Արագ ձևավորել անցումային կառավարություն. ԳՇ-ն, ուժայինները կկանգնեն այդ իշխանության կողքին. Անդրանիկ Միհրանյան (video)

Ռուսաստանաբնակ քաղաքագետ Անդրանիկ Միհրանյանը hayeli.am-ի հետ զրույցում անդրադարձել է Հայաստանի ներքաղաքական իրավիճակին. «Գործող իշխանությունը կորցրել է իր հեղինակությունը, իր լեգիտիմությունը և գործուն հնարավորություններ չունի որոշումներ ընդունել ու դրանք ռեալիզացնել: Նշեմ նաև, որ միջազգային համայնքում, ինչպես նաև Հայաստանի ներսում հայկական պետականությունը կորցրել է իր սուբեկտայնությունը: Այս իրավիճակում անհրաժեշտ է շատ արագ ստեղծել անցումային իշխանություն, մանավանդ որ դրա հնարավորություններն արդեն կան: Իմ կարծիքով ընդդիմությունը մի քիչ ուշանում է: Մենք պատմության մեջ ունենք այսպիսի օրինակներ: Այսօրվա իրականության մեջ, երբ Հայաստանի գործող իշխանություններին չի ընդունում բանակը, չի ընդունում նախագահը, չեն ընդունում հոգևոր երկու առաջնորդները, տարբեր համայնքներ, Սյունիքն ամբողջությամբ չի ընդունում, ուրեմն այս պահին ինստիտուցիոնալ ձևով պետք է ձևավորվի նոր ժամանակավոր կառավարություն և վստահաբար կարող եմ ասել, որ վերոնշյալ թվարկածներս կհամախմբվեն անցումային կառավարության շուրջ: Այդ ժամանակից մենք կարող ենք ունենալ իշխանություն և մեր պետությունն ու ժողովուրդն այլևս անտեր չեն լինի: Եթե ձևավորվի ժամանակավոր կառավարություն, ես կարծում եմ՝ Գլխավոր շտաբը, ուժայինները կկանգնեն այդ կառավարության կողքին ևս, այլապես, եթե այս իշխանությունը շարունակի իր լիազորություններն իրականացնել, ապա ԳՇ սպայական կազմը դուրս կշպրտվի պարզապես ու իշխանութունը կգնա ռեպրեսիվ քայլերի»: 

Անդրանիկ Միհրանյանը համոզված է, որ անցումային, ժամանակավոր կառավարություն ստեղծելու դեպքում, այն կարող է շատ արագ հրահանգ իջեցնել, որպեսզի ուժայինները ձերբակալեն ու դատական գործ սկսեն այս իշխանության նկատմամբ, որպեսզի բացահայտվեն գործող իշխանության հանցագործությունները. «Եթե ձևավորվի անցումային ժամանակավոր կառավարություն և ուժայինները ենթարկվեն այդ կառավարությանը, ապա դա չի կարող ռազմական հեղաշրջման փորձ դիտարկվել»: