Աբսուրդի թատրոն. Տիրան Խաչատրյանը կվերանշանակվի՞

Նիկոլ Փաշինյանն այլեւս անհույս մոլագար է հիշեցնում, ով ամուր կառչել է իր աթոռից ու հանուն իշխանության պատրաստ է ամեն ինչ տրորելով անցնել: Եռաբլուրի ասպատակությունից հետո թվում էր, թե Նիկոլ Փաշինյանի խիղճը չպետք է հանգիստ ունենար ամբոխի սմբակների տակ կոխկրտված հերոսների շիրիմնեի ծանրությունից, բայց ոչ, հանուն սեփական իշխանության պահպանման պատրաստ է անգամ ձայնով լացել հրապարակում՝ հուզված ղեկավարի կերպար բեմադրել, Մարտի 1-ի զոհերի ոգեկոչմանը նվիրված սգո երթն առաջնորդել գոռգոռոցի ներքո, ծափերի ու դըմփ-դըմփ-հու-ների ներքո:

Ավելի քան հինգ հազար զոհերի, տաս հազար վիրավորների, անհետ կորածների, գերիների , կորսված հայրենիքի պատասխանատու այս մոլագարը հանուն իշխանության պատրաստ է միջազգային սկանդալներ սարքել, հետո այնպիսի ստեր հորինել, որ դրանք դառնան մեծ խառնակչության պատճառ, կարող է դեմ դուրս գալ մեր անվտանգության երաշխավորի՝ բանակի դեմ:
Անդրադառնանք Փաշինյանի՝ հանրահավաքում ունեցած ելույթի առանցքային դրվագներին: Մի քանի օր վարչական ռեսուրսի, ադմինիստրատիվ լծակների միջոցով մարդաորսի դուրս եկած այս իշխանության պարագլուխ Նիկոլ Փաշինյանի հիստերիկ տոնը, հուզմունքը եւ վարքային այլ դրսեւորումներ ցույց տվեցին, որ շեֆն այնքան էլ գոհ չէ Հրապարակի թվից եւ այդ բացը փորձում է լրացնել դերասանական տաղանդով: Հանրային իրական աջակցություն ունենալու դեպքում, չկասկածեք, որ Փաշինյանն օրումեջ հանրահավաք կհրավիրեր ու կփորձեր պարտադրել իր տեսակետը, նա այդ տեսակն է, մարդը գերիների, սահմանների եւ այլ հրատապ հարցերը թողած իր ողջ ժամանակն ու ռեսուրսներն ուղղում է իր աթոռը պահելու գործին: Առավել եւս արտահերթ ընտրության առաջարկ չէր անի, ընդամենը շաբաթներ առաջ ասացին՝ չկա հանրային պահանջ, հարցը փակված է. հիմա, երբ առավել եւս հանրային պահանջը ստուգելու երկու քաղաքական միջոցառում անցկացրեց՝ հանրահավաքի տեսքով, ինչու է արտահերթ մուրում:

Նա իր լսրանի առջեւ Գյուլնազ տատի հեքիաթներով փորձում էր մաքուր երեւալ, ասել, որ իրենից բացի բոլորը մեղավոր են:

Նա ասաց, որ ԳՇ պետ Օնիկ Գասպարյանն իր հայտարարությունն արել է Սերժ Սարգսյանի հրահրմամբ.<< Այլոց շարքում, այդ թվում Սերժ Սարգսյանն է Զինված ուժերի որոշ գեներալների շրջանում իր ազդեցությունն օգտագործելով նրանց փորձել դրդել՝ դուրս գալ պետության ու ժողովրդի դեմ>>:
Հետաքրքիր է՝ Աննա Հակոբյանն էլ էր պատերազմի 44 օրերին Սերժ Սարգսյանի ազդեցությամբ բարոյական աջակցություն ցուցաբերում հրամանատարական բունկերում, իսկ միգուցե Նիկոլ Փաշինյանն ինքն է Սերժ Սարգսյանի ազդեցության տակ եղել, որ պատերազմի երրորդ օրը չի լսել Օնիկ Գասպարյանի՝ պատերազմը կանգնեցնելու հորդորը, չի ընդունել Պուտինի առաջարկը՝ առանց Շուշիի հարցի, կամ էլ Սերժ Սարգսյանի ազդեցությամբ է ինքը նոյեմբերի 9-ին կապիտուլացիայի փաստաթուղթ ստորագրել: Եթե Նիկոլ Փաշինյանը կընդունի, որ այդպես է, ապա կարելի հավատալ իր հեքիաթին:
Երեկ կեսօրին էլ մեկ ուրիշ զավեշտ բացահայտեց՝ իր խոսնակի շուրթերով, ասելով, թե իբր Իսկանդերի մասին իր հայտարարության պատճառն այն է, որ իրեն ԳՇ-ից սխալ են զեկուցել իրավիճակը:
Եթե հավատանք այս զավեշտին, ապա Նիկոլ Փաշինյանը պետք է ներողություն խնդրի գեներալ Տիրան Խաչատրյանից ու վերականգնի աշխատանքում, ներողություն խնդրի նախագահ Արմեն Սարգսյանից։ Չէ՞ որ ամեն ինչ սխալ զեկուցելուց սկսեց։ Եվ առանձնահատուկ ներողություն պետք է խնդրի ռուսներից: Հհամաձայնեք, որ Փաշինյանը կարեկցանքի է արժանի եւ ամեն խոսքը հակասում է նախորդին:

Անի Սահակյան