Հեքիաթ՝ բարձր վարկանիշի մասին՝ Նիկոլից մինչև Կարեն Կարապետյան ու Սերժ Սարգսյան

Հրապարակվել են Gallup International-ի հայաստանյան ներկայացուցչության կողմից անցկացված վերջին հարցման տվյալները, ըստ որոնց Նիկոլ Փաշինյանը Հայաստանի ամենաբարձր վարկանիշ ունեցող քաղաքական գործիչն է:
Gallup International-ի ներկայացուցչության ղեկավար Արամ Նավասարդյանը մամուլի ասուլիսում հայտնելէ, որ թեև 1-5 բալային սանդղակում Փաշինյանի միջին գնահատականը քաղաքացիների կողմից ընդամենը 2.8 է, սակայն ոչ մի այլ քաղաքական գործիչ նրանից բարձր գնահատական չի ստացել։ «Քաղաքական գործիչներին 1-ից 5 սանդղակով գնահատելու խնդրանքին քաղաքացիները պատասխանել են հետևյալ կերպ, ներկայացված են միջին գնահատականները։ Վարչապետ Նիկոլ Փաշինյանը ստացել է 2,8 միավոր, նախագահ Արմեն Սարգսյանը՝ 2,3 միավոր, երկրորդ նախագահ Ռոբերտ Քոչարյանը՝ 2 միավոր, Գագիկ Ծառուկյանը հավաքել է 2,2 միավոր, Էդմոն Մարուքյանը՝ 1,8 միավոր, առաջին նախագահ Լևոն Տեր-Պետրոսյանը՝ 1,7 միավոր, երրորդ նախագահ Սերժ Սարգսյանը՝ 1,7 միավոր, Վազգեն Մանուկյանը և ՀՅԴ ներկայացուցիչ Իշխան Սաղաթելյանը՝ 1,6-ական միավոր, Արթուր Վանեցյանը ՝ 1,5 միավոր», – ասել է Նավասարդյանը:
Սա այն նույն Gallup International գրասենյակն է, որը տարիներ շարունակ ամենաբարձր միավորները տվել է բացառապես օրվա իշխանությանը։ Այս նույն կազմակերպությունը 2017 թվականին ամենաբարձր միավորներ էր վերագրում այն ժամանակվա վարչապետ Կարեն Կարեպետյանին։ Օրինակ, 2017 թվականի դեկտեմբերին այս նույն կազմակերպության հրապարակած տվյալներով՝ 26.7 տոկոսը դրական էր գնահատում ՀՀ նախագահ Սերժ Սարգսյանի, 26.2 տոկոսը՝ ՀՀ վարչապետ Կարեն Կարապետյանի աշխատանքը։ Իսկ դրանից ընդամենը մեկ տարի առաջ՝ 2016-ի դեկտեմբերին, երբ առջևում 2017-ի խորհրդարանական ընտրություններն էին, Կարեն Կարապետյանի վարկանիշն ուղղակի ռեկորդներ էր սահմանում՝ հատել էր 85 տոկոսի շեմը, որը բարձր էր անգամ Նիկոլ Փաշինյանի հետհեղափոխական պիկի ցուցանիշից։ «Համեմատած վարչապետի գործելաոճի գնահատման այն բարձր ցուցանիշի հետ, որ գրանցվել էր մեկ տարի առաջ՝ 85.1 տոկոս, հիմա դրական գնահատականը դարձել է 57 տոկոս: Այսինքն՝ 28 տոկոսի անկում կա: Բայց, միևնույն է, փաստենք, որ անգամ այս պարագայում վարչապետի վարկանիշը մյուս պաշտոնյաներից դեռ բարձր է»,- 2017-ի դեկտեմբերին ասել էր Gallup International-ի ներկայացուցչության ղեկավար Արամ Նավասարդյանը:
Սա այն նույն Gallup-ն է, որը նախագահական վերջին ընտրություններից առաջ իբր հետազոտություն էր կատարել, թե Սերժ Սարգսյանի անձնական վարկանիշն ավելի բարձր է, քան ողջ ՀՀԿ-ինը միասին վերցրած։ Թե ինչպես էին հաշվարկվել Սերժ Սարգսյանի ու Կարեն Կարապետյանի այն ժամանակվա վարկանիշները, ոչ ոք ոչ տեսել է, ոչ էլ գիտի։ Փոխարենը բոլորով տեսանք, թե ինչպես էին մարդիկ Երևանի փողոցներում քեֆ ուրախություն անում, երգում ու պարում, երբ Սերժ Սարգսյանը հրաժարականը տվեց։ Ազգովի տեսանք, թե իրականում ինչ արժեք ուներ Կարեն Կարապետյանի 85 տոկոս վարկանիշը, երբ նա Սերժ Սարգսյանի հրաժարականից հետո իշխանությունը չկարողացավ պահել գոնե մեկ ամիս ։ Բավական էր, որ Նիկոլ Փաշինյանը հրապարակում նրան <<ժիլետ>> անվաներ, որպեսզի այդ վարկանիշը տեղում փոշի դառնար ։
Պարզ է, որ Gallup-ը Նիկոլ Փաշինյանի այժմյան վարկանիշը հաշվարկել է ճիշտ այնպես, ինչպես ժամանակին հաշվարկում էր Սերժ Սարգսյանի ու Կարեն Կարապետյանի վարկանիշը։ Թե ինչպես էին ժամանակին գովազդվում այդ կեղծ թվերը, տեսել ենք բոլորս։ Թե ինչ եղավ այդ բարձր վարկանիշներին հավատացած թիմի հետ, իհարկե, շատ հուզիչ էր։
Ամեն դեպքում Նիկոլ Փաշինյանի վարկանիշը ամենաբարձրը կարող էր լինել երկու դեպքում միայն․
1․ Եթե հարցումներն անցկացվեին ՊՈԱԿ-ի ֆեյքերի շրջանում,
2․ Եթե հարցումներն անցկացվեին Բաքվի փողոցներում։
Երրորդ տարբերակն ուղղակի բացառված է։ Փետրվարի 20-ի հանրահավաքի նախօրեին Նիկոլի բարձր վարկանիշի մասին հրաշապատում հեքիաթը, չստացված սյուժե է։ Բաբվական է հրապարակը <<դավաճան>> վանկարկի՝ այդ վարկանիշն իսկույն հօդս կցնդի։

Հայկ Դավթյան