Yerkir.am-ի լրագրողի աշխատանքին խոչընդոտելու դեպքի առիթով հաղորդագրություն է ներկայացվել ոստիկանություն
Ս.թ․ հունվարի 29-ին կառավարության շենքի առջեւ Yerkir.am-ի լրագրող Լիանա Սարգսյանի մասնագիտական գործունեությանը խոչընդոտելու դեպքի առիթով ՀՀ ոստիկանության Երեւան քաղաքի վարչության Կենտրոնի բաժանմունք այսօր հաղորդագրություն է տրվել: Այս մասին հայտնում է Yerkir.am-ի խմբագրակազմը։
Հիշեցնենք, որ Yerkir.am-ի թղթակիցը, ականջալուր լինելով Նիկոլ Փաշինյանի՝ Եռաբլուրում առաջ քաշած պայմանին, այն է՝ թղթի վրա գրավոր ներկայացնել ՀՀ Ազգային ժողովում Շուշիի մասին արված հայտարարությունը, պաստառի վրա բառացիորեն մեջբերել էր այն եւ ներկայացել կառավարություն:
Մինչ թղթակիցը գործընկեր լրատվամիջոցներին ներկայացնում էր իր՝ այնտեղ գտնվելու նպատակը, Նիկոլ Փաշինյանի համակիր անձինք, հափշտակելով պաստառը, պատռում են այն, ագրեսիվ վարք դրսեւորում, հրում լրագրողին՝ այդպիսով խոչընդոտելով նրա մասնագիտական աշխատանքին։ Հնարավոր բախումը կանխվել է միայն ոստիկանների միջամտությամբ:
Վերոհիշյալ երեւույթը վկայությունն է այն իրողության, որ ՀՀ իշխանությունների պառակտիչ գործունեության հետեւանքով հասարակական շրջանակներում առկա անհանդուրժողականությունը եւ իշխանամետ առանձին անձինք իրենց սուբյեկտիվ ընկալումներով խոչընդոտում են նաեւ լրագրողների մասնագիտական աշխատանքին: