Հայաստանն Իրանին այլևս հետաքրքիր չի. Փաշինյանի ևս մի «աննախադեպ հաջողություն»

Բաքու է ժամանել Իրանի խորհրդարանական պատվիրակությունը՝ Ազգային անվտանգության և արտաքին քաղաքականության հանձնաժողովի նախագահ Մուջթաբա Զոննուրի գլխավորությամբ։

Ըստ պաշտոնական աղբյուրների՝ իրանցի խորհրդարանականների օրակարգում բանակցություններ էին Ադրբեջանի արտգործնախարար Ջեյհուն Բայրամովի, նախագահի աշխատակազմի բարձրաստիճան պաշտոնյաների և խորհրդարանի ղեկավարության, ինչպես նաև Նախիջևանի ինքնավարության ղեկավարի հետ։
Բանակցությունների օրակարգի մանրամասները չեն հրապարակվում։ Ադրբեջանում Իրանի դեսպանությունը հայտարարել է, որ հաշվի առնելով երկու երկրների պատմական և մշակութային ընդհանրությունները՝ Ադրբեջանը հատուկ տեղ է զբաղեցնում Իրանի արտաքին քաղաքականությունում, և իրանական պատվիրակության այցը կնպաստի հետագա համագործակցության զարգացմանը։

Ղարաբաղյան վերջին պատերազմից հետո, երբ արդեն բոլորի համար պարզ է, որ Հայաստանի ղեկավարությունը գնացել է կապիտուլյացիայի, իսկ Ադրբեջանը՝ Թուրքիայով կշիռ է ձեռքբերել որպես պատերազմում հաղթած կողմ, հիմա մենք պետք է համակերպենք՝ տեսնելով, թե ինչպես են Հայաստանի հարևանները, երբեմնի՝ լավ բարեկամները Հայաստանի ու Արցախի հակառակորդ պետությունների հետ վարում տարածաշրջանային նշանակության կարևոր բանակցություններ, պատկառելի պատվիրակություններ ուղարկում Ադրբեջան:

Սա ևս մի վկայություն է, թե ինչպես է Փաշինյանի իշխանությունը փշրել տարիների ընթացքում ձեռքբերած Հայաստանի գործընկեր պետությունների ու նրանց ղեկավարների վստահությունը:

Եթե Իրանից Երևան բարձրաստիճան պաշտոնյա էլ գալիս է, ապա, թերևս, այն պատճառով, որ դա տարածաշրջանային, այսինքն՝ «պտիչկա» դնելու պես մի այց է, որ չասեն՝ Ադրբեջան ու Վրաստան գնացին, Հայաստան՝ չեկան:
Ինչևէ, իսկ Իրանը բավական ակտիվ է խաղում...

Աստանայի գործընթացի երաշխավոր երկրների (Ռուսաստան, Թուրքիա, Իրան) պատվիրակությունները երեքշաբթի Սոչիում եռակողմ խորհրդակցություններ անցկացրեցին: ՏԱՍՍ-ին ռուսական պատվիրակությունից հայտնեցին, որ Մոսկվան բանակցություններում ներկայացնում է ՌԴ նախագահի Սիրիայի հարցով հատուկ բանագնաց Ալեքսանդր Լավրենտևը: Անկարայի պատվիրակությունը գլխավորում է Թուրքիայի արտաքին գործերի նախարարության Սիրիայի վարչության պետ Սելչուկ Ունալը, Թեհրանինը՝ Իրանի արտաքին քաղաքական գերատեսչության ղեկավարի քաղաքական հարցերով ավագ օգնական Ալի Ասղար Հաջին:

Երեկ ավելի վաղ տեղի են ունեցել ռուսական պատվիրակության երկկողմ հանդիպումներ Թուրքիայի և Իրանի ներկայացուցիչների հետ: Փետրվարի 16-17-ը Սոչիում անցկացվում է Աստանայի ձևաչափով Սիրիայի վերաբերյալ 15-րդ միջազգային հանդիպումը:
Ի դեպ, Իրանը հույս է հայտնել, որ կկարողանա զենք գնել Ռուսաստանից...

Իրանը հույս ունի, որ կկարողանա Ռուսաստանից զենք գնել տարածաշրջանում անվտանգության ապահովման համար, Sputnik-ին ասել է Իրանի արտաքին քաղաքական գերատեսչության հատուկ քաղաքական հարցերով ավագ օգնական Ալի-Ասղար Հաջին: «Մենք ռազմական համագործակցություն ունենք Ռուսաստանի հետ: Եվ երբ սահմանափակումները հանվեցին, Ռուսաստանը դարձավ այն երկրներից մեկը, որտեղ մենք կարող ենք զենք գնել, և մենք կարող ենք համագործակցել նրա հետ` մեր տարածքը և տարածաշրջանի անվտանգությունը պաշտպանելու համար»,- ասել է Հաջին:

Դիվանագետը նշել է, որ, չնայած Իրանն իրավունք չուներ զենք գնել ՄԱԿ-ի զենքի էմբարգոյի պատճառով, իր հարևանները միլիարդավոր դոլարների զենք են գնել` տարածաշրջանը զենքի պահեստի վերածելով:

Ի դեպ, փետրվարի 16-ից սկսվեցին Իրանի և Ռուսաստանի ռազմական ծովային զորավարժությունները Հնդկական օվկիանոսի հյուսիսում, «ծովային անվտանգության գոտի» անվանմամբ:

2019 թվականի դեկտեմբերի վերջին Հնդկական օվկիանոսում և Օմանի ծոցում անցկացվեցին Իրանի, Ռուսաստանի և Չինաստանի համատեղ ռազմածովային զորավարժությունները:

Մետաքսյա Շալունց