Պուտինի ապտակը, խնդրանքն ու նախազգուշացումը
Հաքերները` «ինչպես ազատ նկարիչները». Պուտինի անկեղծ խոստովանությունը Ռուսաստանի նախագահ Վլադիմիր Պուտինն օրերս պատասխանելով արտասահմանցի լրագրողների հարցերին՝ չի բացառել, որ «հայրենասեր ռուս հաքերները» կարող էին միջամտել տարբեր երկրներում ընտրական գործընթացներին: «Հաքերները նկարիչների պես ազատ մարդիկ են և տեսականորեն հնարավոր է, որ, հայրենասիրական զգացմունքներից ելնելով, ինչ-որ բան են արել», - ասել է Պուտինը՝ հավելելով, որ «պետական մակարդակով Ռուսաստանը նման բաներով չի զբաղվում և չի զբաղվելու»: «Ես խորը համոզմունք ունեմ, որ հաքերները չեն կարող էականորեն ազդել ընտրական գործընթացների վրա», ասել է ՌԴ նախագահը և շարունակել, թե «հնարավոր է, որ ինչ-որ մեկը հատուկ է նման բան անում և այդ շղթան այնպես ներկայացնում, որ հաքերային հարձակման աղբյուրը Ռուսաստանը լինի»։ Նկատենք, որ այդ հայտարարությունից ընդամենը մեկ օր առաջ Պուտինը ասել էր, որ ՌԴ-ն պետական մակարդակով չի զբաղվում ցանցահենային հարձակումներով, և ջանում է պայքարել նրանց դեմ։ Նա չի բացառել, որ ցանցահենները կարող էին հայրենասիրական նկատառումներով «իրենց ավանդը ներդնել պայքարում նրանց դեմ, ովքեր վատ են արտահայտվում Ռուսաստանի հասցեին»։ Հիշեցնենք, որ ամերիկյան հատուկ ծառայությունները ՌԴ-ին մեղադրում են ամերիկյան նախագահական վերջին ընտրություններին միջամտելու մեջ: Վաշինգտոնը հայտարարել է, որ Պուտինը կարող էր անձամբ կարգադրել ԱՄՆ Դեմոկրատական կուսակցության հետ կապ ունեցող քաղաքական խմբերի նկատմամբ համակարգչային հարձակումների կազմակերպումը: Կրեմլը հերքում էր այդ մեղադրանքները: Սանկտ Պետերբուրգում անցկացված ավանդական միջազգային տնտեսական ֆորումին Պուտինը հանդիպել է միջազգային լրատվամիջոցների ղեկավարների հետ և պատասխանել նրանց հարցերին: ՌԴ ղեկավարն ընդգծել է, որ երկիրը պայքարում է իր ազգային շահերի համար, սակայն նրան «փորձում են կանգնեցնել՝ դիմելով միջազգային իրավունքին հակասող գործողությունների»: Ռուսատյացությանը վերաբերող հարցին Ռուսաստանի նախագահն արձագանքել է․ - «Դրա հիմքում բազմաբևեռ աշխարհի կայացումն է, ինչը դուր չի գալիս մոնոպոլիստներին։ Նման տրամադրությունները, սակայն, երկար չեն տևի, իրավիճակը դեպի լավն է փոխվում, ռուսառյացությունը նվազում է»: Ի պատասխան գերմանացի լրագրողի հարցին, Պուտինն ասել է, որ չի աջակցում առաջիկայում Գերմանիայում կայանալիք ընտրություններին մասնակցող քաղաքական գործիչներից որևէ մեկին․«Մեզ միևնույն է ում հետ աշխատել։ Կարևոր է, որ այդ մարդիկ, ինչպես մենք՝ ռուսական կողմը, արդյունավետ համագործակցելու ցանկություն ունենան»։ Ինչ վերաբերում է կանցլեր Մերկելին, Պուտինի փոխանցմամբ, իրենք ունեն և՛ տարաձայնություններ, և՛ ընդհանրություններ։ ՌԴ-ի և Ճապոնիայի միջև վեճի առարկա հանդիսացող Հարավկուրիլյան կղզիների մասին հարցին ի պատասխան՝ Պուտինն հայտարարել է, թե սպառազինությունների մրցավազքը նախաձեռնողը ռուսական կողմը չէ: Այդուամենայնիվ Մոսկվան, Պուտինի պնդմամբ, մտադիր չէ անգործ նայել, թե ինչպես է ԱՄՆ-ը հակակհրթիռային համակարգեր տեղադրում Հարավային Կորեայում: ՌԴ-ԱՄՆ համագործակցության հիմքը փլուզված է, բայց... Ռուսաստանի և ԱՄՆ-ի հարաբերությունները գտնվում են ամենացածր մակարդակի վրա «սառը պատերազմի» տարիներից ի վեր, ասել է Պուտինը՝ ելույթ ունենալով Սանկտ Պետերբուրգի միջազգային տնտեսական համաժողովի շրջանակում երկու երկրների գործարարների հետ հանդիպմանը: Պուտինի խոսքով՝ Մոսկվան ու Վաշինգտոնը կապի մեջ են միջազգային հարթակներում, սակայն երկկողմ համագործակցության հիմքը փլուզված է: Միևնույն ժամանակ, նա հավաստիացրել է, թե ՌԴ-ն շարունակելու է երկխոսությունը ԱՄՆ նախագահ Դոնալդ Թրամփի հետ, և խնդրել է ամերիկյան բիզնեսին օգնել այդ հարցում: «Օգնեք մեզ՝ վերականգնելու նորմալ քաղաքական երկխոսությունը: Ես ձեզ խնդրում եմ Ռուսաստանի անունից եւ դիմում եմ ամերիկյան կողմին՝ օգնեք ԱՄՆ-ի նորընտիր նախագահին եւ նոր վարչակազմին»,-ասել է Պուտինը: Միայն ԱՄՆ-ի հետ ամուր առեւտրական ներդրումային կապերը կարող են ռուս-ամերիկյան հարաբերությունները պաշտպանել քաղաքական կոնյունկտուրայի տատանումներից, ընդգծել է Պուտինը: Իսկ ՆԱՏՕ-ում` «միայն վասալներ» են Պուտինը ՆԱՏՕ-ն անվանել է ԱՄՆ-ի արտաքին քաղաքական գործիքը, որում միայն վասալներ կան, այս մասին նա ասել է ռեժիսոր Օլիվեր Սթոունին տված հարցազրույցում, որից մի մաս հրապարակել է Politico պարբերականը: «Այսօր դա ԱՄՆ-ի արտաքին քաղաքական գործիքն է, այնտեղ դաշնակիցներ չկան, այնտեղ միայն վասալներ կան»,- ասել է նա: Պուտինի խոսքով՝ երբ երկիրը ՆԱՏՕ-ի անդամ է դառնում, նրա համար արդեն շատ դժվար է լինում ԱՄՆ-ի՝ «ՆԱՏՕ-ի խոշոր առաջնորդ երկրի» ճնշմանը դիմակայելը: Պուտինի խոսքով՝ Ռուսաստանը դրա հետ կապված հակամիջոցներ է ձեռնարկում, սակայն ընդհանուր առմամբ, «իրավիճակը լարում է»: «Մեզ ի՞նչն է անհանգստացնում: Մեզ անհանգստացնում է որոշումներ ընդունելու պրակտիկան: Ես գիտեմ՝ դրանք ինչպես են ընդունվում»,- հավելել է ՌԴ նախագահը: Թամար Բագրատունի