Հայկական ապրանքների «կրքեր» հիմա էլ Ադրբեջանո՞ւմ
Ադրբեջանը գյուղատնտեսական ապրանքներ է ներկրում Հայաստանից և Լեռնային Ղարաբաղից, հայտնել է օրերս Meydan TV անկախ լրատվական կայքը` վկայակոչելով ադրբեջանցի տնտեսագետ Վահիդ Մեգերամովին: «Կարող եմ լիակատար վստահությամբ ասել, որ Վրաստանից ստացվող կարտոֆիլը հանդիսանում է հայկական արտադրանք: Վրաստանի գյուղատնտեսական շուկա Հայաստանից հասնում է ոչ միայն կարտոֆիլ, այլ նաև խոշոր և մանր եղջերավոր անասուններ, մրգեր, մասնավորապես՝ ծիրան»,- նշել է փորձագետը՝ մեկնաբանելով նորությունն այն մասին, որ Ադրբեջան ներկրվող կարտոֆիլի հիմնական մասը ստացվում է Վրաստանից: Մագերամովի խոսքերով` միայն Լեռնային Ղարաբաղի տարածքում գտնվող անասնապահական տնտեսությունից այս տարի Վրաստան է ուղարկվել 700 հազար գլուխ խոշոր եղջերավոր անասուն, որոնց մի մասն այնուհետև հասել է Ադրբեջան՝ արդեն վրացական պիտակով: Հոդվածի վերջում ադրբեջանական պարբերականը նշում է, որ ի տարբերություն Ադրբեջանի գյուղատնտեսական ապրանքների, հայկական ապրանքները ունեն բարձր որակ և էկոլոգիապես մաքուր, իսկ Հայաստանի և Լեռնային Ղարաբաղի հետ խաղաղ պայմանագիր կնքելու դեպքում Ադրբեջանը կկարողանա գնել որակյալ ապրանքներ ավելի ցածր գնով, այլ ոչ թե դրանք կներկրի Վրաստանից: Այսպիսով, Ադրբեջանում պնդում են՝ Վրաստանից ներկրվող կարտոֆիլը հայկական է: Ադրբեջանական պաշտոնական աղբյուրները առայժմ չեն մեկնաբանում երկիր ներմուծվող հայաստանյան ծագման արտադրանքի մասին պնդումները: Հայաստանի հետ պաշտոնական տվյալներով ապրանքաշրջանառություն չունեցող Ադրբեջանում ժամանակ առ ժամանակ հաղորդում են միայն, որ Մաքսային իրավախախտումների դեմ պայքարի գլխավոր վարչության կողմից առգրավվել է Վրաստանի տարածքով երկիր ներմուծված հայկական արտադրության ապրանք և անմիջապես էլ ոչնչացվել: Վերջին միջադեպը անցյալ ամիս էր: Ըստ պաշտոնական հաղորդագրության, որ հրապարակել են ադրբեջանական լրատվամիջոցները, ադրբեջանցի սահմանապահները առգրավել են հայկական արտադրության ապրանքների խմբաքանակ՝ այդ թվում 17 միավոր սպիրտային ըմպելիք, ինչպես նաև գյուղատնտեսական արդյունաբերական ապրանքներ: Հիշեցնենք, վերջերս Հայաստանում հանրային մեծ հնչեղություն ստացավ ադրբեջանական ծագման խնձորի ապօրինի ներկրման փաստը, քրեական գործ հարուցվեց, որով մեղադրանք առաջադրվեց 8 անձի, այդ թվում՝ Պետեկամուտների կոմիտեի պաշտոնյաների, կան կալանավորվածներ: Ադրբեջանական խնձորի թոհուբոհի շուրջ` գործ ունեինք կաշառքով, հարկերից խուսափելու և ապօրինի ձեռնարկատիրությամբ զբաղվելու անօրինական գործարքների հետ: Ի՞նչ են «պարզաբանելու» ադրբեջանական իրավապահները, թե՞ լռելու են... Ամեն դեպքում, փորձը ցույց է տալիս, որ, եթե ԼՂ խնդրի չկարգավորման պայմաններում Հայաստանում ադրբեջանական, իսկ Ադրբեջանում հայկական բիզնեսի զարգացման հնարավորությունները զրոյական են, այնուամենայնիվ, Հայաստանում Թուրքիայից ներկրվող ապրանքների դեմ պայքարը չի իրականացվում: Դրա պատճառը շատ հստակ է, նախ դա անիմաստ է, երկրորդն էլ` ո՛չ Թուրքիայի, ո՛չ էլ Հայաստանի իշխանությունները դա բացառելու հարցում գործնական քայլեր չեն վարում, թերևս, գիտակցելով դրա անիմաստ լինելը: Մետաքսյա Շալունց