Ի՞նչ է անում Նիկոլ Փաշինյանը՝ բացի Պուտինին զանգելուց

Կրեմլի պաշտոնական կայքը հայտնել է, որ մարտի 11-ին և 12-ին Ռուսաստանի նախագահ Վլադիմիր Պուտինը հեռախոսազրույցներ է ունեցել Հայաստանի վարչապետ Նիկոլ Փաշինյանի և Ադրբեջանի նախագահ Ալիևի հետ:
Կրեմլի տարածած հաղորդագրության համաձայն` հեռախոսազրույցների ժամանակ քննարկվել են եռակողմ համաձայնագրի իրագործման գործնական ասպեկտները, և արձանագրվել է, որ հրադադարի ռեժիմը պահպանվում է, իսկ իրավիճակը տարածաշրջանում մնում է կայուն և հանգիստ: Նաև նշված է, որ Նիկոլ Փաշինյանն ու Իլհամ Ալիևը բարձր են գնահատել ռուսական խաղաղապահների գործունեությունը Լաչինի միջանցքի երկայնքում: Բացի այդ, Կրեմլը հայտնում է, որ Բաքվի և Երևանի հետ քննարկել է նաև Հարավային Կովկասում տնտեսական և տրանսպորտային կապերի ապաշրջափակման հետ կապված հարցեր:
Հատկանշական է սակայն, որ Հայաստանի վարչապետի պաշտոնական կայքում հրապարակված հաղորդագրության տեքստի բովանդակությունը շատ ավելի զուսպ է՝ չկան խաղաղապահներին ուղղված գովասանքի խոսքերը, ինչպես նաև շրջանցված են տնտեսական և տրանսպորտային ապաշրջափակման թեմաները։
<< Վարչապետ Նիկոլ Փաշինյանը հեռախոսազրույց է ունեցել Ռուսաստանի Դաշնության նախագահ Վլադիմիր Պուտինի հետ:
Կողմերը քննարկել են իրավիճակը տարածաշրջանում, շոշափել են 2020 թվականի նոյեմբերի 9-ի և 2021 թվականի հունվարի 11-ի եռակողմ հայտարարություններում ամրագրված դրույթների կատարման ընթացքը:
Ընդգծվել է տարածաշրջանում կայունության պահպանման կարևորությունը: Կողմերը մտքեր են փոխանակել նաև երկկողմ համագործակցության օրակարգի որոշ հարցերի շուրջ>>,- նշվում է ՀՀ վարչապետի պաշտոնական կայքում:
Երկու տեքստերի ակնհայտ տարբերությունը թերևս նշանակում է, որ կամ Պուտինը Ալիևի հետ ունեցել է այլ բովանդակության զրույց, որն առանձնապես չի համընկնում Փաշինյանի հետ խոսկացության բովանդակությանը, կամ էլ պաշտոնական Երևանը մտավախություններ ունի և խաղաղապահների և հաղորդուցիների շրջափակման առնչությամբ։
Մինչդեռ սկնհայտ է, որ Պուտինի հեռախոսազրույցը նպատակ է ունեցել զսպել զորավարժությունների պատրաստվող Ալիևի ծավալապաշտական ախորժակը։
Ընդամենը երկու օրից Ադրբեջանում կայանալու են զինավարժություններ և դրանցում բազմաթիվ փորձագետներ նոր պատերազմի սպառնալիք են տեսնում՝ հաշվի առնելով Ադրբեջանի նախագահ
Իլհամ Ալիևի հայտարարությունը, թե «Զանգեզուրն ադրբեջանական տարածք է», և որ «պատմական ադրբեջանական տարածքում պետք է ստեղծվի միջանցք դեպի Նախիջևան»: Ալիևի այս հայտարարությանը նախորդել էր պաշտոնական Բաքվի ՄԱԿ-ին հղած հատուկ նամակը, որտեղ կար պնդում, իբր հայկական կողմը Ադրբեջանի սահմաններին փորձում է հայկական զորքեր տեղակայել։
«Հայաստանը, կոպիտ խախտելով 2020 թվականի նոյեմբերի 10-ի եռակողմ համաձայնագիրը, «Լաչինի միջանցքով» գաղտնի կերպով Ադրբեջանի տարածք է ուղարկել հայկական զինված ուժերի կազմը՝ քաղաքացիական համազգեստով և քաղաքացիական տրանսպորտային միջոցներով, որպեսզի հնարավոր լինի խուսափել ռուսաստանյան խաղաղապահների կողմից իրականացվող ստուգման գործընթացից»,- նշում է Ադրբեջանի արտգործնախարար Ջեյհուն Բայրամովի նամակում` հասցեագրված ՄԱԿ-ի Գլխավոր վեհաժողովին և Անվտանգության խորհրդին։ Բայրամովը նաև շեշտել է, որ նման քայլերը տանում են իրավիճակի ապակայունացման:
Կարծես թե ակնհայտ է, որ Բաքուն և դիվանգիտական և սպառազինության ճակատներում ագրեսիայի դիմելու հող է նախապատրաստում։ Ալիևը, վստահաբար, փորձում է հնարավորինս շատ օգուտ քաղել տնտեսական և ռազմական առումնով թուլացած Հայաստանից՝ նրան պարտադրելով նոր զիջումներ։ Իսկ ի՞նչ է անում Հայաստանի ղեկավարը այս վտանգներին դիմագրավելու համար։ Ըստ էության ոչինչ՝ բացի Պուտինին զանգելուց։

Հայկ Դավթյան