Բանակը ժողովուրդ է, իսկ ժողովուրդը՝ իշխանություն. Բեկումնային օր հայ ժողովրդի համար

Այսօր Հայաստանի համար բեկումնային օր է...

Ամեն ինչ սկսվեց ՀՀ Զինված ուժերի Գլխավոր շտաբի տարածած հայտարարությունից:

«ՀՀ զինված ուժերի գլխավոր շտաբն իր վճռական բողոքն է արտահայտում անհեռատես և չհիմնավորված պատճառներով ՀՀ զինված ուժերի գլխավոր շտաբի պետի 1-ին տեղակալին պաշտոնից ազատման առնչությամբ, որն իրականացվել է առանց Հայաստանի Հանրապետության ազգային և պետական շահերը հաշվի առնելու՝ հիմնվելով միայն անձնական և հավակնոտ զգացմունքների վրա: Երկրի համար այսպիսի ծանր պայմաններում նման որոշումը հակապետական և անպատասխանատու քայլ է:

ՀՀ վարչապետը և կառավարությունն այլևս ի վիճակի չեն ընդունելու ադեկվատ որոշումներ՝ հայ ժողովրդի համար այս ճգնաժամային և ճակատագրական իրավիճակում: ՀՀ զինված ուժերը երկար ժամանակ համբերատար կերպով հանդուրժում էր գործող իշխանության կողմից զինված ուժերը վարկաբեկելուն ուղղված «գրոհները», սակայն ամեն ինչ ունի իր սահմանները: ՀՀ զինված ուժերը պատվով է կատարել իր պարտքը, իր ժողովրդի հետ ուսուսի մարտնչել թշնամու դեմ: Գործող իշխանությունների անարդյունավետ կառավարումը և արտաքին քաղաքականությունում ցուցաբերած լրջագույն սխալները երկիրը հասցրել են կործանման եզրին:

Ստեղծված իրավիճակով պայմանավորված՝ ՀՀ զինված ուժերը պահանջում են ՀՀ վարչապետի և կառավարության հրաժարականը, միաժամանակ նախազգուշացնում՝ ձեռնպահ մնալ ժողովրդի դեմ ուժ կիրառելուց, ում զավակները զոհվել են՝ պաշտպանելով Հայրենիքն ու Արցախը: Բանակը միշտ եղել է ժողովրդի հետ, ինչպես ժողովուրդն է բանակի հետ», -ասված է հայտարարությունում: Հայտարարությունը ստորագրել էին ՀՀ ԶՈՒ գլխավոր շտաբի պետ, գեներալ-գնդապետ Օնիկ Վիկտորի Գասպարյան և ևս 39 զինվորական:
Այս հայտարարությանը հետևեց Փաշինյանի պատասխան քայլը: Նա անմիջապես ֆեյսբուքյան ուղիղ եթեր դուրս եկավ, հայտնեց, որ ՀՀ ԶՈՒ գլխավոր շտաբի պետի առաջին տեղակալ Տիրան Խաչատրյանից բացի, որոշում է կայացրել պաշտոնից ազատել նաև ՀՀ ԶՈՒ գլխավոր շտաբի պետ Օնիկ Գասպարյանին: «Թղթերն արդեն ստորագրել եմ», - ասաց նա՝ հավելելով, որ հրավիրում է իր աջակիցներին հավաքվել Հանրապետության հրապարակում:

ՀՀ նախագահ Արմեն Սարգսյանը ՀՀ ԶՈՒ գլխավոր շտաբի պետ Օնիկ Գասպարյանին պաշտոնից ազատելու վերաբերյալ վարչապետի որոշումը ստացել է: Արմեն Սարգսյանը, սակայն, դեռ չի ստորագրել:

Արձանագրենք, որ այսօր մեր երկրում տեղի է ունեցել բեկումնային քայլ: Բանակը՝ հաստատել է, որ ժողովրդի կողքին է, բանակը ժողովուրդ է, իսկ ժողովուրդը՝ իշխանություն: Սա նշանակում է, եթե Փաշինյանը հրաժարական չի տալիս, ժողովուրդը կարող է հանգուցալուծել իրավիճակը:

Բայց մենք գործ ունենք Փաշինյանի հետ, որը ապացուցում է, որ գնում է քաղաքացիական պատերազմի, նա ցույց է տալիս, որ ամեն քայլի ընդունակ է, միայն թե՝ իշխանությունը չթողնի:

Իր հերթին ընդդիմությունն էլ է հրավիրում աջակիցներին՝ դուրս գալ փողոց. «Ողջունում ենք ՀՀ ԶՈՒ բարձրագույն հրամանատարական կազմի հայտարարությունը։ Փաշինյանը, կառչելով փրփուրներից, այժմ փորձում է մեր ժողովրդին դրդել քաղաքացիական բախումների ու արյունահեղության։ Կոչ ենք անում ՀՀ բոլոր քաղաքացիներին չտրվել այս վարչախմբի սադրանքներին, համախմբվել երկրի անվտանգության, միասնականության միակ երաշխավոր ՀՀ ԶՈՒ-ի և Հայոց Բանակի հրամանատարական բարձրագույն կազմի շուրջ։ Կո՛չ ենք անում ժամը 15։00-ից հավաքվել Ազատության հրապարակում», ասվում է Հայրենիքի փրկության շարժման խորհրդի տարածած հաղորդագրությունում:

Հայաստանի մայրաքաղաքում այլևս արյուն չպետք է թափվի, Մարտի 1 չպետք է կրկնվի: Նման հանդարտ իրավիճակ կարող էր լինել, եթե Փաշինյանը գիտակցեր, թե ինչ է նշանակում պետականություն, հայրենիք ու չտապալեր կապիտուլյացիայից մեր երկրի վերածնվելու դեռ մնացած հնարավորությունը:

Մետաքսյա Շալունց