Մոսկվայից արդեն բաց ասում են՝ չենք հասկանում ինչ է ուզում Հայաստանի ընդդիմությունը

Նիկոլ Փաշինյանն-Արմեն Սարգսյան՝ միմյանց հրամանագրեր ուղարկելու, հետ ուղարկելու պրոցեսը քաղաքական խորը ճգնաժամ է ի ցույց դնում ոչ միայն մեր հասարակության աչքում, այլև՝ գործընկեր պետությունների:

Ռուսաստանյան լրատվականների, տելեգրամյան ալիքների վերլուծություններից, օրինակ, «Սոլովյով լայվ» յութուբյան էջով հեռարձակվող քննարկումնից պարզ է դառնում, որ Ռուսաստանը, մեղմ ասած, համարում է, թե գլուխ չի հանում, թե ինչ է կատարվում Հայաստանում: Իրավիճակը համարվում է քաոսային, ոչ կայուն, ընդդիմության քայլերը՝ ոչ համարժեք:

Արդեն ռուսները սկսել են հեգնել Հայաստանի ընդդիմադիրներին, թե պարզվում է ցանկանում էին վճռական քայլ անել՝ բանակին աջակցելով, բայց հանկարծ վերջին պահին պարզեցին, որ նախագահի լիազորությունները թույլ չեն տալիս, այս կամ այն քայլն իրականացնել:

Ինչպես Հայաստանում հասարակության մեծ մասին մոտ, այնպես էլ Ռուսաստանում Օնիկ Գասպարյանին ՀՀ ԶՈՒ ԳՇ պետի պաշտոնից ազատելու Փաշինյանի որոշումն ընկալվեց, որպես ապտակ և բնական է, որ այդ ֆոնին ընկալվում էր, որ հասարակությունը բանակի կողքին, թույլ չի տա դա, և փողոց դուր գալով կլուծի Փաշինյանի իշխանության հարցը:

Բայց ինչ տեղի ունեցավ... Քաղաքական ուժերը, կարծես, թողնելով Օնիկ Գասպարյանին, մտել են նախընտրական արշավի փուլ:

Այս իրավիճակում, Ռուսաստանի պաշտոնյաներին այլ բան չի մնում, քան հայտարարելը, որ Մոսկվան չի խառնվում Հայաստանի ներքաղաքական գործերին:

Ռուսաստանն ակնկալում է, որ Հայաստանում ներքաղաքական իրավիճակը շուտափույթ կկարգավորվի, և հույս է հայտնում, որ այն չի հանգեցնի լարվածության Լեռնային Ղարաբաղում, նախօրեին լրագրողների հետ զրույցում հայտարարել է փոխարտգործնախարար Անդրեյ Ռուդենկոն։

«Մենք տեղի ունեցողը դիտարկում ենք որպես Հայաստանի ներքին գործ և չենք միջամտում այդ գործընթացներին, և որևէ կողմի չենք աջակցում։ Ուզում ենք, որ իրավիճակը որքան հնարավոր է արագ կայունանա, դրանից կշահեն բոլորը, այդ թվում՝ ղարաբաղյան կարգավորումը», - նշել է Ռուսաստանի փոխարտգործնախարարը։
Հարցին՝ կարո՞ղ է հայաստանյան ներքաղաքական ճգնաժամը հանգեցնել Ղարաբաղում նոր սրացման, Ռուդենկոն արձագանքել է․ - «Մարդիկ, ովքեր դրանով զբաղվում են, սխալ են հաշվարկում բոլոր հնարավոր սցենարները»։

Փոխարտգործնախարարը նշել է, որ Ռուսաստանը շարունակական կապի մեջ է հայկական կողմի հետ՝ դեսպանատան և այլ խողովակների միջոցով։

Անցյալ շաբաթ էլ Ռուսաստանի Դաշնության արտաքին գործերի նախարարության մամուլի խոսնակ Մարիա Զախարովան իր հերթին հայտարարեց, թե Հայաստանում տեղի ունեցող իրադարձությունները Հայաստանի ներքին գործն են, և դրա վերաբերյալ Մոսկվան որևէ այլ դիրքորոշում չի կարող ունենալ: «Դա ինքնիշխան պետության ներքին գործն է, դա այդ երկրում տեղի ունեցող քաղաքական գործընթաց է, ուստի, այստեղ որևէ ուրիշ գնահատական լինել չի կարող», - ասաց Զախարովան՝ «Խոսում է Մոսկվան» ռադիոկայանի թղթակցի հետ հարցազրույցում:

Ամբողջ խնդիրն այն է, որ Հայաստանում Փաշինյանի իշխանությունը հետպատերազմյան քաոսային մթնոլորտը, անկայուն իրավիճակը, ընդհանուր խորը ճգնաժամը տեղափոխել է ներքաղաքական կյանք: Ու սա տեսանելի է Հայաստանի բոլոր գործընկեր պետություններին: Իսկ այս մթնոլորտն անդրադառնում է պետության բնականոն գործունեության համար անհրաժեշտ ոլորտների վրա ՝ բացասական առումով և ունենալու է վատ հետևանքներ:

Ու ցավալին այն է, որ ոչ միայն Փաշինյանի իշխանության, այլև ընդդիմության գործողություններն արդեն ադեկվատ չեն համարվում:

Մետաքսյա Շալունց