Լեւոն Տեր-Պետրոսյանը բացում է Սերժ Սարգսյանի խաղաքարտերը
44-օրյա պատերազմից հետո Նիկոլ Փաշինյանին իր հայտարարությունների տողատակերում աջակցություն հայտնող, ընդդիմությանը հարվածող, Զինված ուժերին քննադատող Լեւոն Տեր-Պետրոսյանը վերջապես հասկացել է՝ այս իրավիճակի ելքը: Դա Նիկոլ Փաշինյանի ինքնակամ հրաժարականն է եւ արտերկրում ապաստանելը:
Ավելի քան չորս ամիս ընդդիմությանն ու նրանց պայքարը խարազանող առաջին նախագահը, ով անգամ իշխանությունների շուրջը օրհասական պահին համախմբվելու կոչով հանդես եկավ, թերեւս ընդունել է իրեն ուղղված քննադատությունները, որ հնարավոր չէ հայրենիքը հանձնած կապիտուլանտին աջակցելը, դա կարող են անել միայն նրանք, ովքեր Արցախը բեռ են համարել Հայաստանի համար եւ հիմա, երբ այն Փաշինյանի դավաճան ձեռքով հանձնվել է թշնամուն, նրանք այդ համախմբմամբ շնորհակալություն են փորձելու հայտնել:
Եւ քանի որ Լեւոն Տեր-Պետրոսյանի՝ Նիկոլ Փաշինյանի աջակցության հարցով իղձերն իրականություն չդարձան, նա աջակցության նոր ձեռնարկով է հանդես գալիս՝ Փաշինյանին ֆիզիկական անվտանգության երաշխիքների հնարավորության հարցն առաջ քաշելով: Առաջին
նախագահը նախ շեշտում է, որ վարչապետն ու նրա հենարանը հանդիսացող քաղաքական ուժը, կրած խայտառակ պարտության համար պատասխանատվությունից խուսափելուց բացի, առաջնորդվում են ոչ թե պետության ամրապնդման եւ հզորացման մտահոգությամբ, այլ բացառապես իրենց իշխանությունն ամեն գնով պահպանելու անթաքույց մոլուցքով: Ուստի հնարավոր չէ Նիկոլ Փաշինյանի վարչապետությամբ արտահերթ ընտրությունների անցկացումը.<< Համաձայն եմ նաեւ հանրության մեջ հնչեցվող այն պնդումներին, որ իշխող ուժի կողմից կազմակերպված արտահերթ ընտրությունների անցկացման դեպքում, նրանք չեն խորշելու վարչական ռեսուրսների համատարած օգտագործումից, ինչի հետեւանքով բոլոր ընտրատեղամասերը կարող են վերածվել լարվածության օջախների: Համոզված եմ, որ այդ պարագայում մենք ականատես ենք լինելու Հայաստանի պատմության ամենախայտառակ ընտրություններին: Իսկ դա կարող է նշանակել Հայոց պետականության վերջը կամ երկարատեւ մղձավանջային գոյատեւումը>>, ասում է նա եւ եզրափակում<<Ուստի թե՛ պետության, թե՛ ժողովրդի, թե՛ նաեւ անձամբ վարչապետի շահերից բխող միակ ելքն, իմ կարծիքով, վերջինիս անհապաղ եւ ինքնակամ հրաժարականն է եւ Ազգային ժողովի կողմից անձեռնմխելիության իրավական երաշխիքների ապահովմամբ, նրա, թեկուզ ժամանակավոր, ապաստանումն արտերկրում: Այդ պարագայում վարչապետի պարտականությունները պետք է դրվեն անկուսակցական փոխվարչապետի վրա, որն իր չեզոքության հանգամանքով ունակ է ապահովելու արդար ընտրությունների անցկացումը»:
Տեր-Պետրոսյանն ըստ ամենայնի թելում է Սերժ Սարգսյանի թելը, բացում նրա խաղաքարտերը: Սերժ Սարգսյանն արմատական ընդդիմության դաշտում թերեւս միակն է, ով դեմ է Փաշինյանի վարչապետությամբ արտահերթ ընտրություններին, չի բացառվում, սա եւս Փաշինյան-Սարգսյան իշխանափոխության հնարավոր ծրագրի կետերից մեկն է, որը Սարգսյանը փորձում է այժմ լսելի դարձնել առաջին նախագահի միջոցով:
Իսկ եթե ծրագիրը հաջողվեց, Տեր-Պետրոսյանը թերեւս ընտրություններից իր <փայը> կստանա՝ ֆրակցիայի տեսքով, գումար, ինչպես որ աշխատում էր Սերժ Սարգսյանից նախկինում, կմեծանա նաեւ նրա որպես քաղաքական դերակատարի ազդեցությունը:
Անի Սահակյան
Հետևեք մեզ Viber-ում
