Փաշինյանական մղձավանջ. Հայաստանի միակ դաշնակիցները Էրդողանն ու Ալիևն են
Միայն մղձավանջային երազներում կարելի է տեսնել, որ Հայաստանը կապրի օրեր, երբ մեր հակառակորդ Թուրքիան ու Ադրբեջանը հայաստանյան ներքաղաքական իրավիճակի վերաբերյալ կարտահայտվեն... Այդ օրն էլ իրականություն դարձավ...
Ուրեմն, Թուրքիան ու Ադրբեջանը, որոնք Հայաստանի հետ ոչ միայն դիվանագիտական հարաբերություններ չունեն, այլև դեռևս խաղաղության համաձայնագիր չեն ստորագրել, դեռ Թուրքիան Հայաստանի հետ սահման չի բացել ու հանկարծ, երբ Հայաստանի ընդդիմությունը փորձ է անում հասարակական ընդվզումը պիկի հասցնել՝ պահանջելով Փաշինյանի հրաժարականը, Թուրքիան ու Ադրբեջանը կրկնում են նախ Փաշինյանի տված գնահատականն ու դատապարտում այն...
Ինչպես հայտնի է, երեկ Փաշինյանը Գլխավոր շտաբի հայտարարությունը որակեց որպես՝ «ռազմական հեղաշրջման փորձ»: Ժամեր անց, պարզվեց, որ այդ գնահատականը արձագանք է ստանում մեկ իմքայլականների, մեկ էլ Թուրքիայի և Ադրբեջանի իշխանությունների մոտ:
«Մի քանի օր առաջ տեղեկություններ են ի հայտ եկել այն մասին, որ Հայաստանի դաշնակիցները կրկին ցանկանում են թարմացնել հայկական բանակը, արդիականացնել այն։ Ինչի՞ համար։ Ո՞ւմ դեմ»,- ասել է Ադրբեջանի նախագահ Իլհամ Ալիևը՝ չհնչեցնելով, սակայն, Հայաստանի դաշնակցի անունը։ «Պատերազմն ավարտված է։ Եթե ինչ-որ մեկն ապրում է ռևանշիստական գաղափարներով, ապա կտեսնի այս բռունցքը։ Թող չփորձարկեն մեր համբերությունը», - հերթական անգամ սպառնացել է Ալիևը և հավելել. - «Հայկական բանակ այլևս չկա և չպետք է լինի։ Մենք երբեք թույլ չենք տա, որպեսզի մեզ համար սպառնալիք ստեղծվի, կամ ազատագրված տարածքներ վերադարձող մեր քաղաքացիների համար վտանգներ ի հայտ գան»: Նա միևնույն ժամանակ պնդել է, որ ի տարբերություն հայկական բանակի՝ ադրբեջանական զինված ուժերը կշարունակեն ուժեղանալ։ Ալիևի խոսքով՝ Ադրբեջանը ձեռք է բերում և ձեռք կբերի ժամանակակից սպառազինություն, այդ երկրի զինված ուժերում տեղի ունեցող բարեփոխումներն էլ, ըստ նրա, թույլ կտան ավելի օպերատիվ և մարտունակ բանակ ունենալ։ «Մեր զինված ուժերի կատարելագործումը շարունակվում է, կնքված են նոր պայմանագրեր, մենք ձեռք ենք բերում աշխարհում ամենաարդիական զենքը, այն արդեն բերվում է Ադրբեջան, մատակարարումը շարունակվում է»,- այսօր ասել է Ալիևը: Նա նշել է, թե «պատերազմը Ղարաբաղում հրատապ է դարձրել ապագայում բանակն արդիականացնելու հարցը»: «Բարեփոխումները կլինեն ավելի ճկուն, դրանք ուղղված կլինեն ավելի մրցունակ բանակ ստեղծելուն»,- նշել է Ալիևը:
Այնուհետև «Ինտերֆաքս» լրատվական գործակալությունը, հղում անելով «Անադոլու» թուրքական լրատվական գործակալության հաղորդագրությանը, հայտնեց, թե Անկարայում «վճռականորեն դատապարտում են Հայաստանում հեղաշրջման փորձը»: «Անադոլու» գործակալության փոխանցմամբ, Թուրքիայի արտաքին գործերի նախարար Մևլութ Չավուշօղլուն հայտարարել է, թե Անկարան «դեմ է ռազմական հեղաշրջմանը որևէ երկրում»:
Եթե պատերազմից հետո շուրջ 3 ամիս մեզանում խոսակցությունների, կասկածների, ենթադրությունների մակարդակում էին տեսակետները, որ մեր տարածաշրջանում թուրքական ծրագիր է գործել և դրա հիմքում մարդիկ համոզում էին հայտնում, որ Փաշինյանի իշխանության բոլոր քայլերը պատերազմի օրերին վկայում են այն մասին, որ այդ պատերազմի ելքն ի սկզբանե որոշած են եղել, ապա հիմա, երբ Անկարան ու Բաքուն միաբերան պաշտպանում են Փաշինյանի իշխանությանը, ավելին՝ սատար են կանգնում նրա իշխանությանը, էլ ի՞նչ ուրիշ բացատրություն կարելի է տալ այս երևույթին:
Հայաստանի ներքաղաքական որևէ գործընթացի վերաբերյալ Հայաստանի անկախության 3 տասնամյակների ընթացքում Թուրքիայից ու Ադրբեջանից որևէ գնահատական լսել էի՞նք... Ինչո՞ւ են Էրդողանն ու Ալիևն այդպես գուրգուրում ու դողում Փաշինյանի իշխանության համար...
Այս հարցի պատասխանը առավել քան խոսուն է ու տրամաբանական. Անկարայի ու Բաքվի համար Փաշինյանը «դաշնակից է», մի դաշնակից, որը Հայաստանի իրական դաշնակցի ու գործընկերների հետ հարաբերությունները ոչնչացրել է ու շարունակում է ոչնչացնել: Ուրիշ ապացույցներ պետք չեն: Փաշինյանը գերադասում է թուրքերի ու ադրբեջանցիների հետ գաղտնի պայմանավորվածությունները, քան՝ Հայաստանի իրական դաշնակիցների ու գործընկերների հետ լիարժեք հարաբերությունները ի շահ Հայաստանի:
Հետևաբար՝ ի՞նչ է սա, եթե ոչ դավաճանություն ընդդեմ Հայաստանի, Արցախի և Հայաստանի ու Արցախի քաղաքացիների:
Հետևեք մեզ Viber-ում
