Գեւորգ Կոստանյանը պետք է հրաժարվի պատգամավորի մանդատից
ՀՀ կառավարությունը հունիսի 1-ի նիստում որոշեց Գևորգ Կոստանյանին նշանակել Մարդու իրավունքների եվրոպական դատարանում ՀՀ ներկայացուցիչ: Այս որոշումը տարօրինակ էր առնվազն, քանի որ ընդամենը մի քանի օր առաջ՝ մայիսի 17-ին, նախագահ Սերժ Սարգսյանը Գևորգ Կոստանյանին հենց այդ պաշտոնից ազատեց՝ հաշվի առնելով, որ նա ընտրվել է ԱԺ պատգամավոր: Եւ կառավարության նախորդ՝ մայիսի 25-ի նիստում կառավարությունը լուծարեց այդ հաստիքը Զարմանալիորեն, մեկ շաբաթ անց կառավարությունը կրկին վերաբացեց այդ հաստիքը և Կոստանյանին վերանշանակեց նույն աշխատանքին: Անհեթեթությունը այն է, որ գործադիրը նաև կրճատեց, իսկ այսօր կրկին վերաբացեց Եվրոպական դատարանում Հայաստանի ներկայացուցչի պաշտոնը: Թերևս կառավարությունում մտածել են, որ չեն գտնի այլ թեկնածուի, ով Կոստանյանի պես Ստրասբուրգում կպաշտպանի Հայաստանի դատարանների հաճախ ոչ արդարացի վճիռները, ուստի հետողորմեա են անում։ Մարդու իրավունքների առաջին պաշտպան Լարիսա Ալավերդյանը մեզ հետ զրույցում անդրադառնալով թեմային մեզ հետ զրույցում կարծիք հայտնեց, որ իշխանությունը ակնհայտ փնտրտուքի մեջ է․«Ես կարծում եմ, որ չցանկանալով ընլայնել կադրային բազան, իշխանությունները փորձում էին այսպիսի փոխատեղումներով «փակել» կարեւորագույն պաշտոնները , սակայն տվյալ դեպքում տեսան, որ չկա փոխարինող, վերադարձան նորից Կոստանյանի թեկնածությանը»,-կարծիք հայտնեց տիկին Ալավերդյանը։ Մեր ճշտող հարցին՝ Կոստանյանը անփոխարինելի է այս պաշտոնում եւ ինչումն է նրա անփոխարինելիությունը, Ալավերդյանը այսպես արձագանքեց․«Տվյալ դեպքում մենք տեսանք, որ որոնումների արդյունքում որոշեցին, որ ինքը պետք է շարունակի։ Գուցե այստեղ կան այնպիսի հանգամանքներ, որոնց մասին մենք տեղյակ չենք, այսինքն՝ Կոստանյանը փորձ ունի, եղել է ՄԻԵԴ-ում ՀՀ-ի ներկայացուցիչը, աշխատանքի գնահատականները մի կողմ ենք թողնում, փորձն այստեղ շատ կարեւոր է», շեշտեց Լարիսա Ալավերդյանը։ Իսկ սա, ըստ տիկին Ալավերդյանի՝ նշանակում է, որ նախկին գլխավոր դատախազ Գեւորգ Կոստանյանը պետք է հրաժարվի պատգամավորի մանդատից, քանի որ օրենքը դա չի թույլատրում․«Ինքը պետք է վայր դնի մանդատը, ես համոզված եմ։ Քանի որ պատգամավորի պաշտոնը եւ այդ պաշտոնը ոչ համատեղելի են, ՄԻԵԴ-ում ներկայացուցչությունը ոչ ստեղծագործական եւ ոչ էլ գիտական ոլորտ է, այնպես որ, պետք է սպասենք, որ պարոն Կոստանյանը պետք է հրաժարվի պատգամավորի մանդատից։ Օրենքը դա թույլ չի տալիս, դա առնվազն պաշտոն է, որի համար Կոստանյանը էլի վարձատրվելու է պետությունից, ինչը անհամատեղելի է»։ Հիշեցնենք, որ Գեւորգ Կոստանյանը ՀՀ նախկին գլխավոր դատախազն է: Այդ պաշտոնը նա զբաղեցրել է 2013թ. հոկտեմբերից մինչեւ 2016թ. օգոստոսը: 2004 թվականի փետրվարի 17-ին ՀՀ Վարչապետի որոշմամբ նշանակվել է ՄԻԵԴ-ում ՀՀ կառավարության լիազոր ներկայացուցիչ: Անի Սահակյան