Էրդողանն ու Ալիևը պահանջեցին պատերազմի օրերին, ստացան՝ 3 ամիս հետո

Աղդամում բացվեց ռուս-թուրքական մոնիտորինգի կենտրոնը, որտեղից էլ երկու երկրների զինվորականները հետևելու են Ղարաբաղում հրադադարի պահպանմանն ու նոյեմբերի 9-ին Հայաստանի, Ադրբեջանի և Ռուսաստանի առաջնորդների միջև ձեռք բերված մյուս պայմանավորվածությունների կատարմանը:

Կենտրոնի հանդիսավոր բացմանը մասնակցել են Ադրբեջանի պաշտպանության նախարար Զաքիր Հասանովը, Ռուսաստանի պաշտպանության փոխնախարար Ալեքսանդր Ֆոմինը, թուրքական կողմից էլ՝ ՊՆ փոխնախարար Յունուս Էմրե Կարաոսմանօղլուն։

Ըստ ադրբեջանական աղբյուրների, առավոտից թուրքական ու ռուսական զորախմբերն արդեն տեղակայվել են կենտրոնում։ Ավելի վաղ Թուրքիայի արտգործնախարարն ասել էր, որ նախնական փուլում կենտրոնում աշխատելու է 60 թուրք, 60 ռուս զինվորական, հրադադարի դիտարկումն էլ իրականացվելու է հիմնականում տեխնիկական միջոցների, այդ թվում` անօդաչու թռչող սարքերի օգնությամբ:

Ռուս-թուրքական համագործակցության մի ձևաչափ, որի մասին դեռ պատերազմի օրերին խոսում էր Ալիևը: Այսինքն, ինչ պահանջեցին Էրդողանն ու Ալիևը, որ Լեռնային Ղարաբաղում «խաղաղությունը» հսկելու է ինչ-որ նոր ձևաչափ և դրանով իսկ հետ է մղվելու ԵԱՀԿ Մինսկի խումբը, իրականացրեցին...

Ու արդեն վայելում են բերկրանքը, միմյանց շնորհավորում:

Ադրբեջանի նախագահը օրերս զանգահարել է Ռուսաստանի առաջնորդին, և շնորհավորել Ղարաբաղում հրադադարի վերահսկման ռուս-թուրքական կենտրոնի բացման կապակցությամբ։

Ըստ Ադրբեջանի նախագահական աշխատակազմի, Իլհամ Ալիևն ու Վլադիմիր Պուտինը նաև կարևորել են Հայաստանի, Ադրբեջանի ու Ռուսաստանի փոխվարչապետերի՝ Մոսկվայում այդ օրն ընթացող հանդիպումը, որի ընթացքում կողմերը պետք է քննարկեին տարածաշրջանում ճանապարհների ու հաղորդակցության միջոցների ապաշրջափակման հարցը։ «Զրույցի ընթացքում նախագահները նաև գոհունակություն են հայտնել ռազմավարական համագործակցության վրա հիմնված ռուս-ադրբեջանական բարեկամական հարաբերությունների հաջող զարգացման առնչությամբ, և այդ կապերի հետագա ամրապնդման վստահություն հայտնել», - հաղորդում է Ադրբեջանի նախագահական նստավայրը։

Ադրբեջանի նախագահ Իլհամ Ալիևը հեռախոսազրույց է ունեցել նաև թուրք գործընկերոջ՝ Ռեջեփ Էրդողանի հետ, շնորհավորել վերջինիս՝ Աղդամում ռուս-թուրքական համատեղ կենտրոնի բացման առնչությամբ, որը պետք է հսկի հրադադարի պահպանումը Լեռնային Ղարաբաղում։

«Երկու երկրների առաջնորդները վստահություն են հայտնել, որ այս կենտրոնի գործունեությունը կնպաստի տարածաշրջանում կայուն խաղաղության ու անվտանգության ամրապնդմանը», - հայտարարեց Ադրբեջանի նախագահական աշխատակազմը։ Ըստ պաշտոնական Բաքվի, Ալիևն ու Էրդողանը նաև քննարկել են թուրքական ընկերությունների մասնակցությունը Ադրբեջանի վերահսկողության տակ անցած տարածքների վերականգնմանը, ինչպես նաև գոհունակություն են հայտնել Հայաստանի, Ադրբեջանի և Ռուսաստանի ղեկավարների միջև նոյեմբերի 9-ին ձեռք բերված համաձայնությունների կատարման առնչությամբ։

Մետաքսյա Շալունց