Հայրենիքի «գինը». Ջալալ Հարությունյանի շոկային քայլը

Արցախի ՊԲ նախկին հրամանատար Ջալալ Հարությունյանն այսօր պաշտոն է ստացել ՀՀ պաշտպանության նախարարությունում: Գեներալ-լեյտենանտ Հարությունյանը նշանակվել է ՊՆ ռազմական վերահսկողական ծառայության պետ: Հիշեցնենք, որ նախկինում այդ պաշտոնը զբաղեցնում էր Մովսես Հակոբյանը՝ Մոսին, ով 44-օրյա պատերազմի ընթացքում իշխանությունների բացթողումների վերաբերյալ սկանդալային ասուլիսով հանդես եկավ։

Ջալալ Հարությունյանը ՊԲ հրամանատարի պաշտոնից ազատվեց 44-օրյա պատերազմի ընթացքում վիրավորվելու պատճառով։ «Ջալալ Հարությունյանի ազատման որոշումը պահի հրամայական է՝ պայմանավորված օրերս մարտական դիրքում նրա ստացած վիրավորումով և տարամեկնաբանությունների առիթ չպետք է հանդիսանա»,- հոկտեմբերի 26-ին հայտարարեց Արցախի նախագահ Արայիկ Հարությունյանը։ Նրա հրամանով Ջալալին շնորհվեց Արցախի հերոս կոչումը՝ «հայրենիքի պաշտպանության ու անվտանգության ապահովման գործում Արցախի Հանրապետությանը մատուցած բացառիկ ծառայությունների, ցուցաբերած քաջության ու անձնական արիության համար»։

Ջալալ Հարությունյանի նշանակում է ՊՆ-ում կարելի է ասել շոկային էր։ Կասկածելի հանգամանքներում նրա վիրավորումը բազում հարցեր էր առաջ բերել, ակտիվորեն քննարկվում էր հատկապես այն վարկածը, որ Ջալալ Հարությունյանը պատերազմի ընթացքում խանգարում էր Նիկոլ Փաշինյան-Արայիկ Հարությունյան զույգին եւ այս համատեքստում համացանցը նրա վիրավորումը մահափորձ էր որակում։

Նշենք, որ դեպքի առիթով մահափորձի հոդվածով հարուցված քրեական գործի շրջանակներում մինչ օրս մեղադրյալներ չկան ներգրավված։

Մի կողմ թողնենք այս վարկածը, բայց մի՞թե Ջալալ Հարությունյանը չունի ասելիք այս կասկածելի պատերազմի եւ իր հայրենի Արցախի 75 տոկոսը հանձնելու վերաբերյալ։ Ինչպես դա անում են մի շարք հայրենասեր եւ պետականամետ գեներալներ, որպիսիք Սեյրան Օհանյանն է, Մովսես Հակոբյանը եւ այլք։ Հատկապես, որ Ջալալ Հարությունյանը հայրենիք ու առողջություն է կորցրել այս պատերազմում։ Նա չի կարող ասել, որ կասկածելի հանգամանքներ չեն եղել եւ մեզ չեն տարել պարտության ու վաճառել Արցախը, նա չի կարող ասել, որ այո, մենք մարտը պարտվել ենք։
Քանզի Նիկոլ Փաշինյանն ու յուր թրքասեր թիմը պատերազմից հետո պարտության թիվ մեկ մեղավոր են հռչակել բանակը։ Իմքայլական որոշ ուսապարկեր հայտարարում են, որ 30 տարի բանակ չենք ունեցել, ոմանք ասում են, որ բանակը իզորու չի եղել դիմագրավել հինգերորդ սերնդի պատերազմին, կան մարդիկ էլ, որ շահարկում են հարցը, թե չհասցրեցին նախկինների դղյակներն ԱԹՍ-ներ դարձնել, գտնվեցին այնպիսի անմեղսունակներ, որոնք միֆ համարեցին, թե մենք ունեցել ենք տարածաշրջանի ամենամարտունակ բանակը։
Արդյունքում Պաշտպանության նախարար Դավիթ Տոնոյանն ազատվեց պաշտոնից, Նիկոլ Փաշինյանի պատգամավորները առիթը բաց չեն թողնում մեղքը բանակի ուսերին բարդել։ Եթե այդպես է, ապա ինչու է ՊԲ հրամանատարը պաշտոնի նշանակվում։ Սրանք հարցեր են, որոնց Ջալալ Հարությունյանը պետք է պատասխանի, նա ուղղակի պարտավոր է խոսել, որպեսզի չհամալրի հայրենիքն ու առողջությունը «30 արծաթով» վաճառողների ցանկը։

Անի Սահակյան