5 գերի՝ վաղը Ադրբեջանի հետ բանակցելու համար, մնացածի ճակատագիրը ձեր խղճին է, «թավիշներ»
Հունվարի 30-ին Մոսկվայում Ռուսաստանի, Հայաստանի ու Ադրբեջանի փոխվարչապետերը բանակցելու են Հայաստանն ու Ադրբեջանը միմյանց կապող ավտոմայրուղիների ու երկաթուղային գծերի ապաշրջափակման շուրջ, երեկ Եռաբլուրում «Ազատության» հետ զրույցում ասել է փոխվարչապետ Մհեր Գրիգորյանը, ով հայկական կողմից վարելու է այդ բանակցությունները։
«Այս պահին օրակարգը, որով հանդիպումը սկսվելու է, հունվարի 11-ի հայտարարությունն է։ Որևէ ավելի կոնկրետ հարց դեռևս չկա», - ասաց փոխվարչապետը։
Դիտարկմանը, որ, ըստ ամենայնի, քննարկվելու են հայկական և ադրբեջանական երկաթգծերը վերագործարկելու, միացնելու հարցերը, Գրիգորյանն արձագանքեց․ - «Եթե հայտարարությամբ նայենք՝ այո։ Ապաբլոկավորումը տրանսպորտային և տնտեսական կապի, բնականաբար ենթադրում է թե՛ երկաթուղին, թե՛ ավտոճանապարհները, թե՛ այլ բաղադրիչներ»։
Հարցին, թե արդյոք խոսքը միայն Նախիջևանի մասին է, թե վերաբերում է նաև Աղստաֆայի հատվածին, փոխվարչապետը պատասխանեց․ - «Ես կարծում եմ, որևէ կոնկրետ ուղղությամբ սահմանափակում այս պահին չկա որևէ փաստաթղթում»։
Երեք երկրների փոխվարչապետերի հանդիպումը այս հունվարի 11-ին Ռուսաստանի, Հայաստանի ու Ադրբեջանի ղեկավարների պայմանավորվածության արդյունք է։
Հիմա, ստացվում է, որ վաղը, այնուամենայնիվ, հայկական կողմը գնալու է՝ Ռուսաստանի, Հայաստանի ու Ադրբեջանի փոխվարչապետերի եռակողմ հանդիպման է մասնակցելու:
Այսինքն՝ Ադրբեջանը շարունակում է պահել գերիներ, իսկ պաշտոնական Երևանը գնում է թուրք-ադրբեջանական ահաբեկչական իշխանությունների հետ բանակցություններ վարում ու դեռ պարզ էլ չէ, Հայաստանն իր տարածքի վրա տրանսպորտային ուղիների ապաշրջափակման պարագայում հսկողություն ու ազդեցություն ունենալո՞ւ է, թե Հայաստանին ասելու են՝ գնա, հեռվից նայիր, թե ինչպես ենք մենք քո ճանապարհների վրա հսկողություն իրականացնում:
Երեկ Եռաբլուրում լրագրողների հետ ճեպազրույցի ընթացքում Հայաստան-Ադրբեջան հաղորդակցական ուղիների վերագործարկմանն անդրադարձավ նաև Հայաստանի արտգործնախարար Արա Այվազյանը՝ նշելով, որ իրանցի իր գործընկերոջ՝ Մոհամմադ Ջավադ Զարիֆի հետ քննարկել է հարցը՝ հավելելով. - «Որևէ կոնկրետ նախագիծ այս պահի դրությամբ հստակեցման առարկա չէ»։
Արտգործնախարարն այնուհետև տեղեկացրեց, որ Կարս-Գյումրի երկաթգծի վերագործարկման շուրջ Թուրքիայի հետ այս պահին չեն բանակցում։
Մետաքսյա Շալունց
Հետևեք մեզ Viber-ում
