Կրակում են, զինվում են, «գլուխ են կտրում», իսկ Փաշինյանի «թավիշը» «թիթեռ է նկարում»

Հայաստանի մարդու իրավունքների պաշտպան Արման Թաթոյանը մեր երկրում միակ աշխատող մարդն է, որը դուրս է եկել ընդդեմ թուրք-ադրբեջանական տանդեմի գործողությունների: ՀՀ ՄԻՊ-ը միակն է, որ համարժեք արձագանքում ու գործում է հետպատերազմյան շրջանում Ադրբեջանի գործողություններին, և դրանով իսկ ի ցույց դնում նաև Հայաստանի իշխանությունների անգործությունն ու բացերը:

Արման Թաթոյանը ներկայացրել է ապացույցներ այն մասին, որ ադրբեջանական զինված ծառայողները ՀՀ Սյունիքի մարզի գյուղերի անմիջական հարևանությամբ կրակում են ինչպես փոքր, այնպես էլ խոշոր տրամաչափի զինատեսակներից: «Այս տեսանյութի կրակոցներն արվել են 2 օր առաջ, օրվա տարբեր ժամերի՝ Կապան համայնքի Ագարակ ու Եղվարդ գյուղերի միջնամասում, այն նկարել են մեր դիրքապահները: Տարածությունը պատկերացնելու համար նշեմ, որ այս կրակոցների վայրից դեպի Ագարակ գյուղ ուղիղ գծով մոտ 1 (մեկ) կմ է: Հայաստանի մարդու իրավունքների պաշտպանը Կապանի գյուղերի բնակիչներից պարբերաբար է ստանում զայրույթի ու անհանգստության ահազանգեր ադրբեջանցի զինվորականների կողմից պարբերաբար արձակվող կրակոցների մասին: Այս ամենը ևս մեկ անգամ հաստատում է, որ Սյունիքի համայնքների անմիջական հարևանությամբ, այդ համայնքներն իրար կապող ճանապարհներին ադրբեջանական զինվորական ուժեր չպետք է լինեն. դա լրջորեն վտանգում է խաղաղ բնակիչների իրավունքները, խաթարում է նրանց անդորրն ու խաղաղ կյանքը», գրել է նա:

Ահա, այսպես է Հայաստանի իշխանությունների պատկերացրած GPS-ով գծվող սահմաններում պահպանվում խաղաղությունը: Ի դեպ, Հայաստանի գյուղերը նաև պատերազմի ժամանակ էին գնդակոծվում, բայց ոչ մեկին չէր հետաքրքրում, մանավանդ Հայաստանի դաշնակից Ռուսաստանին, որը այդպես էլ անտեսում էր այդ փաստը, հիմա էլ հայտարարում են, որ ՌԴ նախագահի ջանքերով հաստատված խաղաղությունը պահպանվում է:

Արման Թաթոյանը նախօրեին ներկայացրել է մեկ այլ կարևոր փաստ... Հերթական ապացույցները Ադրբեջանում հայատյացության պետական քաղաքականության ու հայերի նկատմամբ էթնիկ հիմքով թշնամանքի խորքային արմատների վերաբերյալ:

«Ադրբեջանի նախագահի պաշտոնական ուղեձները Հայաստանի ու հայերի մասին՝ 1) մենք շարունակելու ենք վռնդել այդ սուտասաններին (նկատի ունի հայերին): Նրանք տեսնում են, որ մենք իրենց դաս ենք տալիս, որը նրանք երբեք չեն մոռանա., 2) նրանք ո´չ խիղճ ունեն, ո´չ բարոյականություն., 3) նրանք նույնիսկ ուղեղ չունեն., 4) 30 տարի այն (նկատի ունի Արցախը և մասնավորապես` Ֆիզուլին [նկատի ունի Վարանդան]) եղել է վայրի հրեշների ձեռքում, վայրի գազանների ձեռքում, շակալների ձեռքում. 5)Ֆիզուլիի մնացորդները հայկական ֆաշիզմի ցուցադրությունն են և վկայում են հայկական ֆաշիզմի մասին: , 6) կարծես վայրի ցեղ էր տիրել քաղաքին., 7) մենք պետք է տանենք ավելի ուժեղ պայքար Հայաստանի դեմ ու ավելացնենք պայքարի կշիռը: Մենք այն մեկուսացրել ենք միջազգային և տարածաշրջանային բոլոր ծրագրերից:

«Այս նույն բառերն են օգտագործում նաև ադրբեջանական զինվորականները հայկական կողմի զինծառայողների ու քաղաքացիական անձանց սպանության, նրանց խոշտանգելու ու անմարդկային վերաբերմունքի ենթարկելու տեսանյութերում: Մանրամասներն արտացոլված են Հայաստանի ու Արցախի Մարդու իրավունքների պաշտպանների 2020թ. համատեղ արտահերթ զեկույցում, որ վերաբերում է Ադրբեջանում էթնիկ հայերի նկատմամբ կազմակերպված ատելության խոսքին և թշնամանքին` որպես պատերազմի ընթացքում ադրբեջանական զինված ուժերի կողմից էթնիկ պատկանելիության հիմքով խոշտանգումների ու անմարդկային վերաբերմունքի պատճառներ», գրել է ՀՀ ՄԻՊ-ը:

Այսինքն, Ադրբեջանում Հայաստանի ու հայերի նկատմամբ թշնամական քաղաքականությունը շարունակվում է: Իսկ Փաշինյանի իշխանությունում հույս ունեն Էրդողանի ու Ալիևի ստահակ իշխանությունների հետ հարևանություն անել:

Օրերս Թուրքիայում մեծ արձագանք է գտել փողոցում լրագրողի հարցին պատասխանած ադրբեջանցի կնոջը անասնական պատասխանը։ Ստամբուլի փողոցներում հարցում իրականացնող թուրք լրագրողը անցորդներից մի կնոջ հարցնում է, թե ինչ հանցանք կգործեր, եթե իմանար, որ չի պատժվելու։ Թուրքիայում անցկացված հարցումներից մեկի ժամանակ ադրբեջանցի մի կնոջ հարցրել են. «Ի՞նչ կարող էիք անել` իմանալով, որ դրա համար ձեզ ոչինչ չի լինի»: Նա առանց երկմտելու պատասխանել է. «Ես 20 հայի գլուխ կկտրեի»: Այս պատասխանից ապշած լրագրողը հարցնում է, թե որտեղից է կինը, վերջինս պատասխանում է, որ ադրբեջանցի է։

Թուրքիայի խորհրդարանի հայ պատգամավոր Կարո Փայլանն արդեն դատական հայց է ներկայացրել հայերի գլուխը կտրել ցանկացող ադրբեջանցի կնոջ դեմ։ Թուրքիայի ընդդիմադիր քրդամետ Ժողովուրդների դեմոկրատական կուսակցության անդամ Փայլանը Twitter-ի իր էջում հայտնել է, որ դիմել է իրավապահ մարմիններին՝ մեղադրանք ներկայացնելով ադրբեջանցի կնոջ դեմ, ով հայտարարել է, որ ցանկանում է գլխատել 20 հայի:

Մետաքսյա Շալունց