Խաղաղապահներն ու ահաբեկիչները Ղարաբաղում, փաստորեն, դեռ «խաղաղ գոյակցում» են
Սիրիացի վարձկանները պետք է լքեն Լեռնային Ղարաբաղը, նրանց գործունեությունը ՀԱՊԿ երկրների մերձակայքում սպառնում է ՀԱՊԿ հավաքական անվտանգությանը, երեկ հայտարարել է ՀԱՊԿ գլխավոր քարտուղար Ստանիսլավ Զասը:
«Մենք ունենք տեղեկատվություն ղարաբաղյան հակամարտության գոտում Սիրիայից վարձկանների ներկայության ու գործողությունների մասին: Ցանկացած սիրիացի վարձկան, զինյալ պետք է լքի այդ տարածքը, դադարեցնի իր գործունեությունը, քանի որ զինյալների խմբերի, ջոկատների, ապօրինի զինված միավորների ստեղծումն անմիջապես ՀԱՊԿ անդամ երկրների սահմանների մերձակայքում հստակ ռիսկեր են պարունակում մեր հավաքական անվտանգության համար»,- ասել է Զասը:
Նա հավելել է, որ սիրիացի վարձկանները և զինյալները պետք է լքեն այդ տարածքը, դադարեցնեն իրենց գործունեությունը, քանի որ «զինյալների, անօրինական զինված խմբավորումների ջոկատների ստեղծումը ՀԱՊԿ անդամ-երկրների սահմանների մոտ որոշակի սպառնալիք է մեր հավաքական անվտանգությանը»,- ասել է նա:
Ռուսական կողմը, ինչպես հիշում ենք, դեռ պատերազմի օրերին բարձրացրեց վարձկան ահաբեկիչների հարցը: Եվ ի՞նչ... Ռուսական կողմը մտադիր է պարբերաբար հարց բարձրացնի, որ վարձկան ահաբեկիչների առկայությունը իրենց դուր չի գալիս:
Իսկ ի՞նչ քայլեր է ձեռնարկում Մոսկվան՝ ի պատասխան այն փաստին, որ ահաբեկիչները շարունակում են մնալ Ադրբեջանում, չնայած այն հանգամանքին, որ Ռուսաստանը մի քանի անգամ արդեն բարձրացնում է այս հարցը:
Այսինքն, ռուսները մի կողմից թուրքերի հետ մոնիտորինգ են իրականացնելու Ադրբեջանում, մյուս կողմից թուրքական կողմին չեն ասում՝ ինչո՞ւ չեք ձեր վարձկաններին հեռացնում Ադրբեջանից:
«Մենք ի սկզբանե կողմ ենք եղել ռազմական գործողությունների դադարեցմանը և խաղաղ պայմանավորվածությունների ճանապարհով տարածաշրջանում խնդիրների լուծմանը։ Այդ դիրքորոշումը չի փոխվել»,- նշել է Զասը։
Նա ասել է, որ կազմակերպությունը չի սահմանափակվել միայն իրադարձությունների զարգացմանը հետևելով ու կրակը դադարեցնելու և բանակցությունների սեղանի շուրջ նստելու պահանջներով։ «Մենք մեծ աշխատանք էինք իրականացնում։ Դրա հետ մեկտեղ պետք է հասկանալ, որ մենք ունենք հավաքական անվտանգության մասին բազային պայմանագիր, որտեղ հստակ ամրագրված են այս կամ այն պետությանը օգնություն ցուցաբերելու համար ՀԱՊԿ-ի հնարավորությունների գործարկման պայմաններն ու կարգը», - ասել է Զասը։ 4-րդ կետի համաձայն՝ ագրեսիայի, հարձակման դեպքում, որը սպառնում է կազմակերպության անդամ պետություններից մեկի անվտանգությանը, կայունությանը, տարածքային ամբողջականությանը, ինքնիշխանությանը, այդ պետության դիմումով դրան անհապաղ համակողմանի օգնություն է ցուցաբերվում, այդ թվում ՝ ռազմական։
«Այս իրավիճակում Հայաստանը չի դիմել ՀԱՊԿ-ի կողմից ռազմական կամ այլ օգնություն ստանալու համար։ Այդ մեխանիզմը մենք չենք գործարկել ու չենք դիտարկել», - ասել է Զասը։
Լավ, Հայաստանը չի դինել՝ պատերազմի ժամանակ ՀԱՊԿ-ին, պաշտոնական Մոսկվան դեռ պատերազմի ժամանակ՝ Նարիշկինի մակարդակով, հիմա էլ՝ ՀԱՊԿ գլխավոր քարտուղարի մակարդակով արձանագրել են սիրիացի վարձկանները պետք է լքեն Լեռնային Ղարաբաղը, նրանց գործունեությունը ՀԱՊԿ երկրների մերձակայքում սպառնում է ՀԱՊԿ հավաքական անվտանգությանը:
Այսինքն, հիմա ՀԱՊԿ գլխավոր քարտուղարը շեշտում է, որ սիրիացի վարձկանները պետք է լքեն Լեռնային Ղարաբաղի հակամարտության գոտին, ինչը նշանակում է, որ ռուս խաղաղապահները սիրիացի վարձկանների հետ շարունակում են «խաղաղ» տեղակայված մնա՞լ միասին Լեռնային Ղարաբաղում պատերազմի ավարտից 3 ամիս անց:
Իսկ ե՞րբ է Ռուսաստանը պատասխան քայլեր ձեռնարկելու այն պատճառով, որ Մոսկվայի կոչերն հետևողականորեն արհամարհում են Ադրբեջանն ու Թուրքիան և շարունակում են Լեռնային Ղարաբաղում պահել վարձկան ահաբեկիչների:
Մետաքսյա Շալունց
Հետևեք մեզ Viber-ում
