգությունն են պաշտպանում, ով մի քանի մետր տեղափոխության համար ոստիկանական գումարտակներ է ոտքի հանում, այլ լրագրողների: Այստեղ մեզ մնում է ասել, որ դուք ձեր հակոբարշակյաններով մի սպառնացե մեր անվտանգությանը, մեզ պաշտպանություն պետք չէ:

Անի Սահակյան