«Ֆեյքերի» տիրակալը․ ում հույսին է մնացել Նիկոլ Փաշինյանը

Այն, որ Նիկոլ Փաշինյանի գլխավորած իշխանությունը չունի բարոյական որևէ սկզբունք և սեփական աթոռն ու պաշտոնը պահելու համար պատրաստ է ցանկացած ստորության, գիտեինք շատ վաղուց: Գիտեինք նաև, որ հանրության ամենանուրբ լարերի հետ խաղալու մեծ վարպետ Նիկոլ Փաշինյանը իշխանության գալու համար կանգ չառավ անգամ ապրիլյան պատերազմի հերոս Ռոբերտ Աբաջյանի ֆեյք պապիկի կերպարն օգտագործելուց:

Հենց այդ օրերին էր, որ շրջանառության մեջ դրվեց ֆեյք ոստիկան Աշոտի ֆեյք տատիկի պատմությունը։ Նիկոլ Փաշինյանը հրապարակում հավաքվածների մոտ որպես իրական Աշոտ ու տատիկ էր ներկայացնում հնարովի այդ կերպարին։ Այդ օրերին էր, որ հրապարակում մեկ այլ տատիկ հայտնվեց։ Հեղափոխության Լեյլա տատիկը, ով հայտնվում է նաեւ այսօր, երբ Փաշինյանն ու իր թիմն Արցախ են հանձնել։ Տատիկի մոտ ոչինչ չի փոխվել, նա շարունակում է սիրել ու գուրգուրել Նիկոլ Փաշինյանին, նրա հետ ասպատակել Եռաբլուրը։

Ինչ որ պահի էլ Փաշինյանի իշխանության PR-ն ապահովեց Ծիծեռնակաբերդ այցի թույլտվություն չստացած, իսկ հետո ոստիկանական մեքենայով գիշերվա կեսին այնտեղ ուղեկցված պապիկի պատմությունը ՝ երկրորդ պլան մղելով Ցեղասպանության միջազգային ճանաչման ուղղությամբ թավշյա իշխանությունների զրոյական աշխատանքը։
Բայց որ Նիկոլ Փաշինյանն ու իր Էրատոն, իշխանական քարոզչամեքենան աղետալի պատերազմից հետո էլ կշարունակեին ֆեյքային իրականությամբ իշխանությունը պահելու փորձեր անել, դժվար էր հավատալ։

Դժվար էր, բայց այսօր իրականություն է, սեփական PR-ի համար Նիկոլ Փաշինյանի կինն ու թիմակիցները կարող են այցելել 44-օրյա պատերազմի զոհերի հարազատներին ու ժպտադեմ նկարներ հրապարակել՝ կարծես սարսափելի ոչինչ էլ չի պատահել: Իսկ ավելի ուշ բացահայտվեց, որ իբր «սգակիր» ընտանիքի մայրը Էրատոյի ջոկատի աղջիկներից է։
Նիկոլ Փաշինյանի իշխանությունը պատրաստ է անգամ անարգել Եռաբլուրում հանգչող մեր հազարավոր հերոսների հիշատակը, գրավել Եռաբլուրը եւ հավաքագրած «ժողովրդով» ու նախապես գրված սցենարով հենց Եռաբլուրում գոռալ «Նիկոլ վարչապետ»։

«Կեղծ» ժողովուրդ հավաքել Սյունիքի, Արարատի մարզերում։ Վերջինում կրկնօրինակ ադրբեջանական քարոզչամեքենայի «Իբրահիմ օպերացիան», երբ նույն մարդը կարող է եւ քաբաբագործ աշխատել, եւ Փաշինյանին դիմավորող «քաղաքացի»։ Եւ մի ուշագրավ փաստ։
Արարատի մարզում հավաքված կեղծ ժողովուրդն այլեւս չէր պաչում «սիրելի վարչապետի» ոտքերն ու ձեռքերը, չէր խնդրում իրենց մենակ չթողնել «դավաճան» նախկինների հետ ։ Այս անգամ բռնապետը, ըստ ամենայնի, հրահանգել էր կեղծ ժողովրդին ասել այն ինչ ինքն է ուզում՝ «Փակեք Արմնյուզը»։ Սա Նիկոլ Փաշինյանի
ստեղծած «ֆեյք» Հայաստանը, կեղծ ու սուտ են մինչեւ հեղափոխությունն արված նրա բոլոր հայտարարությունները՝ նախկինների ու նրանց թալանի հետ կապված։ Հակառակ դեպքում այսօր՝ իշխանության երկուսուկես տարում գեթ մեկ թալանչի իր արժանի պատիժը ստացած կլիներ։

Անի Սահակյան