Իշխանությունը ՝ «վնգստացող» դատավորի փնտրտուքով

Ազգային ժողովը փակ-գաղտնի քվեարկությամբ Վճռաբեկ դատարանի նախագահ ընտրեց այդ դատարանի քրեական պալատի ղեկավար Լիլիթ Թադեւոսյանին: Լիլիթ Թադեւոսյանը ստացավ 102 կողմ ձայն: Քվեարկության մասնակիցներից նրան դեմ էր արտահայտվել միայն 1 պատգամավոր: Չնայած նիստի մեկնարկին` Մարուքյանի կուսակիցները մարուքյանական ոճով բողոքում էին, թե անկարեւոր հարցեր են բերվել խորհրդարան, բայց նրան ոչ միայն մասնակցեցին այդ անկարեւոր քննարկումներին, այլեւ քվեարկությանը:Հիշեցնենք, որ այդ պաշտոնը թափուր էր նախորդ տարվա սեպտեմբերից, երբ Երվանդ Խունդկարյանը ընտրվեց ՍԴ դատավոր: Լիլիթ Թադեւոսյանը հայտնի դատախազ Զելիմ Թադեւոսյանի դուստրն է, եղել է 7-ի գործով մեղադրող դատախազներից մեկը: Վճռաբեկ դատարանի քրեական պալատը ղեկավարում էր 2016-ից:

Մինչ ընտրությունը Թադեւոսյանը ստիպված էր անցնել իմքայլականների քավարանով: Նիկոլ Փաշինյանի պատգամավորները իրենց հարցադրումներով փորձում էին Թադեւոսյանին մղել հակաիրավական դաշտ, պահանջում էին գնահատական տալ քաղաքական հայտարարություններին, ավելի ճիշտ բոլոր հարցադրումները բխում էին սեփական շահից ու տպավորություն էր, որ իմքայլականները, ի դեմս Թադեւոսյանի, ընտրում են իրենց վնգստացող դատավորին եւ նախօրոք ստուգարք վերցնում: Հանուն արդարության՝ պատգամավորների կողմից հնչեցված բոլոր քիչ թե շատ քաղաքական ենթատեքստ ունեցող գործերի վերաբերյալ հարցերը Լիլիթ Թադեւոսյանը շրջանցեց՝ «կաշկանդված եմ» հիմնավորմամբ: ԱԺ նախագահ Արարատ Միրզոյանը, առաջարկելով դիրքորոշումն արտահայտել, օրինակ, եվրոպական որեւէ երկրի կամ ԱՄՆ Կոնգրեսի հարձակման դեպքերով, Միրզոյանը հետաքրքրվեց, թե որն է իրավաբան-գիտնականի դիրքորոշումը պետության դեմ հանցագործությունների առնչությամբ:

Լիլիթ Թադեւոսյանն ասաց, որ որքան էլ ձգտի հեռանալ այն հանգամանքից, որ իրեն հարց չեն ուղղում որպես Վճռաբեկ դատարանի նախագահի թեկնածուի, այլ գիտնականի, միեւնույն է, հարցադրումները կոնկրետ գործերի են վերաբերում: Ըստ նրա բնորոշման՝ եթե առանց գործի մանրամասներին տիրապետելու կարծիք հայտնի, կնմանվի բժիշկի, որն առանց բժշկական փաստաթղթեր ուսումնասիրելու հիվանդություն է ախտորոշում: Գեւորգ Պապոյանը, ըստ էության, թարգմանեց Միրզոյանի դիվանագիտական հարցադրումը՝ պարզ հարցնելով՝ նորմա՞լ է այն երեւույթը, երբ ԱԺ նախագահի հանդեպ մահափորձ կատարող անձը չի կալանավորվում:

Թադեւոսյանն ասաց, որ որպես իրավաբան հակված է խոսել փաստերով, չի կարող կարծիք հայտնել որեւէ գործի վերաբերյալ, հակառակ պարագայում կկաշկանդվի, եթե նույն հարցը բարձրացվի Վճռաբեկ դատարանում:
«Ես ձեռնպահ կմնամ որեւէ դիրքորոշում արտահայտելուց, կարտահայտեմ միայն դատական ակտի շրջանակում, որի կայացմանը պետք է մասնակցեմ, եթե կլինի համապատասխան վճռաբեկ բողոք»,- ասաց նա:

Արարատ Միրզոյանի մյուս <պաշտպան>՝ պատգամավոր Քրիստինե Պողոսյանն էլ թեկնածուին խնդրեց գնահատական տալ «հակասահմանադրական ճանապարհով իշխանություն վերցնել» արտահայտությանն ընդհանրապես, անկախ նրանից՝ ով է այն արտաբերել:

Թադեւոսյանը պատասխանեց, որ ինքը կաշկանդված է դատավորի վարքագծի կանոններով: «Դուք ասում եք՝ չե՛ք արձագանքում քաղաքական գործչի հայտարարությանը, ես հակված չեմ արձագանքելու քաղաքական գործչին: Ես ձեր հարցը դիտարկում եմ բացառապես կոնկրետ գործի շրջանակներում»,- ասաց նա՝ հավելելով, որ իր կարծիքը իր դատական ակտն է:

Թագուհի Թովմասյանի հարցին ի պատասխան Լիլիթ Թադեւոսյանն անդրադարձավ նաեւ Մարտի 1-ի գործին: Ինչպես հայտնի է՝ նա 7-ի գործով մեղադրող դատախազ է եղել: Անդրադառնալով 2008 թ. մարտի 1-ի առնչությամբ քրեական գործերին՝ Լիլիթ Թադեւոսյանը նշեց, որ իրեն հանձնարարվել է այդ գործերով մեղադրանքի պաշտպանությունը, ներգրավվել է որպես մեղադրող դատախազ ու մասնակցել այդ գործերի քննությանը:
Վստահեցրեց՝ որպես դատավոր ներգրավված չի եղել, ներգրավված չէ եւ չի պատրաստվում ներգրավվել որեւիցե քաղաքական գործընթացի:

Անի Սահակյան