Հայաստանն Ադրբեջան է եւ վերջ

«Գելափ ինթերնեյշնլ» կազմակերպության Հայաստանի գրասենյակը ակտիվացել է, հարցումներ է անցկացրել քաղաքական ուժերի եւ գործընթացների վերաբերյալ, եւ չզարմանաք՝ պարզել, որ ամենաբարձր վարկանիշն այսօր Հայաստանում ունի հողատու Նիկոլ Փաշինյանի Իմ Քայլը: Հարցին, եթե առաջիկա կիրակի օրը Հայաստանում արտահերթ ընտրություններ լինեին, ում կընտրեք, քաղաքացիների 33.1 տոկոսը, ըստ Գելափի, պատասխանել է Իմ Քայլի օգտին, ԲՀԿ-ին՝ 4.4, ԼՀԿ-ին 2.6, ՀՀԿ՝ 2.2, ՀՅԴ՝ 2.2 Հայրենիք 0.9, քաղաքացիների 5.6 տոկոսն էլ նշել է, որ Ռոբերտ Քոչարյանին կտան իրենց ձայնը:

Կարող ենք վստահաբար պնդել՝ Նիկոլ Փաշինյանը թերեւս հասկացավ, որ ինքն այլևս կորցրել է հայ ժողովրդի աջակցությունը, այդ պատճառով էլ թաքնվում է «Գելափի»՝ պատվիրված ու կեղծ սոցհարցումների հետևում:
Ոչ վաղ անցյալի փորձը ցույց է տալիս, որ որքան իշխանությունը կտրվում է ժողովրդից, այնքան մեծանում են այդ կեղծ հարցումներով իշխանությանը տրվող աջակցության տոկոսները: Անշուշտ, ողբալի է այն իշխանությունը, որն այլ հենարան չունի, քան փողով նկարած տոկոսները:
Իսկ եթե այդ հարցումների արդյունքները չեն կեղծվել, ապա չկասկածեք, որ դրանք կատարվել են ոչ թե Հայաստանի հանրապետությունում, այլ Նիկոլ Փաշինյանի կիրթ ու կառուցողական ընկերոջ երկրում՝ Ադրբեջանում, ուր Նիկոլ Փաշինյանն արդեն մի քանի ամիս է ազգային հերոս է հռչակված, նրա պատվին երգեր են ձոնվում, աքսեսուարներ պատրաստում: Քանզի Նիկոլ Փաշինյանի պաշտոնավարման ամեն մի օրն աղետ է Հայաստանի, պարգեւ Ադրբեջանի համար:

Գելափի հայաստանյան տերերը մուկուչյանական գեղանկարչության փոխարեն միգուցե պատասխանեին մի քանի պարզունակ հարցերի:
Եթե Նիկոլ Փաշինյանի ու իր թիմի վարկանիշն այդքան բարձր է, ինչու է դավաճան հողատուն պարբերաբար հայտնվում հայտնի բունկերում, ինչու է ժողովրդի ծոցից դուրս եկած վարչապետը թաքնվում սեփական ժողովրդից, շրջում անվտանգության տասնյակ աշխատակիցների ուղեկցությամբ, մեծ շարասյունով, էվակուացնում իր ճանապարհին հայտնված թեկուզ մեկ տասնյակ քաղաքացիներին:

Եթե Նիկոլ Փաշինյանի վարկանիշն այդքան բարձր է, ինչու է նա ժողովրդի աջակցության տեսարաններ բեմադրում՝ նախընտրական ու ներքաղաքական լոզունգներով, որոնց ժամանակ մեկ Ռոբերտ Քոչարյանին ձերբակալելու կոչեր են հնչում, մեկ թավիշը վերացնելու, մեկ էլ իշխանությանը քննադատող լրատվամիջոցներից մեկը փակելու:

Դուք վարկանիշ եք նկարել մի մարդու համար, ում կազմակերպած հանրահավաքին նոյեմբերի 15-ին մի քանի տասնյակ մարդ էր բերվել, ով հանուն իր աթոռի գրոհեց Եռաբլուրը՝:

Մի մարդ, որ անգամ չկարողացավ Գորիս այցելել ու Սիսիանից ստիպված եղավ վերադառնալ, փաստորեն մեր երկրում ամենամեծ հեղինակությունն է վայելում:

Նիկոլ Փաշինյանը պետք է հասկանա, որ որեւէ հարցմամբ չի կարող խուսափել կատարվածի պատասխանատվությունից եւ հատուցման պահը չի ուշանալու:

Անի Սահակյան