Թուրքը սկսեց կլանել Շուշին. Դուք գնացեք ադրբեջանցիների հետ «տնտեսական հրաշք» կառուցեք

Մոսկվայում օրերս կայացավ Հայաստանի, Ռուսաստանի և Ադրբեջանի փոխվարչապետեր Մհեր Գրիգորյանի, Ալեքսեյ Օվերչուկի և Շահին Մուստաֆաևի հանդիպումը: Ըստ Հայաստանի կառավարության տարածած հաղորդագրության համաձայն՝ եռակողմ աշխատանքային խմբի մասնակիցները որոշում են կայացրել ստեղծել փորձագիտական ենթախմբեր՝ երկաթուղային, ավտոմոբիլային և համակցված փոխադրումների հարցերով և փոխադրումների ապահովման, այդ թվում՝ անվտանգության, սահմանային, մաքսային, սանիտարական, անասնաբուժական, բուսասանիտարական և այլ տիպի հսկողության հարցերով:

Ենթախմբերի ձևավորումը նախատեսված է ավարտել մինչև փետրվարի 2-ը, իսկ առաջին նիստը անցկացնել մինչև փետրվարի 5-ը: Որոշվել է նաև եռակողմ աշխատանքային խմբի հերթական հանդիպումն անցկացնել Մոսկվայում: Ամսաթիվը համաձայնեցվելու է համանախագահների կողմից` աշխատանքային կարգով:
Չնայած երկար ժամանակ հնչող քննադատությանը, փաստացի, Փաշինյանի իշխանությունը աչք փակելով Ադրբեջանում պահվող հայ ռազմագերիների վրա, հանգիստ բանակցում են Ադրբեջանի իշխանությունների հետ:

Ավելին, ստացվում է, որ իշխանությունները պատրաստ են Թուրքիայի ու Ադրբեջանի հետ սահմանների բացմանը՝ հանուն Հայաստանի համար անհայտ տնտեսական շահի: Մինչդեռ, ընդհակառակը, վտանգներն ավելի են, քան տնտեսական հնարավորություններից ծնվող սպասելիքները:

Իսկ ինչ է անում թուրքը, կոնկրետ՝ Թուրքիան...

Թուրքը արդեն իսկ գրավում է Լեռնային Ղարաբաղը, ինչպես ողջ Եվրոպան է Էրդողանը գրավել:

Թուրքիայի «Ազգայնական շարժում» կուսակցության պատվիրակությունն օրերս այցելել է Ադրբեջան։ Թուրքերը մտադիր են Շուշիում դպրոց կառուցել։

Ինչպես հաղորդեց «Ազատություն» ռադիոկայանը՝ Ազգայնական կուսակցության փոխնախագահ Մևլութ Կարակայան, «Գորշ գայլեր» կազմակերպության ղեկավար Ահմեդ Յըլդըրըմը և ճարտարապետ Յուսուֆ Գյունայդինը նախ հանդիպումներ են ունեցել Բաքվում, հետո Շուշիում։

Ըստ ռադիոկայանի՝ Ազգայնականների կողմից Շուշիում դպրոց կառուցելու մասին այդ կուսակցության ղեկավար Դևլեթ Բահչելին առաջին անգամ հայտարարել էր հունվարի 16-ին։ Խորհրդարանում իր կուսակցության անդամների հետ հանդիպմանը նա ցույց էր տվել դպրոցի էսքիզների լուսանկարները։ Նա սոցցանցերում գրել էր, որ եթե երկրի նախագահ Ռեջեփ Էրդողանը թույլ տա, Շուշիում ինը դասասենյակներով դպրոց կկառուցեն, որը կարող է կոչվել Շուշիում ծնված կոմպոզիտոր, Ադրբեջանի օրհներգի հեղինակ Ուզեյիր Հաջիբեյովի անունով։ Նրա գրառումից երկու շաբաթ չանցած թուրք ազգայնականների պատվիրակությունն այսօր արդեն Բաքու է այցելում իրենց ծրագրերը տեղում քննարկելու համար։

Ադրբեջանի կառավարությունը պլանավորել է 2021 թվականին 1 միլիարդ 300 միլիոն դոլար հատկացնել իրենց վերահսկողության տակ անցած տարածքների ենթակառուցվածքների վերականգնմանը։ Դրա համար նաև պետական հիմնադրամ է բացվել, որի մասին երկրի ղեկավար Իլհամ Ալիևը հայտարարեց հունվարի սկզբին։ Հատկացումները պետք է կամավոր կատարվեն, բայց շատ արագ պարզվեց, որ կամավորությունը, ըստ էության պարտադիր բնույթ ունի։

Ահա, ինչպես է թուրք-ադրբեջանական տանդեմը գրավում «դժգույն» Շուշին: Քիչ անցած կպարզվի, որ Շուշիում, առհասարակ, հայկական ոչինչ չի էլ եղել, ամեն ինչ թուրքական է, լավագույն դեպքում՝ ադրբեջանական...

Իսկ Փաշինյանի իշխանությունը թող գնա Մոսկվայում բանակցի Ադրբեջանի հետ՝ Հայաստանի տնտեսական հրաշքին սպասելով...

Մետաքսյա Շալունց