Ա․ Դավթյանի նշանակումը մի նրբերանգ ունի
«Նախագահ Արմեն Սարգսյանը երեկ չստորագրեց Արտակ Դավթյանին ԳՇ պետի պաշտոնում նշանակելու հրամանագիրը, որի վերաբերյալ առաջարկություն է ներկայացրել վարչապետը։ Նա որոշում կայացնելու 3-օրյա ժամկետ ունի․ կա՛մ պետք է ստորագրի հրամանագիրը, կա՛մ առարկություններով հետ ուղարկի։ Երկու դեպքում էլ անմիջապես հայտարարություն կլինի։ Չնայած դրան՝ Նիկոլ Փաշինյանը, հերթական անգամ խախտելով ՀՀ Սահմանադրությունը, երեկ շտապեց ԳՇ և ներկայացրեց Արտակ Դավթյանին։
Մեր երկրում օրենքը, փաստորեն, պահում են բոլորը՝ բացի իշխանավորներից։ Դավթյանի նշանակումը մի նրբերանգ ունի՝ նրա ԳՇ պետ աշխատած շրջանում զենք-զինամթերք ձեռք բերելու գործարքների շուրջ քրեական գործ կա հարուցված, և Պատրոն Դավիթը կալանավորված է։ Եթե այդ գործարքներն անօրինական են, և վատ զենք է մատակարարվել, ապա պետք է մեղադրանք առաջադրվի առաջին հերթին ԳՇ պետին, ապա՝ մատակարարին, ուստի Դավիթ Գալստյանին բռնելը, իսկ Արտակ Դավթյանին նման բարձր պաշտոնի նշանակելն անհամատեղելի են։ Մյուս կողմից՝ Դավթյանի ԳՇ պետ նշանակվելը Անդրանիկ Քոչարյանի պլանների վրա մի մեծ տապանաքար է դնում։ Վերջինս ՊՆ մատակարարումների դաշտ մտնելու ծրագրեր ուներ, որը կարող էր իրականացնել Վաղարշակ Հարությունյանի, բայց ոչ Դավթյանի պաշտոնավարման դեպքում։ Վերջինս իր հարցազրույցներից մեկում ուղիղ տեքստով ասել էր․ «Անդրանիկ Քոչարյանն ամեն ինչ արել է, որ չլինի նորմալ, կառուցողական աշխատանք՝ փորձել է խառնվել կադրային նշանակումներին, մատակարարումներին, որոշումների ընդունման գործընթացին»։
Ի դեպ, Արտակ Դավթյանը պատերազմի օրերին ազատվեց Ռազմարդյունաբերության կոմիտեի նախագահի պաշտոնից, և իշխանական քարոզչամեքենան դա ներկայացնում էր որպես թույլ տված ձախողումների հետևանք»,-գրում է թերթը:
Նյութն ամբողջությամբ կարդացեք «Հրապարակ» թերթի այսօրվա համարում:
Հետևեք մեզ Viber-ում
