Ծառուկյանը կանգնած է բարդ քննության առջեւ
Նոյեմբերի 9–ի խայտառակ կապիտուլյացիայից հետո Նիկոլ Փաշինյանը պարբերաբար առաջարկում է գնալ արտահերթ ընտրությունների։ Հատկապես երբ ճնշումն իր նկատմամբ մեծանում է, ինքն է արտահերթ ընտրություններ առաջարկում, երբ որ մի քիչ թուլանում է ճնշումը, հայտարարում է, որ արտահերթի հանրային պահանջ չկա։
Գլխավոր շտաբի հայտնի հայտարարությունից հետո նա կրկին արտահերթ է առաջարկում եւ անհամ հանրահավաք արեց, որպեսզի ցույց տա, թե ինքն էլ ունի հանրային վստահություն եւ չի կարող Հայրենիքի փրկության շարժման առաջարկած օրակարգով իշխանությունը հենց այնպես հանձնել ընդդիմությանը եւ ուրեմն պետք է ընտրության գնա: Սակայն, եթե Փաշինյանն իրոք ուզում է գնալ արտահերթ խորհրդարանական ընտրությունների, ապա դրա լուծումն իր ձեռքում է։
Համաձայն ՀՀ սահմանադրության՝ արտահերթ խորհրդարանական ընտրություններ են լինում այն դեպքում, երբ խորհրդարանը երկու անգամ անընդմեջ չի կարողանում վարչապետ ընտրել։ Դա նշանակում է, որ Նիկոլ Փաշինյանը պետք է հրաժարական տա, որից հետո նրա ուսապարկային մեծամասնություն «Իմ քայլը» երկու անգամ վարչապետ չընտրի։
Նիկոլ Փաշինյանը մեծամասնություն ունի խորհրդարանում, բայց չի վստահում իր մեծամասնությանը։ Նա վախենում է հրաժարական տալ, քանզի երաշխիք չունի, որ «Լուսավոր Հայաստանը» կամ «Բարգավաճ Հայաստանը» սեփական թեկնածու չեն առաջադրի, ինչպես նաև երաշխիք չունի, որ իր ուսապարկերից մի քանիսը չեն անցնի ընդդիմության կողմը:
Ահա այդ վախերի պատճառով է նա առաջարկում ԼՀԿ–ին ու ԲՀԿ–ին պայմանավորվել, որ իր հրաժարականի դեպքում խորհրդարանական ընդդիմությունը վարչապետի սեփական թեկնածու չի առաջադրի։ Էդմոն Մարուքյանը նախկինում ձեւ էր թափում, ասում, որ ԼՀԿ–ն վարչապետի սեփական թեկնածու ունի։ ԲՀԿ–ն նույնպես չէր ընդունում առաջարկը։
Հիմա Մարուքյանը հայտարարեց, որ պատրաստ է Նիկոլ Փաշինյանի ուզած սցենարով գնալ։ Նրանից այլ բան չէր էլ սպասվում․ հաճախորդը մնում է հաճախորդ, նա եղել եւ մնում է Նիկոլ Փաշինյանի դհոլչին, ինչպես ժամանակի Սերժ Սարգսյանինն էր եւ երբ, որտեղ պետք է, նա իր ձայնը հանում է, ինչպես, որ այսօր , իսկ դրա գինը մի քանի մանդատն է: Ի դեպ, նա եւս հանդիպել է Օնիկ Գասպարյանի հետ եւ խնդրել, որ չգնա առճակատման:
Ինչ մնում է Գագիկ Ծառուկյանին, դեռ պարզ չէ, թե ԲՀԿ–ն ինչպես կպահի իրեն։ Ամեն ինչ պարզ կդառնա Ծառուկյան–Փաշինյան հանդիպման արդյունքում։ Թեեւ բանակի՝ ԳՇ հայտարարությունից հետո կարելի էր ընդհանրապես կտրուկ մերժել Նիկոլ Փաշինյանի առաջարկը՝ հիմնավորմամբ, որ եթե բանակն է գտնում, որ նա պետք է հրաժարական տա, այլեւս որեւէ հարց քննարկման ենթակա չէ: Փրկության շարժման մյուս առաջնորդները դեռեւս պահում են արտահերթի մասով հստակ դիրքորոշումը, անգամ Ռռոբերտ Քոչարյանը իր հարցազրույցներում առաջնահերթ շեշտադրում է ծարժման օրակարգը եւ ասում, որ աջակցում է, իսկ արտահերթ ընտրությունների մասնակցության հարցը երկրորդական է, որին իր պատրաստակամությունն է հայտնում: Հետեւաբար Գագիկ Ծառուկյանը կանգնած է իր կյանքի հերթական կարեւորագույն քննության առջեւ՝ կամ ընտրում է դավաճան հողատուիր օրակարգը, կամ շարունակում է մնալ ընդդիմության հետ:
Անի Սահակյան
Հետևեք մեզ Viber-ում
