Ժամանակը գնում է. ով կարող է հեռացնել Փաշինյանին
Հետպատերազմական Հայաստանում էլ մարդ, կառույց եւ ինստիտուտ չմնաց, որ չպահանջեց կապիտուլանտ Նիկոլ Փաշինյանի եւ իր իշխանության հեռացումը՜ Գիտությունների ազգային ակադեմիա, տարբեր բուհերի խորհուրդներ, կաթողիկոսներ, նախագահներ, մտավորականներ, համայնքապետեր, բոլոր բոլորը , ինչպես նաեւ քաղաքակա ուժեր, որոնցից մի քանիսը հազարավոր էլեկտորատ ունեն: Սակայն Նիկոլ Փաշինյանը երկու ոտքը մի կոշիկի մեջ դրած չի հեռանում իշխանությունից: Այս մարդու համար ժողովրդի կամը պետք է երեւա փողոցում, հենց սրանով էր պայմանավորված նրա մարտիմեկյան հավաքը: Մարդը վարչական ողջ ռեսուրսները կիրառեց, որպեսզի ընդդիմությանը ցույց տա, որ իր կողքին ավելի շատ ժողովուրդ կա:
Նոյեմբերի 9-ից հետո շուրջ չորս ամիս է Հայաստանում ներքաղաքական լարումը որեւէ կերպ չի թուլանում: Հայաստանում ուղիղ չորս ամիս է գրեթե չի դադարում փողոցային պայքարը, որը գեներացրել են 17 եւ ավելի ուժերը: Լավ է, թե վատ պայքարի նրանց մեթոդները, մարտավարությունը, հարթակից հնչող ելույթներն ու կոչերը, ընդունելի են, թե ոչ 17-ն ու նրանց լիդերները, հարցի մյուս կողմն է, իսկ գլխավորն այն է, որ շնորհիվ այս ուժերի Հայաստանը, հայ ժողովուրդը փրկվեց ազգային խայտառակությունից: Եթե այս պայքարն էլ չլիներ, կստացվեր, որ կապիտուլանտը վաճառեց մեր հայրենիքը, մատաղ արեց հինգ հազարից ավել մեր երիտասարդներին, հազարավոր ճակատագրեր խեղեց, այսօր էլ Սյունիքի ու Տավուշի համայնքներն է իր ադրբեջանցի գործընկերների հետ սակարկում, բայց որեւէ մեկը չի ընդվզում կատարվածի հետ: 17-ին ու նրանց գործողությունները քննադատող քաղաքացիները, որոնք նաեւ պահանջում են Նիկոլ Փաշինյանի հրաժարականը, պետք է այսօր հասկանան, որ Նիկոլ Փաշինյանը մարտահրավեր է կախված Հայաստանի գլխին ու նրա ցանկացած օրը իշխանության ղեկին տանում է մեր պետականության կորստի: Ուստի այսօր պատեհ պահը չէ սիմպատիաներով, հակակրանքներով առաջնորդվելու համար: Վաղը, երբ գա ընտրության պահը, յուրաքանչյուր ոք կընտրի նրան, ում ինքն է ուզում: Հատկապես բանակի հնչեցրած ահազանգից, կոչից հետո տանը նստելը կնշանակի աջակցել Նիկոլ Փաշինյանին:
Բբանակն իր խոսքն ասել է, հիմա քաղաքացիների գործելու ժամանակն է: Քաղաքական այն ուժերն էլ, որոնք 17-ի մեջ չեն, բայց նաեւ Նիկոլ Փաշինյանին են դեմ, հույս չունենան, թե հարվածելով, վարկաբեկելով նրանց կհեռացնեն հարթակից եւ իրենք կփորձեն իրենց բախտը: Ժամանակը Հայաստանի օգտին չի գնում եւ ամե րոպեն կարող է ճակատագրական լինել աշխարհի խոշոր խաղացողների շահերի կիզակետում հայտնված Հայաստանի համար:
Անի Սահակյան
Հետևեք մեզ Viber-ում
