Կանանցից խրտնողը

Ազգային Ժողովում պաշտպանության և անվտանգության հարցերով մշտական հանձնաժողով նախագահ Անդրանիկ Քոչարյանն հերթական անգամ մի շարք լրատվամիջոցների լրագրողների, ընդ որում, բացառապես իգական սեռի ներկայացուցիչների նկատմամբ ընդգծված վերաբերմունք է ցուցաբերել։ Տպավորություն է, որ ալեհեր այս տղամարդը կանանց հետ շփման ֆոբիաներ ունի, նա խռտնում է լրագրող կանանց տեսնելիս, կորցնում է ինքնատիրապետումը, սկսում է գոռգոռալ, ձայնը գլուխը գցել, սպառնալ ու վիրավորել, այս անգամ էլ որոշել է «հոսանքազրկել» որոշներին, նախեւառաջ Անի Գեւորգյանին՝ ասելով, որ նրանք «չկան» ու չի պատասխանելու նրանց հարցերին։

Անդրանիկ Քոչարյանը լրագրողների նկատմամբ իր պահվածքով վազանց է արել ՀՀԿ-ի ամենաօրդիոզ կերպարին: Այն, որ նախկիներն ունեին ունիկալ պատգամավորների մի ամբողջ հավաքածու, ոչ ոք դա չի հերքում, նրանք միշտ անկեղծ էին իրենց բնույթն ու էությունը ցուցադրելու գործում: Այն, որ ՀՀԿ-ականների մեջ կային եւ այնպիսիք, որոնք իրենց պահվածքով ու բառուբանով միշտ առանձացել են հոծ ամբոխից, ներկայացել տգիտության, վայրենության ուրույն փայլով, ու որ այսպիսինների վզից իրենց տերերը հանգիստ կարող էին ու պարտավոր էին կախ տալ մեծ տառերով գրված ցուցանակներ այս գրությամբ. «Այստեղ պահպանվում է եզակի ցեղատեսակի նմուշը: Չմոտենալ: Չկերակրել: Վտանգավոր է», դա էլ գիտենք բոլորս: Բայց որ այդ ցեղատեսակներից կան նաեւ Հայաստանը ժողովրդավարության բաստիոն հռչակած, իրենց էլ մեծն հեղափոխականներ երեւակայող իշխանությունում, որոնք մեզ խոստանում էին բոլորիս կյանքը դրախտ, սա այլեւս անհերքելի է: Ահավասիկ Անդրանիկ Քոչարյանը, կանանց նկատմամբ առանձնակի ագրեսիա ունեցող այս պարոնի օրիենտացիան թերեւս լուրջ մտահոգությունների տեղիք կտար մի իշխանությունում, որտեղ տղամարդկությունը, ջենթլմենությունը ընդունելի արժեք են: Բայց ինչեւէ, այս պարոնը որքան ճղճղան է լրագրողների նկատմամբ, նույնքան խեղճ ու երկչոտ սեփական ասածներին տեր կանգնելու հարցում:

Երբ լրագրողները Անդրանիկ Քոչարյանին հարցրեցին ԳՇ պետի պաշտոնում Նիկոլ Փաշինյանի կողմից Արտակ Դավթյանի նշանակումը, հետաքրքրվելով, թե արդյոք Անդրանիկ Քոչարյանը մնում է իր նույն կարծիքին, ինչի մասին խոսել է ամիսներ առաջ, հայտարարելով, որ Արտակ Դավթյանը շատ վատ դերակատարում է ունեցել 2016-ի ապրիլյան պատերազմում, Քոչարյանը մեղմ ասած խելոք լիզեց թքածը եւ խոսքը կտուրը գցե, ասելով, որ ԶՈՒ պատասխանատուն եղել է Յուրի Խաչատուրովը. «ՀՀ ԶՈՒ ԳՇ պետի պաշտոնը չի կարող կես ժամից ավելի մնա թափուր»:
Ապա սկսեց իրեն այս ու այն կողմ տալ, ասաց, որ շուտով ապրիլյան պատերազմի քննիչ հանձնաժողովի եզրակացության զեկույցով հանդես կգա. «Ես կարծում եմ, որ վարչապետը այս պահին ներկայացրել է ԳՇ պետի թեկնածուին, որն ունի ԳՇ կառավարման փորձ, եղել է օպերատիվ վարչության պետը: Եթե նայենք կադրային պոտենցիալը, Արտակ Դավթյանը դուրս է եկել ԳՇ-ից: Մյուս տեղակալը՝ Տիրան Խաչատրյանը դուրս է եկել: Բարձրագույն սպայակազմի դասակարգման մեջ վարչապետը կատարել է այս պահի համար շատ տրամաբանական լուծում»: Հարցին՝ Արտակ Դավթյանը հայտարարել է, որ ԳՇ հայտարարությունը քաղաքական չէ, այդ դեպքում ինչո՞վ է այդ նշանակումը տարբերվում՝ Անդրանիկ Քոչարյանը պատասխանեց. «Ես կարդացել եմ, որ Արտակ Դավթյանն այդ հայտարարությունից հետո ունեցել է այլ տեսակետ՝ պաշտոնը ստանալուց առաջ»:
Սա է այս իշխանության իրական դեմքը, իրեն վերաբերող բոլոր հարցերի վերաբերյալ իշխանությունները պատեհապաշտություն են դրսեւորում, իսկ այ լրագրողների դեմ պայքարում առյուծ են կտրում:

Անի Սահակյան