«Գործ տվողներն» ու պատգամավորների վրդովմունքը

Հակակոռուպցիոն նոր մարմնի ստեղծման մասին իշխանությունների մտադրությունները միանշանակ չի ընկալվում ոչ միայն ընդդիմադիրների կողմից, այլեւ կոալիցիոն Դաշնակցության: Բայց հին ընկերների բողոքը ոչ թե այն մասին է, որ նոր կառույցը դառնալու է հերթական ու իմիտացիոն բնույթ է կրելու, քանի որ կոռուպցիայի դեմ պայքարի համար նախեւառաջ քաղաքական կամք է հարկավոր, այլ ընդվզում է այն բանի դեմ, որ դա խարխլելու է հայապահպանության հիմքերը: Կոռուպցիայի կանխարգելման հարցերով հանձնաժողովի նախագծի քննարկման ժամանակ ՀՅԴ խմբակցության նորաթուխ պատգամավոր Անդրանիկ Կարապետյանը խրոխտ կեցվածքով մոտեցավ ամբիոնին եւ ազդարարի համակարգի ներդրումը «գործ տվողի» ինստիտուտ համարեց: Հիշեցնենք, որ ազդարարներն այն անձինք են, ովքեր կոռուպցիայում ներգրավված պաշտոնատարների մասին կկարողանան հավաստի տեղեկություն տրամադրել իրավասու մարմիններին կամ աշխատավայրում իրենց վերադասին: Սա ամրագրվում է օրենսդրությամբ:«Միտքս եկավ այն գաղափարը, որ ժողովրդական լեզվով ասած՝ սա գործ տվողի ինստիտուտ է: Եկեք բոլորս բոլորի վրա գործ տանք, եկեք գնանք աշխատանքի և մեկս մյուսի աչքերի մեջ չկարողանանք նայենք՝ կասկածելով, որ մեկս մյուսի վրա կարող ա գործ տանք»,- իր ելույթում ասաց ՀՅԴ-ական պատգամավորը: Երիտասարդ պատգամավորի համոզմամբ հայի տեսակի պահպանության խնդիր ունենք, և մեր երկրին հարիր չէ նման գաղափարներ սերմանելն ու խրախուսելը: Անդրանիկ Կարապետյանին իր ելույթում պատասխանեց Ելք խմբակցության պատգամավոր Մանե Թանդիլյանը: Նա ամոթանք տվեց նման կերպ մտածող պատգամավորներին, ասաց, որ զարմացած է նման ելույթից: «Խոսել մարդկանց մասին, ովքեր կարող են լինել ազդարարներ կոռուպցիայի դեմ պայքարում և նրանց անվանել գործ տվողներ և համարել, որ դա հայեցի չէ, ես համարում եմ, որ հենց նման ընկալումը հայեցի չէ: Ես ուզում եմ հասկանալ՝ որն է հայեցին, ջայլամություն անե՞լը, երբ տեսնում ես կոռուպցիոն ռիսկեր և փաստեր, թե՞ այդ մասին բարձրաձայնելը: Մենք հակառակ գործունեությունը պետք է այստեղ անենք և մարդկանց կոչ անենք պայքարել կոռուպցիայի դեմ»,- ասաց Թանդիլյանը: Ընդհանրապես պատգամավորներից շատերն էին վրդովվել ՀՅԴ-ականի ելույթից եւ միջանցքներում վրդովմունք էին հայտնում գործ տվողի տերմինի արծարծման համար:Կոռուպցիայի կանխարգելման մարմնի անդամների առաջադրման փուլում ընդդիմությունը պետք է իր մասնակցությունն ունենա, իր հերթին ասաց «Ծառուկյան» դաշինքի պատգամավոր Նաիրա Զոհրաբյանը: Մինչ ստեղծվելիք մարմնին անդրադառնալը՝ նա հիշեց Բարձրաստիճան պաշտոնյաների էթիկայի հանձնաժողովի գործառույթները. «Ձեզնից որևէ մեկը հիշո՞ւմ է, որ այս հանձնաժողովը շահերի բախման կամ մարդու հայտարարագրի ունեցվածքի անհամապատասխանության դեպքում որևէ հարց բարձրացրած լինի: Քանի դեռ մեր երկրում կա ապօրինի հարստացում, մենք ունենք և ունենալու ենք կեղծ հայտարարագրեր, որտեղ անձը շատ դեպքերում ներկայանում է որպես բոմժ, բայց իրականում մենք տեսնում ենք նրա ռեալ ունեցվածքը»,- ասաց Նաիրա Զոհրաբյանը՝ հավելելով, որ հանձնաժողովն իր գործառույթները չի կատարել: Անդրադառնալով ստեղծվելիք հանձնաժողովին ՝ ընդգծեց. «Քանի դեռ պլուտոկրատիան մեզանում հաստատված է, որևէ օրենքով դժվար է հաղթահարել ապօրինի հարստացումը: Մեր առաջարկն ուժի մեջ է. ընդդիմությունը պետք է թեկնածու առաջադրելու իրավունք ունենա: Մենք տեղյակ ենք Ջակարտայի համաձայնագրին: Բայց վստահաբար կարող եմ ասել, որ Ջակարտայի համաձայնագրի հեղինակները տեղյակ չեն, որ օրինակ՝ Հայաստանում Սահմանադրական դատարանը և այլ կառույցներ, որոնց վերապահված է մարմնի համար թեկնածուներ առաջադրել, ուղղակիորեն գործում են իշխանության պրեսինգի տակ»: Անի Սահակյան